'ಬಿಗ್ ಬಾಸ್' ಕನ್ನಡ 7: ಕಲರ್ಸ್ ಧಾರಾವಾಹಿಗಳ ಮಹಾ ಸಂಗಮ!

7 ಸ್ಪರ್ಧಿಗಳು ಕಲರ್ಸ್ ವಾಹಿನಿಯವರು

'ಬಿಗ್ ಬಾಸ್'ಗೆ ಈ ಬಾರಿ 18 ಸ್ಪರ್ಧಿಗಳು ಹೋಗಿದ್ದಾರೆ. ಈ ಪೈಕಿ 7 ಸ್ಪರ್ಧಿಗಳು ಕಲರ್ಸ್ ವಾಹಿನಿಗೆ ಸಂಬಂಧಪಟ್ಟವರಾಗಿದ್ದಾರೆ. ಕಲರ್ಸ್ ನಲ್ಲಿ ಪ್ರಸಾರ ಆಗುವ ಧಾರಾವಾಹಿಗಳು, ರಿಯಾಲಿಟಿ ಶೋಗಳ ಕಲಾವಿದರಿಗೆ 'ಬಿಗ್ ಬಾಸ್'ನಲ್ಲಿ ಅವಕಾಶ ನೀಡಲಾಗಿದೆ. ಹಾಸ್ಯ ನಟ ಕುರಿ ಪ್ರತಾಪ್, ಡ್ಯಾನ್ಸರ್ ಕಿಶನ್, ನಟಿ ಪ್ರಿಯಾಂಕಾ, ಸುಜಾತ, ಚಂದನಾ, ಭೂಮಿ ಶೆಟ್ಟಿ, ನಿರೂಪಕಿ ಚ್ರೈತ್ರ, ಶೈನ್ ಶೆಟ್ಟಿ ಎಲ್ಲರೂ ಕಲರ್ಸ್ ವಾಹಿನಿ ಮೂಲಕ ಗುರುತಿಸಿಕೊಂಡವರು.

ಧಾರಾವಾಹಿಗಳ ಮಹಾ ಸಂಗಮವಾದ 'ಬಿಗ್ ಬಾಸ್'

ನಟಿ ಪ್ರಿಯಾಂಕಾ 'ಅಗ್ನಿಸಾಕ್ಷಿ' ಧಾರಾವಾಹಿಯಲ್ಲಿ, ಸುಜಾತ 'ರಾಧಾ ರಾಮಣ' ಧಾರಾವಾಹಿಯಲ್ಲಿ, 'ಚುಕ್ಕಿ' ಧಾರಾವಾಹಿಯಲ್ಲಿ ಚಂದನ, 'ಕಿನ್ನರಿ' ಧಾರಾವಾಹಿಯಲ್ಲಿ ಭೂಮಿ ಶೆಟ್ಟಿ, 'ಲಕ್ಷ್ಮಿ ಬಾರಮ್ಮ' ಧಾರಾವಾಹಿಯಲ್ಲಿ ಶೈನ್ ಶೆಟ್ಟಿ ನಟಿಸಿದ್ದಾರೆ. ಮಜಾ ಟಾಕೀಸ್ ಕಾರ್ಯಕ್ರಮದಲ್ಲಿ ಕುರಿ ಪ್ರತಾಪ್ ಹಾಗೂ ತಕಧಿಮಿತಾ ಕಾರ್ಯಕ್ರಮದಲ್ಲಿ ಡ್ಯಾನ್ಸರ್ ಕಿಶನ್ ಕಾಣಿಸಿಕೊಂಡಿದ್ದರು. ನಿರೂಪಕಿ ಚ್ರೈತ್ರ 'ಕಲರ್ಸ್ ಮೂವಿಸ್' ಕಾರ್ಯಕ್ರಮದಲ್ಲಿ ಕೆಲಸ ಮಾಡುತ್ತಿದ್ದರು.

ಧಾರಾವಾಹಿ ನಂತರ ಸಿನಿಮಾ, ರಂಗಭೂಮಿ ಕಡೆ ಗಮನ

ಕಲರ್ಸ್ ವಾಹಿನಿಯ ಧಾರಾವಾಹಿ ಕಲಾವಿದರಿಗೆ ಹೆಚ್ಚು ಪ್ರಾಮುಖ್ಯತೆ ನೀಡಿದ್ದು, ಆ ನಂತರ ಕೆಲವು ಸಿನಿಮಾ ಹಾಗೂ ರಂಗಭೂಮಿ ಕಲಾವಿದರಿಗೆ ಅವಕಾಶ ನೀಡಲಾಗಿದೆ. ಹಿರಿಯ ನಟ ಜೈ ಜಗದೀಶ್, ದುನಿಯಾ ರಶ್ಮಿ ಹಾಗೂ ಹರೀಶ್ ರಾಜ್ ಸಿನಿಮಾ ಕ್ಷೇತ್ರದಿಂದ ಬಂದಿದ್ದಾರೆ. ರಾಜು ರಾಳಿಕೋಟೆ, ವಾಸುಕಿ ವೈಭವ್, ಚ್ರೈತ್ರಾ ಕೊಟ್ಟೂರು, ಚಂದನ್ ರಂಗಭೂಮಿ ಹಾಗೂ ಸಿನಿಮಾದಲ್ಲಿ ಕೆಲಸ ಮಾಡಿದ್ದಾರೆ.

ಕ್ರೀಡಾ ವಿಭಾಗಕ್ಕೆ ಅವಕಾಶ ನೀಡಿಲ್ಲ

ಉಳಿದಂತೆ, ಪತ್ರಿಕೋದ್ಯಮ ವಿಭಾಗದಿಂದ ರವಿ ಬೆಳಗೆರೆ ಹೋಗಿದ್ದಾರೆ. ಹಾವೇರಿ ಜಿಲ್ಲೆಯ, ಅಕ್ಕಿ ಮಠದ ಗುರುಲಿಂಗ ಸ್ವಾಮಿಜಿ ಕೂಡ 'ಬಿಗ್ ಬಾಸ್' ಆಟ ಆಡುತ್ತಿದ್ದಾರೆ. ಆದರೆ, ಈ ಬಾರಿ ಕ್ರೀಡಾ ವಿಭಾಗದಿಂದ ಯಾರಿಗೂ 'ಬಿಗ್ ಬಾಸ್' ಟಿಕೆಟ್ ಸಿಕ್ಕಿಲ್ಲ. ಈ ಹಿಂದೆ ಸೀಸನ್ ಮೂರರಲ್ಲಿ ಅಯ್ಯಪ್ಪ, ಸೀಸನ್ ನಾಲ್ಕರಲ್ಲಿ ದೊಡ್ಡ ಗಣೇಶ್ ಹಾಗೂ ಆರರಲ್ಲಿ ರಕ್ಷಿತಾ ರೈ ಈ ಅವಕಾಶ ಪಡೆದಿದ್ದರು.