ಸೆಪ್ಟೆಂಬರ್ 16 ರಿಂದ 'ಬಿಗ್ ಬಾಸ್-12' ಶುರು: ವಿಚಿತ್ರ ಜೋಡಿ ನೋಡಲು ರೆಡಿ ಆಗಿ..

ಕಿರುತೆರೆಯ ಅತಿ ದೊಡ್ಡ ಶೋ.. ಒಂದಲ್ಲೊಂದು ವಿವಾದಗಳಿಂದ ಸದಾ ಸದ್ದು ಮಾಡುವ ರಿಯಾಲಿಟಿ ಶೋ ಅಂದ್ರೆ ಅದು 'ಬಿಗ್ ಬಾಸ್'.!

'ಬಿಗ್ ಬಾಸ್' ಬರೀ ಫೇಕ್ ಅಂತ ಯಾರು ಎಷ್ಟೇ ಬೊಬ್ಬೆ ಹೊಡೆದರೂ, ಈ ಶೋಗಾಗಿ ಬಕಪಕ್ಷಿಗಳಂತೆ ಕಾಯುವ ವೀಕ್ಷಕರು ಮಾತ್ರ ಕಮ್ಮಿ ಆಗಿಲ್ಲ. ಹಿಂದಿ ಕಿರುತೆರೆಯಲ್ಲಂತೂ 'ಬಿಗ್ ಬಾಸ್' ಬಹು ಜನಪ್ರಿಯತೆ ಪಡೆದುಕೊಂಡಿದೆ.

ಹಿಂದಿ ಕಿರುತೆರೆಯಲ್ಲಿ ಹನ್ನೊಂದು ಆವೃತ್ತಿಗಳು ಯಶಸ್ವಿ ಆಗಿ ಪೂರ್ಣಗೊಂಡು ಇದೀಗ 'ಬಿಗ್ ಬಾಸ್-12' ನಿಮ್ಮ ಮುಂದೆ ಬರಲಿದೆ. ಸೆಪ್ಟೆಂಬರ್ 16 ರಿಂದ 'ಬಿಗ್ ಬಾಸ್-12' ಶೋ ಪ್ರಸಾರ ಆರಂಭ ಆಗಲಿದೆ.

ಪ್ರತಿ ಆವೃತ್ತಿಯಲ್ಲಿ ಒಂದಲ್ಲಾ ಒಂದು ವಿಶಿಷ್ಟ ಕಾನ್ಸೆಪ್ಟ್ ಗಳನ್ನು ಹೊತ್ತು ತರುವ ಹಿಂದಿ 'ಬಿಗ್ ಬಾಸ್'ನಲ್ಲಿ ಈ ಬಾರಿ 'ವಿಚಿತ್ರ ಜೋಡಿ'ಗಳು ನಿಮಗೆ ಮನರಂಜನೆ ನೀಡಲಿದ್ದಾರೆ.

ಗಂಡ-ಹೆಂಡತಿ, ಅತ್ತೆ-ಸೊಸೆ, ಮಾವ-ಅಳಿಯ, ಮಾಲಿಕ-ಕಾರ್ಮಿಕ, ನಿರ್ದೇಶಕ-ನಟಿ... ಹೀಗೆ 'ವಿಚಿತ್ರ ಜೋಡಿ'ಗಳು ಈ ಬಾರಿಯ 'ಬಿಗ್ ಬಾಸ್' ಹೈಲೈಟ್. ಎಂದಿನಂತೆ ಈ ಬಾರಿಯೂ ವಾರಾಂತ್ಯದಲ್ಲಿ ಸಲ್ಮಾನ್ ಖಾನ್ ನ್ಯಾಯ-ಪಂಚಾಯತಿ ನಡೆಸಲಿದ್ದಾರೆ.

ಸದ್ಯಕ್ಕೆ 'ಬಿಗ್ ಬಾಸ್' ಮನೆಗೆ ಹೋಗುವ 'ವಿಚಿತ್ರ ಜೋಡಿ'ಗಳ ಪಟ್ಟಿ ಇನ್ನೂ ಬಹಿರಂಗ ಆಗಿಲ್ಲ. ಆದ್ರೆ, 'ನೀಲಿ ಚಿತ್ರಗಳ ರಾಜ' ಡ್ಯಾನಿ ಡಿ ಹಾಗೂ ವಿವಾದಾತ್ಮಕ ನಟಿ ಮಹಿಕಾ ಶರ್ಮಾ 'ಬಿಗ್ ಬಾಸ್' ಮನೆಯೊಳಗೆ ಬಂಧಿಯಾಗಲಿದ್ದಾರೆ ಎನ್ನಲಾಗಿದೆ.