ಕಿರುತೆರೆಯಲ್ಲಿ ಒಟ್ಟಿಗೆ ನಟಿಸಿ ಮದುವೆಯಾದ ಜೋಡಿಗಳು ಇವರು!

ಯಶ್- ರಾಧಿಕಾ ಜೋಡಿ!

'ನಂದಗೋಕುಲ' ಧಾರಾವಾಹಿ ಮೂಲಕ ಯಶ್ ಹಾಗೂ ರಾಧಿಕಾ ಪಂಡಿತ್‌ ಕಿರುತೆರೆ ಜರ್ನಿಯನ್ನು ಒಟ್ಟಿಗೆ ಶುರು ಮಾಡಿದರು. ಬಳಿಕ ಇಬ್ಬರೂ ಕೂಡ 'ಮೊಗ್ಗಿನ ಮನಸು' ಚಿತ್ರದ ಮೂಲಕವೇ ಒಟ್ಟಿಗೆ ಬೆಳ್ಳಿ ಪರದೆ ಮೇಲೆ ಕಾಣಿಸಿಕೊಂಡರು. ಸಿನಿಮಾದಲ್ಲಿ ಪ್ರೀತಿಸಿ ಒಂದಾದಂತೆಯೇ ನಿಜ ಜೀವನದಲ್ಲೂ ಈ ಜೋಡಿ ಪ್ರೀತಿಸಿ ಮದುವೆಯಾದರು. ಸದ್ಯ ಈ ಜೋಡಿಗೆ ಇಬ್ಬರು ಮಕ್ಕಳಿದ್ದಾರೆ.

ಪ್ರಶಾಂತ್ ಮತ್ತು ರೂಪಾ!

ನಟ ಪ್ರಶಾಂತ್ ಹಾಗೂ ನಟಿ ರೂಪಾ ಇಬ್ಬರೂ 'ಸಿಲ್ಲಿ-ಲಲ್ಲಿ' ಧಾರಾವಾಹಿಯಲ್ಲಿ ಒಟ್ಟಿಗೆ ನಟಿಸಿದವರು. ಹಲವು ವರ್ಷಗಳ ಕಾಲ ಮೂಡಿ ಬಂದ ಈ ಧಾರಾವಾಹಿಯಲ್ಲಿ ರೂಪಾ ಡಾಕ್ಟರ್‌ ತಂಗಿ ಪಾತ್ರದಲ್ಲಿಯೂ ಪ್ರಶಾಂತ್ ತಮ್ಮನ ಪಾತ್ರದಲ್ಲಿ ನಟಿಸಿದ್ದರು. ನಂತರ ಇಬ್ಬರೂ ಪ್ರೀತಿಸಿ ಮದುವೆಯಾದರು. ಕಳೆದ ವರ್ಷವಷ್ಟೇ ಈ ಜೋಡಿ ರಿಯಾಲಿಟಿ ಶೋ ಒಂದರಲ್ಲಿ ಒಟ್ಟಿಗೆ ಕಾಣಿಸಿಕೊಂಡಿದ್ದರು.

ಚಂದನ್ ಮತ್ತು ಕವಿತಾ!

ನಟ ಚಂದನ್ ಹಾಗೂ ನಟಿ ಕವಿತಾ ಜೋಡಿ ಕಿರುತೆರೆಯಲ್ಲಿ ಫೇಮಸ್. 'ಲಕ್ಷ್ಮೀ ಬಾರಮ್ಮ' ಧಾರಾವಾಹಿಯಲ್ಲಿ ಇಬ್ಬರೂ ಸತಿ-ಪತಿಗಳ ಪಾತ್ರದಲ್ಲಿ ಮಿಂಚಿದವರು. ಸುಮಾರು ಆರು ವರ್ಷಗಳ ಕಾಲ ಮೂಡಿ ಬಂದ ಈ ಧಾರಾವಾಹಿಯಲ್ಲಿ ಚಂದು-ಚಿನ್ನು ಪಾತ್ರವನ್ನು ಇಬ್ಬರೂ ನಿಭಾಯಿಸಿದ್ದರು. ಬಳಿಕ ಇಬ್ಬರು ಪರಸ್ಪರ ಪ್ರೀತಿಸಿ ಕಳೆದ ವರ್ಷವಷ್ಟೇ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ಮದುವೆಯಾದ ಬಳಿಕ ಇಬ್ಬರೂ 'ಕುಕ್ಕು ವಿತ್ ಕಿರಿಕ್ಕು' ಕಾರ್ಯಕ್ರಮದಲ್ಲಿ ಒಟ್ಟಿಗೆ ಭಾಗವಹಿಸಿದ್ದರು.

ಚಂದನ್ ಶೆಟ್ಟಿ- ನಿವೇದಿತಾ!

ಇನ್ನು ಚಂದನ್ ಶೆಟ್ಟಿ ಹಾಗೂ ಬಾರ್ಬಿ ಡಾಲ್ ನಿವೇದಿತಾ ಇಬ್ಬರೂ ಧಾರಾವಾಹಿಗಳಲ್ಲಿ ಕಾಣಿಸಿಕೊಳ್ಳಲಿಲ್ಲವಾದರೂ ಬಿಗ್‌ ಬಾಸ್‌ ರಿಯಾಲಿಟಿ ಶೋನಲ್ಲಿ ಭಾಗವಹಿಸಿದ್ದರು. ರಿಯಾಲಿಟಿ ಶೋಗಳಲ್ಲಿ ಇಬ್ಬರೂ ಒಟ್ಟಿಗೆ ಕಾಣಿಸಿಕೊಂಡು ನಂತರ ಪ್ರೀತಿಸಿ ಮದುವೆಯಾದರು. ಮದುವೆ ಬಳಿಕವೂ ನಿವೇದಿತಾ ಹಲವು ಕಾರ್ಯಕ್ರಮಗಳಲ್ಲಿ ನಿರತರಾಗಿದ್ದಾರೆ.

ಸುನೇತ್ರಾ ಮತ್ತು ರಮೇಶ್‌ ಪಂಡಿತ್‌!

ನಟಿ ಸುನೇತ್ರಾ ಹಾಗೂ ನಟ ರಮೇಶ್‌ ಪಂಡಿತ್‌ ಕಿರುತರೆಯ ಹಿರಿಯ ಜೋಡಿಗಳು. ಸುನೇತ್ರಾ ಸಿಲ್ಲಿ-ಲಲ್ಲಿ ಸೇರಿದಂತೆ ಅನೇಕ ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ. ರಮೇಶ್‌ ಪಂಡಿತ್‌ ಕೂಡ ಅರುಂಧತಿ ಸೇರಿದಂತೆ ಹಲವು ಧಾರಾವಾಹಿಗಳಿಗೆ ಬಣ್ಣ ಹಚ್ಚಿದ್ದು, ಇಬ್ಬರೂ ಕಿರುತೆರೆ ಮೂಲಕವೇ ಪರಿಚಯವಾಗಿ ಪ್ರೀತಿಸಿ ವಿವಾಹವಾಗಿದ್ದಾರೆ.