ಕನಸು ಕಾಣುವ ಮುಗ್ಧ ಮನಸುಗಳ ಕಥೆ 'ನನ್ ಹೆಂಡ್ತಿ ಎಂಬಿಬಿಎಸ್'

ಜೀವನ ಅಂದ್ರೆ ಸುತ್ತಾಡೋಕೆ ಒಂದು ಬೈಕು, ಜೊತೆಗೊಬ್ಭಳು ವೈಫು ಇದ್ರೆ ಸಾಕು ಎನ್ನುವ ಸಂಜು ಒಂದುಕಡೆ, ಲಂಡನ್ ನಲ್ಲಿ ಎಂಬಿಬಿಎಸ್ ಮಾಡಿ, ತನ್ನ ಊರಿನಲ್ಲಿ ವೈದ್ಯೆಯಾಗಿ ಕೆಲಸ ಮಾಡಬೇಕು ಎನ್ನುವ ಮಹತ್ವಾಕಾಂಕ್ಷಿ ಗೀತಾ ಮತ್ತೊಂದುಕಡೆ.

9ನೇ ಕ್ಲಾಸೂ ಪಾಸ್ ಆಗದ ಹುಡುಗ, ಡಾಕ್ಟರ್ ಆಗಿ ಊರಿಗೆ ನೆರವಾಗಬೇಕು ಅಂತಿರುವ ಹುಡುಗಿ ಇಬ್ಬರ ಕನಸುಗಳು ಬೇರೆ, ಇಬ್ಬರ ದಾರಿ ಬೇರೆ ಆದರೆ ಇವರಿಬ್ಬರು ಮದುವೆಯಲ್ಲಿ ಬಂಧಿಯಾದಾಗ, ಬದುಕಿನ ಸವಾಲುಗಳನ್ನು ಜೊತೆಯಾಗಿ ಎದಿರುಸುತ್ತಾರಾ? ಸ್ಟಾರ್ ಸುವರ್ಣ ವಾಹಿನಿಯ ಹೊಸ ಧಾರಾವಾಹಿ ನನ್ ಹೆಂಡ್ತಿ ಎಂಬಿಬಿಎಸ್ ಆಧುನಿಕ ಮಹಿಳೆಯ ವೃತ್ತಿ ಬದುಕಿನ ಕನಸು ಮತ್ತು ಆಕಾಂಕ್ಷೆಗಳ ಕುರಿತ ಕತೆ.

ಈ ಕನಸು ಮತ್ತು ಆಕಾಂಕ್ಷೆಗಳ ದಾರಿಯಲ್ಲಿ ಮದುವೆ ಎದುರಾದಾಗ, ಮುಂದೇನು ಎನ್ನುವ ಕವಲುದಾರಿಯಲ್ಲಿ ನಿಲ್ಲುವ ಹೆಂಡತಿಗೆ ಅವಳ ಗಂಡನ ನೆರವು ಸಿಗುತ್ತಾ, ಇಲ್ವಾ ಅನ್ನೋದು ಧಾರಾವಾಹಿಯ ಕಥಾಹಂದರ.

ನನ್ ಹೆಂಡ್ತಿ ಎಂಬಿಬಿಎಸ್ ಧಾರಾವಾಹಿಯನ್ನು ಕಿರುತೆರೆಯ ಹಿರಿಯ ನಿರ್ಮಾಪಕ ಮತ್ತು ನಿರ್ದೇಶಕ ರವಿ ಗರಣಿ, ತಮ್ಮ ನಿರ್ಮಾಣ ಸಂಸ್ಥೆ ಆರ್.ಜಿ,ಮೀಡಿಯಾ ಸ್ಟಫ್ ಮೂಲಕ ನಿರ್ಮಿಸುತ್ತಿದ್ದಾರೆ. ಅನುಭವಿ ನಿರ್ದೇಶಕ ನಾಗರಾಜ್ ಉಪ್ಪುಂದ ನನ್ ಹೆಂಡ್ತಿ ಎಂಬಿಬಿಎಸ್ ನಿರ್ದೇಶಿಸುತ್ತಿದ್ದಾರೆ. ಸಾಗರ್, ದಿವ್ಯಾ ರಾವ್, ರಮೇಶ್ ಪಂಡಿತ್ ಪುಷ್ಪ, ಅಶೋಕ್ ಹೆಗ್ಡೆ, ಆಶಾ ರಾಣಿ ಮುಂತಾದವರು ಈ ಧಾರಾವಾಹಿಯ ಮುಖ್ಯ ಭೂಮಿಕೆಯಲ್ಲಿದ್ದಾರೆ.

ನನ್ ಹೆಂಡ್ತಿ ಎಂಬಿಬಿಎಸ್ ಫೆ.11ರಿಂದ ಸೋಮವಾರದಿಂದ ಶನಿವಾರದವರೆಗೆ ರಾತ್ರಿ 9ಗಂಟೆಗೆ ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾಗಲಿದೆ.