ನಿಜಜೀವನದಲ್ಲೂ ಅವಮಾನ ಎದುರಿಸಿದ 'ಬ್ರಹ್ಮಗಂಟು' ಗುಂಡಮ್ಮನ ಕಣ್ಣೀರ ಕಥೆ

'ಬ್ರಹ್ಮಗಂಟು' ಧಾರಾವಾಹಿಯ ನಾಯಕಿ ಗೀತಾ (ಗುಂಡಮ್ಮ) ರವರ ನಿಜನಾಮ ಗೀತಾ ಭಾರತಿ ಭಟ್. ಕಾರ್ಕಳದಲ್ಲಿ ಹುಟ್ಟಿದ ಗೀತಾ ಭಾರತಿ ಭಟ್ ಬೆಳೆದಿದ್ದೆಲ್ಲ ಬೆಂಗಳೂರಿನಲ್ಲಿ. ಸದ್ಯ ಧಾರಾವಾಹಿಯಲ್ಲಿ ನಟಿಸುತ್ತಿರುವ ಗೀತಾ ಭಾರತಿ ಭಟ್ ಗಾಯಕಿ ಕೂಡ ಹೌದು.

'ಬ್ರಹ್ಮಗಂಟು' ಧಾರಾವಾಹಿಯಿಂದ ಕರ್ನಾಟಕದ ಮೂಲೆಮೂಲೆಯಲ್ಲಿಯೂ ಗುಂಡಮ್ಮ ಅಂತಲೇ ನಟಿ ಗೀತಾ ಜನಪ್ರಿಯತೆ ಗಳಿಸಿದ್ದಾರೆ. ಆದ್ರೆ, ಈ ಧಾರಾವಾಹಿ ಬರುವ ಮುನ್ನ ಯಾರಾದರೂ ಅವರನ್ನ ಗುಂಡಮ್ಮ ಅಂತ ಕರೆದರೆ 'ಯಾಕೆ ಹೀಗೆ ಕರೆಯುತ್ತಾರೋ?' ಅಂತ ಬೇಸರ ಮಾಡಿಕೊಳ್ತಿದ್ರಂತೆ. ಆದ್ರೀಗ, ಧಾರಾವಾಹಿಯಿಂದ 'ಗುಂಡಮ್ಮ' ಅಂತ ಕರೆದರೆ ಖುಷಿ ಪಡ್ತಾರಂತೆ ನಟಿ ಗೀತಾ ಭಾರತಿ ಭಟ್.

''ಚಿಕ್ಕವಯಸ್ಸಿನಲ್ಲಿ ನನ್ನನ್ನ ಗುಂಡುಮಣಿ ಅಂತ ಕರೆಯುತ್ತಿದ್ದರು. ಆಗ ನನಗೆ ಅದು ತುಂಬಾ ಕಿರಿಕಿರಿ ಆಗುತ್ತಿತ್ತು. ಈಗ 'ಬ್ರಹ್ಮಗಂಟು' ಧಾರಾವಾಹಿಯಿಂದ ಜನ ನನ್ನ ಗುಂಡಮ್ಮ ಅಂತ ಕರೆದಾಗ ಖುಷಿ ಆಗುತ್ತೆ'' ಅಂತ 'ಕುಟುಂಬದ ಕುಟುಂಬ' ಸಂಚಿಕೆಯಲ್ಲಿ ಗೀತಾ ಭಾರತಿ ಭಟ್ ಹೇಳಿದ್ದಾರೆ.

ಇಂದು 'ಬ್ರಹ್ಮಗಂಟು' ಧಾರಾವಾಹಿಯಿಂದ ಗೀತಾರನ್ನ ಕರ್ನಾಟಕದ ಜನತೆ ಇಷ್ಟ ಪಡುತ್ತಿದ್ದಾರೆ. ಆದ್ರೆ, ಕೆಲವೇ ಕೆಲವು ವರ್ಷಗಳ ಹಿಂದೆ ಇದೇ ಗೀತಾ ರನ್ನ ಯಾರೂ ಹತ್ತಿರ ಸೇರಿಸುತ್ತಿರಲಿಲ್ಲವಂತೆ. ಫ್ರೆಂಡ್ಸ್ ಆಗಲು ಇಷ್ಟ ಪಡುತ್ತಿರಲಿಲ್ಲವಂತೆ.

''ನಾನು ದಪ್ಪ ಇದ್ದೀನಿ ಅನ್ನೋ ಒಂದು ಕಾರಣಕ್ಕೆ ನನ್ನನ್ನ ದೂರ ಇಡುತ್ತಿದ್ದರು. ಆಗ ನಾನು ಇಷ್ಟೊಂದು ಸೋಷಿಯಲ್ ಆಗಿ ಇರುತ್ತಿರಲಿಲ್ಲ. ಸೋಷಿಯಲ್ ಆಗಿ ಇರಲು ಶುರು ಮಾಡಿದ್ದು ನನ್ನ ಮೇಲೆ ನಾನು ಜೋಕ್ ಮಾಡಿಕೊಳ್ಳಲು ಕಲಿತಾಗ...'' ಅಂತಾರೆ ಗೀತಾ ಭಾರತಿ ಭಟ್.

