Suryavamsha: 'ಜೊತೆ ಜೊತೆಯಲಿ'ಗೆ ಮೇಘಾಶೆಟ್ಟಿ..ಅನಿರುದ್ಧ್ 'ಸೂರ್ಯವಂಶ'ಕ್ಕೆ ಯಾರು?

ಅನಿರುದ್ಧ್‌ಗೆ ನಾಯಕಿ ಪಲ್ಲವಿ ಗೌಡ

ಉದಯ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ 'ಸೇವಂತಿ' ಧಾರಾವಾಹಿಯಲ್ಲಿ ನಾಯಕಿ ಸೇವಂತಿಯಾಗಿ ಅಭಿನಯಿಸಿದ್ದ ಪಲ್ಲವಿ ಗೌಡ ಮುಂದೆ ಕಾರಣಾಂತರಗಳಿಂದ ಸೇವಂತಿ ಪಾತ್ರಕ್ಕೆ ವಿದಾಯ ಹೇಳಿದ್ದರು. ಬಳಿಕ ತೆಲುಗಿನ 'ಚದುರಂಗಂ' ಎಂಬ ಧಾರಾವಾಹಿಯಲ್ಲಿ ನಾಯಕಿಯಾಗಿ ನಟಿಸಿದ ಪಲ್ಲವಿ ಗೌಡ, ಇದೀಗ 'ಸೂರ್ಯವಂಶ' ಧಾರಾವಾಹಿ ಮೂಲಕ ಕಿರುತೆರೆಗೆ ಬರಲಿದ್ದು, ನಟ ಅನಿರುದ್ಧ್ ಜತ್ಕರ್ ಅವರಿಗೆ ಜೋಡಿಯಾಗಲಿದ್ದಾರೆ‌.

'ಗಾಳಿಪಟ' ಹಾರಿಸಿ ನಾಯಕಿಯಾದ ಪಲ್ಲವಿ

'ಗಾಳಿಪಟ' ಎಂಬ ಧಾರಾವಾಹಿಯಲ್ಲಿ ನಾಯಕಿಯಾಗಿ ಮೊದಲು ಕಾಣಿಸಿಕೊಂಡ ಪಲ್ಲವಿ ಗೌಡ ಅವರು ಮತ್ತೆ ಹಿಂತಿರುಗಿ ನೋಡಿದ್ದೇ ಇಲ್ಲ. ಮೇಲಿಂದ ಮೇಲೆ ಅವಕಾಶಗಳು ಬರುತ್ತಲೇ ಹೋದವು. 'ಮನೆಯೊಂದು ಮೂರು ಬಾಗಿಲು', 'ಪರಿಣಯ', 'ಸೇವಂತಿ', 'ಚಂದ್ರ ಚಕೋರಿ' ಹೀಗೆ ಒಂದಾದ ಮೇಲೆ ಒಂದರಂತೆ ಧಾರಾವಾಹಿಗಳಲ್ಲಿ ಅಭಿನಯಿಸಿರುವ ಪಲ್ಲವಿ ಗೌಡ, ಆರೂರು ಜಗದೀಶ್ ನಿರ್ದೇಶನದಲ್ಲಿ ಜೀ ಕನ್ನಡ ವಾಹಿನಿಯಲ್ಲಿ ಮೂಡಿ ಬರುತ್ತಿದ್ದ 'ಜೋಡಿಹಕ್ಕಿ' ಧಾರಾವಾಹಿಯಲ್ಲಿ ವಿಲನ್ ಆಗಿ ಕಾಣಿಸಿಕೊಂಡರು. ಜೊತೆಗೆ ಆ ಪಾತ್ರ ಆಕೆಗೆ ನೀಡಿದ ಪ್ರಾಮುಖ್ಯತೆ ಅಷ್ಟಿಷ್ಟಲ್ಲ.

ಸಿನಿಮಾಗಳಲ್ಲೂ ನಟಿಸಿರೊ ಪಲ್ಲವಿ

ಧಾರಾವಾಹಿಗಳಲ್ಲಷ್ಟೇ ಕಾಣಿಸಿಕೊಳ್ಳದ ಈ ಚೆಲುವೆ ಕೆಲವು ಸಿನಿಮಾಗಳಲ್ಲಿಯೂ ನಟಿಸಿದ್ದಾರೆ. ಮೊದಲಿಗೆ 'ಪ್ರೇಮ ಘೀಮಾ ಜಾನೆ ದೋ' ಸಿನಿಮಾ ಮೂಲಕ ನಾಯಕಿ ನಟಿಯಾಗಿ ಹಿರಿತೆರಿಗೆ ಕಾಲಿಟ್ಟ ಇವರು, ನಂತರ 'ಕಿಡಿ' ಸಿನಿಮಾದಲ್ಲಿಯೂ ಕಾಣಿಸಿಕೊಂಡರು.