ಬೆಳಗಾವಿ ಹುಡುಗ ಸೂರಜ್ ಹೂಗಾರ್ ಆಕ್ಟಿಂಗ್ ಜರ್ನಿ ಶುರುವಾಗಿದ್ದು ಹೇಗೆ ಗೊತ್ತಾ?

'ಮಂಗಳ ಗೌರಿ' ಮದುವೆ ಧಾರಾವಾಹಿ ಮೂಲಕ ನಟನೆ

ಅರವಿಂದ್ ಕೌಶಿಕ್ ಅವರ ನಿರ್ದೇಶನದಲ್ಲಿ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಮೂಡಿ ಬರುತ್ತಿದ್ದ "ಲಗ್ನಪತ್ರಿಕೆ" ಧಾರಾವಾಹಿಯಲ್ಲಿ ನಾಯಕ ನಟನಾಗಿ ನಟಿಸಿ ಸೈ ಎನಿಸಿಕೊಂಡಿರುವ ಸೂರಜ್ ಅವರು ತಮ್ಮ ನಟನ ಜರ್ನಿಯನ್ನು ಶುರುಮಾಡಿದ್ದು 'ಮಂಗಳ ಗೌರಿ' ಮದುವೆ ಧಾರಾವಾಹಿ ಮೂಲಕ. ಈ ಧಾರಾವಾಹಿಯಲ್ಲಿ ಶಾರ್ಪ್ ಶೂಟರ್ ರಾಣ ಆಗಿ ಕಾಣಿಸಿಕೊಂಡ ಇವರು ತಮ್ಮ ಪಾತ್ರಕ್ಕೆ ಅದ್ಭುತವಾಗಿ ಜೀವ ತುಂಬಿ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದ್ದರು. ಎರಡನೇ ಧಾರಾವಾಹಿಯಲ್ಲಿಯೇ ನಾಯಕ ನಟನಾಗಿ ನಟಿಸುವ ಅವಕಾಶ ಪಡೆದ ಇವರು ತಮ್ಮ ಅಭಿನಯದ ಮೂಲಕವೇ ನಟನೆ ತಮಗೆ ರಕ್ತಗತವಾಗಿ ಬಂದಿದೆ ಎಂಬುದನ್ನು ಸಾಬೀತು ಮಾಡುತ್ತಿದ್ದಾರೆ.

'ಕಥೆಯೊಂದು ಶುರುವಾಗಿದೆ' ಧಾರಾವಾಹಿಯಿಂದ ಹೊರಕ್ಕೆ

ಇಂಜಿನಿಯರಿಂಗ್ ಪದವಿ ಮುಗಿಸಿದ ನಂತರ ನಟನಾ ಕ್ಷೇತ್ರ ಇವರನ್ನು ಕೈ ಬೀಸಿ ಕರೆಯಿತು. ಅದರ ಸಲುವಾಗಿ ಮುಂಬೈಗೆ ಹೋಗಿ ನಟನಾ ತರಬೇತಿಗಳನ್ನು ಪಡೆದು ವಾಪಸಾದರು. ತಕ್ಷಣ 'ಮಂಗಳ ಗೌರಿ ಮದುವೆ' ಧಾರಾವಾಹಿ ಇವರ ಪಾಲಿಗೆ ದೊರಕಿತು. ಅಲ್ಲಿ ಅದ್ಭುತವಾಗಿ ನಟಿಸಿ ತಮ್ಮ ನಟನೆಯನ್ನು ಸಾಬೀತು ಮಾಡಿದ ಸೂರಜ್ ಎರಡನೇ ಧಾರಾವಾಹಿ 'ಲಗ್ನಪತ್ರಿಕೆ'ಯಲ್ಲಿ ನಾಯಕನಾಗಿ ಮಿಂಚಿದರು. ಮುಂದೆ 'ಕಥೆಯೊಂದು ಶುರುವಾಗಿದೆ'ಯಲ್ಲಿ ನಟಿಸಿ ಆರಂಭದಲ್ಲೇ ಹೊರಬಂದಿದ್ದಾರೆ.

ಯಾವ ಪಾತ್ರದಲ್ಲೂ ನಟಿಸಲು ರೆಡಿ

ಪಾತ್ರ ಯಾವುದೇ ಇದ್ದರೂ ಆ ಪಾತ್ರಕ್ಕೆ ನಾವೆಷ್ಟು ಜೀವಂತಿಕೆಯನ್ನು ಕೊಡುತ್ತೇವೆ ಎಂಬುದು ನಿಜವಾದ ನಟನ ಸಾಮರ್ಥ್ಯದ ಮೇಲಿರುತ್ತದೆ ಎಂದು ನಂಬುತ್ತಾರೆ ಸೂರಜ್. ನಾಯಕನ ಪಾತ್ರವೇ ಕೊಡಲಿ ವಿಲನ್ ಪಾತ್ರವೇ ಆಗಲಿ ಅಥವಾ ಇನ್ಯಾವುದೇ ಪಾತ್ರವಾದರೂ ಸರಿ ನಾವು ನಟನೆಯ ಮೂಲಕ ಅದಕ್ಕೆ ಎಷ್ಟು ಜೀವ ತುಂಬುತ್ತೇವೆ ಎಂಬುದೇ ನಮ್ಮ ನಿಜವಾದ ತಾಕತ್ತು ಎಂದು ನಂಬಿ ಅದನ್ನೇ ಪಾಲಿಸುತ್ತಿರುವ ನಟ ಸೂರಜ್ ಹೂಗಾರ್ ಮತ್ತೆ ಕಿರುತೆರೆಗೆ ಮರಳುತ್ತಾರಾ ಎಂದು ಕಾದು ನೋಡಬೇಕಾಗಿದೆ.