ಸಲ್ಮಾನ್ ಜತೆ ನಿರೂಪಕಿಯಾಗಲು ನಾನು ಸಿದ್ಧ ಎಂದ ಕತ್ರೀನಾ, ಆದರೆ...

ಕತ್ರೀನಾ ನಿಮ್ಮ ಕೋ ಹೋಸ್ಟ್ ಅಂತೆ ಹೌದಾ?

ಕತ್ರೀನಾ ನಿಮ್ಮ ಕೋ ಹೋಸ್ಟ್ ಅಂತೆ ಹೌದಾ? ಎಂದು ಸಲ್ಮಾನ್ ಅವರನ್ನು ಕೇಳಿದ್ದಕ್ಕೆ ತಮಾಷೆಯಾಗಿ ಉತ್ತರಿಸಿದ ಸಲ್ಮಾನ್, ಬಹುಶಃ ಹೀಗೊಂದು ಗಾಳಿ ಸುದ್ದಿಯನ್ನು ಖುದ್ದು ಕತ್ರೀನಾಳೇ ಎಲ್ಲೆಡೆ ಹರಿದಾಡುವಂತೆ ಮಾಡಿರಬೇಕು ಎಂದರು.

ಈ ಬಾರಿ ಜೋಡಿ ಥೀಮ್ ಇದೆಯಂತೆ ಹೌದಾ ಎಂದು ಕೇಳಿದ್ಳು. ಹಾಗಾದರೆ ನಾನು ಬರ್ತೀನಿ ಅಂದಳು, ನಾನು ಯಾಕೆ ಎಂದು ಪ್ರಶ್ನಿಸಿದೆ. ನಿನ್ನ ಜೋಡಿಯಾಗಿ ಕಾಲೆಳೆಯುವೆ ಎಂದಳು. ಅದ್ಸರಿ ನಿಂಗೆ ಎಷ್ಟು ಕೊಡ್ತಾರೆ? ಎಂದು ನನ್ನನ್ನು ಕೇಳಿದಳು. ಯಾಕೆ ಅಂದೆ, ನಿಂಗೆ ಎಷ್ಟು ಪೇ ಮಾಡ್ತಾರೋ ನಂಗೂ ಅಷ್ಟೇ ಮಾಡಿದ್ರೆ ಮಾತ್ರ ನಾನು ಹೋಸ್ಟ್ ಆಗ್ತೀನಿ ಅಂದಳು ಎನ್ನುತ್ತಾ ಕತ್ರೀನಾ ಜತೆಗಿನ ಸಂಭಾಷಣೆಯನ್ನು ಸಲ್ಮಾನ್ ಬಿಚ್ಚಿಟ್ಟರು.

ಅವಧಿಗೆ ಮುನ್ನ ಬಿಗ್ ಬಾಸ್ ಶೋ ಲಾಂಚ್

ಅಕ್ಟೋಬರ್ ತಿಂಗಳಿನಲ್ಲಿ ಸಾಮಾನ್ಯವಾಗಿ ಆರಂಭವಾಗುವ ಬಿಗ್ ಬಾಸ್ ಶೋ, ಈ ಬಾರಿ ಅವಧಿಗೆ ಮುನ್ನ ಆರಂಭವಾಗುತ್ತಿದೆ. ಸೆಪ್ಟೆಂಬರ್ 16,2018ರಂದು ಪ್ರೀಮಿಯರ್ ಶೋ ಆರಂಭವಾಗಲಿದ್ದು, ಕಲರ್ಸ್ ಟಿವಿಯಲ್ಲಿ ಸೋಮವಾರದಿಂದ ಶುಕ್ರವಾರದ ತನಕ ರಾತ್ರಿ 10.30ಕ್ಕೆ ಹಾಗೂ ಶನಿವಾರ ಮತ್ತು ಭಾನುವಾರದಂದು ರಾತ್ರಿ 9 ಗಂಟೆಗೆ ಪ್ರಸಾರವಾಗಲಿದೆ.

ಕುತೂಹಲ ಮೂಡಿಸಿರುವ ಜೋಡಿಗಳು

ಸೆಪ್ಟೆಂಬರ್ 16ಕ್ಕೆ ಬಿಗ್ ಬಾಸ್ ಆರಂಭವಾಗಲಿದ್ದು. ಸ್ಪರ್ಧಿಗಳ ಬಗ್ಗೆ ಇನ್ನು ಯಾವುದೇ ಸುಳಿವು ಸಿಕ್ಕಿಲ್ಲ. ಕಾಮಿಡಿಯನ್ ಭಾರ್ತಿ ಸಿಂಗ್ ಹಾಗೂ ಹರ್ಷ್ ಲಿಂಬಚಿಯಾ ಅವರನ್ನು ಮೊದಲ ಜೋಡಿ ಎಂದು ಪರಿಚಯಿಸಲಾಗಿದೆ. ವಿಭಾ ಹಾಗೂ ಪುರು ಚಿಬ್ಬಾರ್ ಅವರ ಹೆಸರು ಓಡಾಡುತ್ತಿದೆ. ಟೀನಾ ದತ್ತಾ ಹಾಗೂ ಶ್ರೀಶಾಂತ್ ಗೂ ಆಹ್ವಾನ ಸಿಕ್ಕಿದೆ. ಆದರೆ, ಯಾರ ಹೆಸರು ಅಧಿಕೃತವಾಗಿ ಹೊರ ಬಿದ್ದಿಲ್ಲ.

ಸೆಲೆಬ್ರಿಟಿಗಳಿಗೆ ಅವಕಾಶ

ದೀಪಿಕಾ ಕಕ್ಕರ್, ಕರಣ್ ವೀರ್ ಬೊಹ್ರಾ ಅವರು ತಮ್ಮ ಜೋಡಿಗಳಾದ ಶೋಯೆಬ್ ಇಬ್ರಾಹಿಂ, ತೀಜಯ್ ಸಿಧು ಇಲ್ಲದೆ ಬಿಗ್ ಬಾಸ್ ಮನೆ ಪ್ರವೇಶಿಸುವ ಸಾಧ್ಯತೆಯಿದೆ. ಅಲ್ಲದೆ, ಗುರ್ ಮೀತ್ ಚೌಧರಿ, ದೆಬಿನಾ ಬ್ಯಾನರ್ಜಿ, ಸುಮೇರ್ ಪರ್ಸಿಚಾ, ಶಾಲೀನ್ ಬನೋಟ್, ಸ್ಕಾರ್ಲೆಟ್ ರೋಸ್ ಹೀಗೆ ಅನೇಕರ ಹೆಸರುಗಳು ಕೇಳಿ ಬಂದಿವೆ.