Actress Gautami Jadhav: ಕಿರುತೆರೆಯ 'ಸತ್ಯ' ಕೇವಲ ನಟಿಯಷ್ಟೇ ಅಲ್ಲ.. ಈಗ ಉದ್ಯಮಿ

ಕನ್ನಡದ ಖ್ಯಾತ ಧಾರಾವಾಹಿಗಳಲ್ಲಿ ಒಂದಾದ 'ಸತ್ಯ' ಕಿರುತೆರೆ ವೀಕ್ಷಕರ ಮನ ಗೆದ್ದಿರುವುದಂತೂ ಹೌದು. ಇದರಲ್ಲಿ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಳ್ಳುತ್ತಿರುವ ನಟಿ ಗೌತಮಿ ಜಾಧವ್ ಟಾಮ್ ಬಾಯ್ ರೀತಿಯ ಪಾತ್ರವನ್ನು ಯಶಸ್ವಿಯಾಗಿ ನಿರ್ವಹಿಸುತ್ತಿದ್ದಾರೆ ಎಂಬುದಕ್ಕೆ ಧಾರಾವಾಹಿ ಪಡೆದಿರುವ ಪಾಪ್ಯುಲಾರಿಟಿಯೇ ಸಾಕ್ಷಿ!

ಅಂದಹಾಗೆ, ಇದೀಗ ಗೌತಮಿ ಜಾಧವ್ ಅಲಿಯಾಸ್ ಸತ್ಯ ಅವರು ನಟನೆ ಅಷ್ಟೇ ಅಲ್ಲದೇ ಹೊಸ ಬ್ಯುಸಿನೆಸ್ ಒಂದನ್ನು ಆರಂಭಿಸಿದ್ದಾರೆ. ಹೌದು, ಆರೋಗ್ಯಕರ ಜೀವನ ಶೈಲಿಗೆ ಹೆಚ್ಚು ಪ್ರಾಮುಖ್ಯತೆಯನ್ನು ಕೊಡುವ ನಟಿ ಗೌತಮಿ ಜಾಧವ್ ತಲೆಗೆ ಹಚ್ಚುವ ಎಣ್ಣೆಯನ್ನು ಹೊರತರುವ ಮೂಲಕ ಉದ್ಯಮಕ್ಕೆ ಕಾಲಿಟ್ಟಿದ್ದಾರೆ.

ಹೊಸ ಬ್ಯುಸಿನೆಸ್ ಬಗ್ಗೆ ಮಾಹಿತಿ ಕೊಟ್ಟ ನಟಿ

ತನ್ನ ಹೊಸ ಉದ್ಯಮದ ಬಗ್ಗೆ ಸೋಶಿಯಲ್ ಮೀಡಿಯಾ ವೇದಿಕೆಗಳಲ್ಲಿ ಹಂಚಿಕೊಂಡಿದ್ದಾರೆ. ತಮ್ಮ ಇನ್‌ಸ್ಟಾಗ್ರಾಂ ಖಾತೆಯ ಮೂಲಕವೂ ಪೋಸ್ಟ್ ಮಾಡಿಕೊಂಡಿರುವ ನಟಿ ಗೌತಮಿ ಜಾಧವ್ ತಮ್ಮ ಹೊಸ ತೈಲದ ಬಗ್ಗೆ ಮಾಹಿತಿಯನ್ನು ನೀಡಿದ್ದಲ್ಲದೇ ಅದರ ಉಪಯೋಗಗಳನ್ನು ಚೆನ್ನಾಗಿ ವಿವರಿಸಿದ್ದಾರೆ.

ಅಂದಹಾಗೆ, ಈ ಹೊಸ ತೈಲದ ಹೆಸರು 'ವನ ತೈಲಂ'. ಯಾವುದೇ ರೀತಿಯ ಕೆಮಿಕಲ್‌ಗಳು ಅಥವಾ ಪರಿಮಳಕ್ಕಾಗಿ ಬಳಸುವ ರಾಸಾಯನಿಕಗಳನ್ನು ಬಳಸದೆ ಪರಿಶುದ್ಧವಾದ ತೈಲವಾಗಿದೆ. ಗ್ರಾಹಕರಿಗೆ ಉತ್ತಮ ವೆನಿಸುವ ಹಾಗೇ ಪರಿಸರಕ್ಕೆ ಹಿತವಾಗಿರುವಂತಹ ಎಣ್ಣೆ ಇದಾಗಿದೆ ಎಂದು ನಟಿ ಗೌತಮಿ ಜಾಧವ್ ಅವರು ಹೇಳಿಕೊಂಡಿದ್ದಾರೆ.

