'ಕಲರ್ಸ್ ಸೂಪರ್' ವಾಹಿನಿಯ ಸೂಪರ್ ಸ್ಪೆಷಲ್ ಕಾರ್ಯಕ್ರಮಗಳೇನು.?

ಫ್ಯಾಂಟಸಿ ಧಾರಾವಾಹಿ - 'ಸರ್ಪ ಸಂಬಂಧ'

ಇದು ರಾಗಿಣಿ ಎಂಬ ನವ ವಧುವಿನ ಕಥೆ. ಪ್ರತಿ ಹುಣ್ಣಿಮೆಯಂದು ತನ್ನ ಗಂಡ ಹಾವಿನ ರೂಪದಲ್ಲಿ ಬದಲಾದಾಗ, ರಾಗಿಣಿ ಬದುಕಿನಲ್ಲಿ ನಡೆಯುವ ಘಟನೆಗಳೇ ಈ ಧಾರಾವಾಹಿಯ ಕಥಾನಕ.

ಸಾಮಾಜಿಕ, ಪೌರಾಣಿಕ ಧಾರಾವಾಹಿ - 'ಗಿರಿಜಾ ಕಲ್ಯಾಣ'

ಹದಿನೆಂಟನೇ ಶತಮಾನದ ಕಥೆ ಇದು. ಗಿರಿಜೆ ಎಂಬ ಶಿವಭಕ್ತೆ ಆ ಊರಿನ ದುಷ್ಟರಾಜ ಅಮರದೇವನಿಗೆ ಸವಾಲೊಡ್ಡುತ್ತಾಳೆ. ಲೋಕಕಲ್ಯಾಣಕ್ಕಾಗಿ ಅವಳು ಮಾಡುವ ಕಾರ್ಯಗಳಿಗೆ ಸ್ವತಃ ಶಿವ-ಪಾರ್ವತಿಯರೇ ನೆರವಾಗುವ ಪೌರಾಣಿಕ ಕಥೆ ಹೊಂದಿರುವ ಧಾರಾವಾಹಿ ಇದು.

ರೋಮ್ಯಾಂಟಿಕ್ ಕಾಮಿಡಿ - 'ಮಂಗಳೂರು ಹುಡ್ಗಿ ಹುಬ್ಳಿ ಹುಡ್ಗ'

ಮಂಗಳೂರಿನ ಹುಡುಗಿಯ ಕುಟುಂಬ ಹಾಗೂ ಹುಬ್ಬಳ್ಳಿ ಹುಡುಗನ ಕುಟುಂಬ ಬೆಂಗಳೂರಿಗೆ ಬಂದು ಮನೆ ಬಾಡಿಗೆ ಪಡೆಯುತ್ತಾರೆ. ಈ ಎರಡೂ ಕುಟುಂಬಗಳ ಮಧ್ಯೆ ಭಾಷೆ, ಆಚಾರ, ವಿಚಾರಗಳ ವಿಷಯದಲ್ಲಿ ನಡೆಯುವ ಗೊಂದಲಗಳೇ ಈ ತಮಾಷೆಯ ಧಾರಾವಾಹಿಯ ಕಥಾವಸ್ತು.

ಆಕ್ಷನ್ ರಿಯಾಲಿಟಿ ಶೋ - 'ಚಾಂಪಿಯನ್'

ರಾಜ್ಯದ ವಿವಿದೆಡೆಯಿಂದ ಬಂದ ಹುಡುಗಿಯರು ದೇಶದ ವಿವಿಧ ಜಾಗಗಳಲ್ಲಿ 'ತಾವು ಹುಟ್ಟು ಚಾಂಪಿಯನ್' ಎಂದು ಸಾಬೀತು ಮಾಡಲು ಹೆಣಗಾಡುವ ರಿಯಾಲಿಟಿ ಶೋ ಇದು.

