'ಈ ಮನೆ ಅದಕ್ಕಲ್ಲ' ಎಂದು ರೂಪೇಶ್-ಸಾನ್ಯಾಗೆ ಕ್ಲಾಸ್ ತೆಗೆದುಕೊಂಡ ಕಿಚ್ಚ; ಈ ಪಾಠದ ಅಗತ್ಯತೆ ಮುಂಚೆಯೇ ಇತ್ತು!

ಓಟಿಟಿಯಲ್ಲಿದು ಸಮಸ್ಯೆಯಾಗಿರಲಿಲ್ಲ

ಇನ್ನು ರೂಪೇಶ್ ಶೆಟ್ಟಿ ಹಾಗೂ ಸಾನ್ಯಾ ಅಯ್ಯರ್ ತುಂಬ ಕ್ಲೋಸ್ ಆಗಿರುವುದು ಸದ್ಯ ಸಮಸ್ಯೆಯಾಗಿ ಪರಿಣಮಿಸಿದೆ ಎಂದು ಸುದೀಪ್ ಚರ್ಚಿಸಿದ್ದಾರೆ. ಆದರೆ ಈ ಜೋಡಿ ಓಟಿಟಿಯಲ್ಲಿ ಇದೇ ರೀತಿ ನಡೆದುಕೊಂಡಾಗ ಯಾರೂ ಸಹ ಈ ಕುರಿತು ಪ್ರಶ್ನೆ ಎತ್ತಿರಲಿಲ್ಲ. ಅಂದು ಸ್ವತಂತ್ರ ಕೊಟ್ಟು ಇಂದು ಸರಿಪಡಿಸುವುದು ಎಷ್ಟು ಸರಿ, ಅಂದೇ ಈ ಕುರಿತಾಗಿ ದನಿ ಎತ್ತಿದ್ದರೆ, ಕ್ಲಾಸ್ ತೆಗೆದುಕೊಂಡಿದ್ದರೆ ಇಂದು ಪ್ರತ್ಯೇಕವಾಗಿ ಇಬ್ಬರು ಸ್ಪರ್ಧಿಗಳನ್ನು ಈ ಮಟ್ಟಿಗೆ ತಿಳಿಹೇಳಿ ಸರಿಪಡಿಸುವಂತಹ ಪ್ರಮೇಯವೇ ಇರುತ್ತಿರಲಿಲ್ಲ.

ಇಮೇಜ್ ಹದಗೆಡಬಹುದು

ಇನ್ನು ಮೊದಲೇ ಹೇಳಿದಂತೆ ಓಟಿಟಿಯಲ್ಲಿ ಸ್ವತಂತ್ರ ಕೊಟ್ಟು ಈಗ ಸ್ಪರ್ಧಿಗಳ 'ನಡವಳಿಕೆ' ನಿಯಮಕ್ಕೆ ತಕ್ಕಂತೆ ಇಲ್ಲ ಎಂದು ಹೇಳಿದ್ದರಿಂದ ಆ ಸ್ಪರ್ಧಿಗಳ ಕುರಿತು ಜನರಲ್ಲಿ ಕೆಟ್ಟ ಮನೋಭಾವ ಮೂಡಬಹುದು ಹಾಗೂ ಇದು ಆ ಸ್ಪರ್ಧಿಗಳು ಮನೆಯಿಂದ ಹೊರ ಹೋದ ನಂತರವೂ ಮುಂದುವರಿಯಬಹುದು. ಮನೆಯಲ್ಲಿದ್ದಾಗ ಸ್ಪರ್ಧಿಗಳ ನಡುವೆ ಇದ್ದ ಸಂಬಂಧ ಹೊರಗಡೆ ಹೋದ ಮೇಲೂ ಉಳಿದಿದೆ ಎಂದ ಮೇಲೆ ಈ ಆರೋಪವು ಸಹ ಈ ಇಬ್ಬರು ಸ್ಪರ್ಧಿಗಳ ವೃತ್ತಿ ಜೀವನದಲ್ಲಿ ಕಪ್ಪುಚುಕ್ಕೆಯಾಗಿ ಉಳಿಯುವುದರಲ್ಲಿ ಎರಡು ಮಾತಿಲ್ಲ.

ಕಣ್ಣೀರಿಟ್ಟ ರೂಪೇಶ್ ಶೆಟ್ಟಿ

ಬಿಗ್ ಬಾಸ್ ಓಟಿಟಿ ಆವೃತ್ತಿಯಲ್ಲಿ ವಿನ್ನರ್ ಆಗಿ ಹೊರಹೊಮ್ಮಿದ ಸ್ಪರ್ಧಿ ಈಗ ತನ್ನ ಮೇಲೆ ಬಂದ ಆರೋಪಗಳಿಂದ ಕಣ್ಣೀರಿಟ್ಟಿದ್ದಾನೆ. ತಾಯಿಯ ಮೇಲೆ ಪ್ರಮಾಣ ಮಾಡಿ ಮಾತನಾಡಿದ ರೂಪೇಶ್ ಶೆಟ್ಟಿ ಕೆಟ್ಟ ಉದ್ದೇಶದೊಂದಿಗೆ ನಡೆದುಕೊಂಡಿದ್ದರೆ ಈಗಲೇ ನಾನು ಮನೆಯಿಂದ ಹೊರ ನಡೆಯಲು ಸಿದ್ಧ ಎಂದು ಘಂಟಾಘೋಷವಾಗಿ ಹೇಳಿಕೆ ನೀಡಿದ್ದಾರೆ.

ಪಾಠದ ಅಗತ್ಯತೆ ಮುಂಚೆಯೇ ಇತ್ತು

ಇನ್ನು ಈ ರೀತಿಯ ಅತಿಯಾದ ಸಲಿಗೆಯ ವರ್ತನೆಗಳು ಬಿಗ್ ಬಾಸ್ ಮನೆಯಲ್ಲಿ ಕಂಡು ಬಂದದ್ದು ಇದೇ ಮೊದಲೇನಲ್ಲ ಎಂಬುದು ನಮಗೂ ನಿಮಗೂ ತಿಳಿದಿರುವ ವಿಷಯವೇ. ಪ್ರೇಕ್ಷಕರು ಈ ಹಿಂದೆಯೂ ಕೆಲ ಜೋಡಿಗಳ ವಿರುದ್ಧ ಸಾಮಾಜಿಕ ಜಾಲತಾಣದಲ್ಲಿ ಇದಕ್ಕಿಂತಲೂ ಮಿಗಿಲಾಗಿ ಕಿಡಿಕಾರಿದ್ದ ಉದಾಹರಣೆಗಳಿವೆ. ಆದರೆ ಆ ಯಾವುದೇ ಬಾರಿಯೂ ವೀಕ್ಷಕರ ಕೂಗು ವೇದಿಕೆ ತಲುಪಿರಲಿಲ್ಲ. ಹೀಗಾಗಿ ಈ ಪಾಠದ ಅಗತ್ಯತೆ ಈಗ ಮಾತ್ರವಲ್ಲ ಮುಂಚೆಯೂ ಇತ್ತು ಎನ್ನಬಹುದು.