''ಮುಂಚೆ ಬೇರೆಯವರು ನನ್ನನ್ನ ಆಡಿಕೊಂಡು ನಕ್ಕಾಗ, ಬೇಜಾರು ಮಾಡಿಕೊಂಡು ಮೂಲೆಯಲ್ಲಿ ಕೂತು ಅಳುತ್ತಿದ್ದೆ. ನೀನು ಸಣ್ಣ ಆಗಬೇಕು ಅಂತ ಮನೆಯಲ್ಲೂ ಹೇಳುತ್ತಿದ್ದರು. ಎಲ್ಲ ಕಡೆಯಿಂದಲೂ ಪ್ರೆಶರ್ ಬೀಳುತ್ತಿದ್ದಾಗ ಬೇಸರ ಆಗುತ್ತಿತ್ತು. ಕಾಲೇಜಿಗೆ ಬಂದಾಗ ನನಗೆ ಅನಿಸಿದ್ದು ಏನು ಅಂದ್ರೆ ನಮ್ಮ ಮೇಲೆ ನಾವೇ ಜೋಕ್ ಮಾಡಿಕೊಂಡು ನಕ್ಕರೆ, ಬೇರೆಯವರು ಆಡಿಕೊಳ್ಳುವ ಧೈರ್ಯ ಮಾಡಲ್ಲ ಅಂತ. ಬೇರೆಯವರು ನನ್ನ ಮೇಲೆ ಜೋಕ್ ಮಾಡಿ ನಗುವುದಕ್ಕಿಂತ ಮುಂಚೆ ನನ್ನ ಮೇಲೆ ನಾನೇ ನಕ್ಕು ಬಿಡ್ತಿದ್ದೆ'' - ಗೀತಾ ಭಾರತಿ ಭಟ್, ನಟಿ

''ಚಿಕ್ಕವಯಸ್ಸಿನಲ್ಲಿ ನಾನು ಬಾಸ್ಕೆಟ್ ಬಾಲ್ ಆಡುತ್ತಿದ್ದೆ. ಬಾಸ್ಕೆಟ್ ಬಾಲ್ ಆಡುವಾಗ ಕಾಲು ಜಾರಿ ಬಿದ್ದೆ. ನಂತರ ಡಾಕ್ಟರ್ ಹತ್ತಿರ ಹೋದಾಗ ಆಪರೇಷನ್ ಮಾಡಬೇಕು ಎಂದರು. ನಾಲ್ಕು ತಿಂಗಳು ಬೆಡ್ ರೆಸ್ಟ್ ನಲ್ಲಿದ್ದೆ. ಅಲ್ಲಿಂದ ನಾನು ದಪ್ಪ ಆಗಲು ಶುರು ಆಗಿದ್ದು. ಮುಂಚೆಯಿಂದಲೂ ನಾನು ಗುಂಡುಗುಂಡಾಗಿ ಇದ್ದೆ. ಆದ್ರೆ, ಈ ಘಟನೆಯ ನಂತರ ನನ್ನ ತೂಕ ಹೆಚ್ಚಾಗಲು ಶುರು ಆಯ್ತು'' - ಗೀತಾ ಭಾರತಿ ಭಟ್, ನಟಿ

''ನಾನು ನಟಿಯಾಗುತ್ತೇನೆ ಅಂತ ಯಾವತ್ತೂ ಅಂದುಕೊಂಡಿರಲಿಲ್ಲ. ಟಿವಿಯಲ್ಲಿ ನನ್ನನ್ನ ನೋಡಿದಾಗ ಎಷ್ಟು ಜನ ನನ್ನನ್ನ ಆಡಿಕೊಂಡು ನಗ್ತಾರೋ ಅಂತ ಭಯ ಇತ್ತು. ಆದ್ರೆ, ಧಾರಾವಾಹಿ ನೋಡಿದ್ಮೇಲೆ ಜನರಿಂದ ಬಂದ ಪ್ರತಿಕ್ರಿಯೆ ಕೇಳಿ ತುಂಬಾ ಖುಷಿ ಆಯ್ತು'' - ಗೀತಾ ಭಾರತಿ ಭಟ್, ನಟಿ

''ನಮ್ಮನ್ನ ನಾವು ಪ್ರೀತಿಸಿದರೆ, ಬೇರೆಯವರು ನಮ್ಮನ್ನ ಪ್ರೀತಿಸುತ್ತಾರೆ. ನಮ್ಮ ಜೀವನವನ್ನ ನಾವು ಪ್ರೀತಿಸಬೇಕು. ಆಗ ಎಲ್ಲವೂ ಪಾಸಿಟಿವ್ ಆಗಿ ಕಾಣಲು ಶುರು ಆಗುತ್ತೆ. ರೇಗಿಸುವವರನ್ನ ಕೇರ್ ಮಾಡಬಾರದು'' - ಗೀತಾ ಭಾರತಿ ಭಟ್, ನಟಿ

ಅಂದ್ಹಾಗೆ, 'ಜೀ ಕುಟುಂಬ ಅವಾರ್ಡ್ಸ್'ನಲ್ಲಿ ಗೀತಾ ನಾಮ ನಿರ್ದೇಶನಗೊಂಡಿದ್ದಾರೆ. ನಿಮಗೆ ಗೀತಾ ನಟನೆ ಇಷ್ಟವಾಗಿದ್ದರೆ, ಎಸ್.ಎಂ.ಎಸ್ ಕುಳುಹಿಸಿ, ವೋಟ್ ಮಾಡಿ, ಗೆಲ್ಲಿಸಿ...