ಸೂಪರ್ ನ್ಯಾಚುರಲ್ - 'ನಾ ನಿನ್ನ ಬಿಡಲಾರೆ'

ನಂದಿನಿ ಎಂಬ ಹುಡುಗಿ ತನ್ನ ಪ್ರಿಯತಮ ಅಕ್ಷಯ್ ಜೊತೆ ಮದುವೆ ಆಗುತ್ತಾಳೆ. ಕಾಂಚನಾ ಎಂಬ ಹುಡುಗಿಯ ಪ್ರವೇಶವಾದ ಮೇಲೆ ಆಕೆಯ ಜೀವನ ಅಲ್ಲೋಲ ಕಲ್ಲೋಲವಾಗುತ್ತದೆ. ಕಾಂಚನಾಳನ್ನು ತಡೆಯುವುದು ಸಾಧ್ಯವೇ ಇಲ್ಲ, ಯಾಕಂದ್ರೆ, ಕಾಂಚನಾ ಸತ್ತು ವರ್ಷಗಳೇ ಉರುಳಿರುತ್ತದೆ ಎಂಬ ಸತ್ಯ ನಂದಿನಿಯನ್ನು ದಿಗ್ಭ್ರಾಂತಳನ್ನಾಗಿ ಮಾಡುತ್ತದೆ.

ಡ್ರಾಮಾ - 'ಬಂಗಾರಿ'

ಹುಡುಗಿಯೊಬ್ಬಳ ಮದುವೆ ನಿಶ್ಚಯವಾಗಿರುತ್ತದೆ. ಸಣ್ಣ ಮುಗ್ಧ ಹೆಣ್ಣು ಮಗುವೊಂದು ಅಕಸ್ಮಾತ್ತಾಗಿ ಆಕೆಯನ್ನು ತನ್ನ ತಾಯಿ ಎಂದು ಕರೆಯುತ್ತಾಳೆ. ಮದುವೆಗೆ ಸಿದ್ಧಳಾಗಿರುವ ಹುಡುಗಿಯ ಇಕ್ಕಟ್ಟಿನ ಪರಿಸ್ಥಿತಿ ಈ 'ಬಂಗಾರಿ'.

ಪ್ರೇಮಕಥೆ - 'ಅನುರಾಗ'

ರಸ್ತೆ ಅಪಘಾತಕ್ಕೊಳಗಾದ ಹುಡುಗಿಯ ರಕ್ಷಣೆಗೆ ಗಾಯಕನೊಬ್ಬ ಧಾವಿಸುತ್ತಾನೆ. ಆದರೆ ಆಕೆಯ ಮನೆಯವರು ಅವನನ್ನು ಆಕೆಯ ಪತಿ ಎಂದು ತಪ್ಪಾಗಿ ಭಾವಿಸುತ್ತಾರೆ. ಅಲ್ಲಿಂದ ಶುರುವಾಗುವ ಕಥೆಯೇ 'ಅನುರಾಗ'.

ಪ್ರಚಾರ ರಾಯಭಾರಿ ಆಗಿ ಯಶ್.!

'ಕಲರ್ಸ್ ಸೂಪರ್'ಗಾಗಿ ಕರ್ನಾಟಕದ 179 ನಗರ ಮತ್ತು ಪಟ್ಟಣಗಳಲ್ಲಿ ವಯಕಾಮ್ 18 ಭಾರಿ ಪ್ರಚಾರಾಂದೋಲನ ನಡೆಸಲಿದೆ. ಜುಲೈ 24 ರಂದು ಆರಂಭವಾಗಲಿರುವ 'ಕಲರ್ಸ್ ಸೂಪರ್' ವಾಹಿನಿಯ ಪ್ರಚಾರ ರಾಯಭಾರಿ ಆಗಿ ರಾಕಿಂಗ್ ಸ್ಟಾರ್ ಯಶ್ ಆಯ್ಕೆ ಆಗಿರುವುದು ಮತ್ತೊಂದು ವಿಶೇಷ.