'ಅಗ್ನಿಸಾಕ್ಷಿ' ಸಿದ್ಧಾರ್ಥ್ (ವಿಜಯ್ ಸೂರ್ಯ) ಜೀವನದ ಬಗ್ಗೆ ನೀವು ಕೇಳರಿಯದ ಕಹಿ ಸತ್ಯಗಳು

'ಸೈಲೆಂಟ್ ಕಿಡ್' ಆಗಿದ್ದ ವಿಜಯ್ ಸೂರ್ಯ

ಚಿಕ್ಕವಯಸ್ಸಿನಲ್ಲಿ ನಟ ವಿಜಯ್ ಸೂರ್ಯ ಅಷ್ಟಾಗಿ ಯಾರೊಂದಿಗೂ ಮಾತನಾಡುತ್ತಿರಲಿಲ್ಲವಂತೆ. ಯಾಕಂದ್ರೆ, 'ನಾನು ನೋಡಲು ಚೆನ್ನಾಗಿಲ್ಲ' ಎಂಬ ಕೀಳರಿಮೆ ಅವರಿಗಿತ್ತಂತೆ.

ಉಬ್ಬು ಹಲ್ಲು, ದಪ್ಪ ಹೊಟ್ಟೆಯ ಕುಳ್ಳ.!

''ನನ್ನ ಪ್ರಕಾರ ನಾನು ನೋಡಲು ಚೆನ್ನಾಗಿರಲಿಲ್ಲ. ನನ್ನ ಹಲ್ಲುಗಳು ಸರಿಯಾಗಿ ಇರಲಿಲ್ಲ. ಉಬ್ಬು ಹಲ್ಲಿತ್ತು. ದಪ್ಪ ಹೊಟ್ಟೆ ಇತ್ತು. ಕುಳ್ಳಗೆ ಇದ್ದೆ. ಚಿಕ್ಕವಯಸ್ಸಿನಲ್ಲಿ ನನ್ನ ಹಲ್ಲು ನೋಡಿ ಮೊಲ ಅಂತ ನನ್ನನ್ನ ಕರೆಯುತ್ತಿದ್ದರು'' ಎಂದು 'ಸೂಪರ್ ಟಾಕ್ ಟೈಮ್' ಕಾರ್ಯಕ್ರಮದಲ್ಲಿ ವಿಜಯ್ ಸೂರ್ಯ ಹೇಳಿದ್ದಾರೆ.

'ಡ್ರಾಕುಲಾ' ತರಹ...

''ಹಲ್ಲಿನ ಸಮಸ್ಯೆ ಇದ್ದಿದ್ರಿಂದ ಕ್ಲಿಪ್ ಹಾಕಿಸಿಕೊಂಡೆ. ಡ್ರಾಕುಲಾ ತರಹ ನನ್ನ ಹಲ್ಲು ಮುಂದೆ ಬಂದಿತ್ತು. ತಂದೆ-ತಾಯಿ ಹತ್ತಿರ ಜಗಳ ಮಾಡಿ ಕ್ಲಿಪ್ ಹಾಕಿಸಿಕೊಂಡೆ'' - ವಿಜಯ್ ಸೂರ್ಯ, ನಟ

ತೊದಲುವ ಸಮಸ್ಯೆ ಇತ್ತು!

''ನನಗೆ ತೊದಲುವ ಸಮಸ್ಯೆ ಕೂಡ ಇತ್ತು. ಇಂಗ್ಲೀಷ್ ಮಾತನಾಡುವಾಗ ಅಷ್ಟು ತೊದಲುತ್ತಿರಲಿಲ್ಲ. ಆದ್ರೆ, ಕನ್ನಡ ಮಾತನಾಡುವಾಗ ತೊದಲುತ್ತಿದ್ದೆ. ಈಗ ಕಮ್ಮಿ ಆಗಿದೆ. ಇದಕ್ಕಾಗಿ ತುಂಬಾ ಕಷ್ಟ ಪಟ್ಟಿದ್ದೇನೆ. ಶ್ಲೋಕಗಳನ್ನ ಕಲಿತು ತೊದಲುವ ಸಮಸ್ಯೆಯಿಂದ ಹೊರಬಂದೆ'' - ವಿಜಯ್ ಸೂರ್ಯ, ನಟ