ಕೂದಲು ಉದುರುವಿಕೆ ಸಮಸ್ಯೆಗೆ ಪರಿಹಾರ

ಆರೋಗ್ಯ, ಬಾಹ್ಯ ಸೌಂದರ್ಯ, ತಲೆ ಕೂದಲಿನ ಸದೃಢತೆ ಇತ್ಯಾದಿ ಅಂಶಗಳು ಇತ್ತೀಚಿನ ದಿನಗಳಲ್ಲಿ ಬಹಳಷ್ಟು ಪ್ರಾಮುಖ್ಯತೆಯನ್ನು ಪಡೆದುಕೊಳ್ಳುತ್ತಿದೆ. ಕೂದಲು ಉದುರುವಿಕೆ ಇಂದು ಸರ್ವೇ ಸಾಮಾನ್ಯವಾಗಿ ಎಲ್ಲರಿಗೂ ಈ ಕುರಿತು ತಲೆ ಕೆಡಿಸಿಕೊಳ್ಳುವಂತೆ ಮಾಡಿದೆ. ಹೀಗಿರುವಾಗ ಈ ರೀತಿ ಒಂದು ಹೊಸ ತೈಲವನ್ನು ಹೊರ ತರುವುದರ ಮೂಲಕ ನಟಿ ಗೌತಮಿ ಜಾಧವ್ ಗ್ರಾಹಕರಿಗೆ, ತಮ್ಮ ಅಭಿಮಾನಿಗಳಿಗೆ ಜೊತೆಜೊತೆಗೆ ಸರ್ವೇಸಾಮಾನ್ಯರಿಗೆ ತಮ್ಮ ಕೂದಲನ್ನು ಸದೃಢಗೊಳಿಸಿಕೊಳ್ಳಲು ಒಂದೊಳ್ಳೆಯ ಅವಕಾಶವನ್ನು ನೀಡುತ್ತಿದ್ದಾರೆ ಎಂದು ಹೇಳಬಹುದು. ಸದ್ಯಕ್ಕೆ ಈ ತೈಲ ಲಾಂಚ್ ಆಗಿದ್ದು, ಇನ್ನು ಇದರ ಉಪಯೋಗಗಳು ಹಾಗೂ ನಿಜವಾದ ಪರಿಣಾಮವನ್ನು ಬಳಸಿ ಬಳಕೆದಾರರು ಹೇಳಬೇಕಿದೆ ಅಷ್ಟೇ.

'ಸತ್ಯ' ಧಾರಾವಾಹಿಯಲ್ಲಿ ಬ್ಯುಸಿ

ನಟನೆಯಲ್ಲಿ ಇನ್ನೂ ಆಕ್ಟೀವ್ ಆಗಿರುವ ನಟಿ ಗೌತಮಿ ಜಾಧವ್ ಸದ್ಯಕ್ಕೆ 'ಸತ್ಯ' ಧಾರಾವಾಹಿಯಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಮೊದಲು ಹಲವು ಧಾರಾವಾಹಿಗಳಲ್ಲಿ ಒಳ್ಳೊಳ್ಳೆಯ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು. ತಮ್ಮ ಅದ್ಭುತ ನಟನೆಯ ಮೂಲಕ ಬಹಳಷ್ಟು ಜನಪ್ರಿಯರಾಗಿದ್ದರು. ಇದೀಗ ಟಾಮ್ ಬಾಯ್ ಪಾತ್ರದ ಮೂಲಕ ಒಬ್ಬ ಸ್ಟ್ರಾಂಗ್ ಡೇರಿಂಗ್ ಬ್ರೇವ್ ಲೇಡಿ ಆಗಿ ಅಭಿಮಾನಿಗಳಿಗೆ ಪ್ರೇರಣೆಯಾಗಿದ್ದಾರೆ. ಈ ರೀತಿಯ ಪಾತ್ರಗಳು ಧಾರಾವಾಹಿಗಳಲ್ಲಿ ತೀರಾ ಕಮ್ಮಿ.

ಸ್ತ್ರೀ ಪ್ರಧಾನ ಕಥೆಗಳನ್ನೇ ಇಟ್ಟುಕೊಳ್ಳುವ ಧಾರವಾಹಿಗಳು ಸ್ತ್ರೀಯನ್ನು ಯಾವಾಗಲೂ ಬೇರೆ ಬೇರೆ ರೀತಿಯಲ್ಲಿ ತಾಳ್ಮೆ ಪ್ರೀತಿ ಸಹಿಷ್ಣುತೆ ಇತ್ಯಾದಿ ಅಂಶಗಳನ್ನು ಹೆಚ್ಚು ಮನದಲ್ಲಿಟ್ಟುಕೊಂಡು ಪ್ರದರ್ಶಿಸುತ್ತಾ ಹೋಗುತ್ತದೆಯೇ ಹೊರತು ಆಕೆಯ ಗಟ್ಟಿತನವನ್ನು ಎಷ್ಟೋ ಬಾರಿ ತೋರಿಸುವುದಿಲ್ಲ. ಅಂಥದರಲ್ಲಿ ಸತ್ಯ ಧಾರಾವಾಹಿ ಈ ಎಲ್ಲಾ ವಿಚಾರಗಳಿಂದ ವಿಭಿನ್ನವಾಗಿದ್ದು ಮಹಿಳಾ ಸಬಲೀಕರಣದತ್ತ ಮುಖ ಮಾಡಿದೆ. 'ಸತ್ಯ' ಧಾರಾವಾಹಿ ನಟಿ ಗೌತಮಿ ಜಾಧವ್‌ಗೆ ಬಹಳಷ್ಟು ಫೇಮನ್ನು ಕೊಟ್ಟಿದೆ ಎಂದರೆ ತಪ್ಪಾಗಲ್ಲ.