ಈ ತರಹ ಕಾಣೋಕೆ ಕಷ್ಟ ಪಟ್ಟಿದ್ದೇನೆ

''ಮುಂಚೆ ನಾನು ಈ ತರಹ ಇರಲೇ ಇಲ್ಲ. ಈ ತರಹ ಕಾಣೋಕೆ ತುಂಬಾ ಕಷ್ಟ ಪಟ್ಟಿದ್ದೇನೆ. ಎರಡು ವರ್ಷ ಹಲ್ಲಿನ ನೋವು ತಡೆದುಕೊಂಡೆ. ನಾನು ಹೀಗೆ ಕಾಣಲು ಕ್ರೇಜಿಯಾಗಿ ವರ್ಕೌಟ್ ಮಾಡಿದ್ದೇನೆ. ಕುಳ್ಳನಾಗಿದ್ದವನು ಉದ್ದ ಆದೆ'' - ವಿಜಯ್ ಸೂರ್ಯ, ನಟ

ನಂಬಿಕೆ ಇರಲಿಲ್ಲ

''ಚಿತ್ರರಂಗಕ್ಕೆ ಬರಬೇಕು ಅಂತ ತುಂಬಾ ಆಸೆ ಇತ್ತು. ಹೀಗಾಗಿ ತುಂಬಾ ವರ್ಕೌಟ್ ಮಾಡಿದೆ. ಬಾಂಬೆಯಲ್ಲಿ ಸುಭಾಷ್ ಘಾಯ್ ಸ್ಕೂಲ್ ನಲ್ಲಿ ಡೈರೆಕ್ಷನ್ ಕೋರ್ಸ್ ಮಾಡಿದೆ. ನಾನು ನಟ ಆಗುತ್ತೇನೆ ಎಂಬ ನಂಬಿಕೆ ನನಗೆ ಖಂಡಿತ ಇರಲಿಲ್ಲ. ಆದ್ರೆ ತಂದೆ-ತಾಯಿ ಧೈರ್ಯ ತುಂಬಿದರು'' - ವಿಜಯ್ ಸೂರ್ಯ, ನಟ

ಮಾಡೆಲ್ ಆದ ವಿಜಯ್ ಸೂರ್ಯ

ಚಿತ್ರರಂಗಕ್ಕೆ ಬರುವ ಮುನ್ನ ಮಾಡೆಲ್ ಆಗಿದ್ದ ವಿಜಯ್ ಸೂರ್ಯ, ಬೆಂಗಳೂರು ಮೆಗಾ ಮಾಡೆಲ್ ಹಂಟ್ - 2011 ನ ವಿಜೇತ ಕೂಡ ಹೌದು.

ತಾಯಿ ಬೆನ್ನೆಲುಬು

ಕೀಳರಿಮೆ, ದೌರ್ಬಲ್ಯಗಳಿಂದ ಮುಕ್ತಿ ಪಡೆಯಲು ನಟ ವಿಜಯ್ ಸೂರ್ಯ ಗೆ ಬೆನ್ನೆಲುಬಾಗಿ ನಿಂತವರು ಅವರ ತಾಯಿ. ಪ್ರತಿಯೊಂದು ವಿಷಯದಲ್ಲಿಯೂ ಧೈರ್ಯ ತುಂಬಿ, ಪ್ರೋತ್ಸಾಹಿ ನೀಡಿ ಇಂದು ಕರ್ನಾಟಕದ ನೆಚ್ಚಿನ 'ಸಿದ್ದಾರ್ಥ್' ಆಗಿ ಬೆಳೆಯಲು ವಿಜಯ್ ಸೂರ್ಯ ತಾಯಿಯ ಪಾತ್ರ ಮಹತ್ವದ್ದು.