ಜೇನುಗೂಡು: ಸಂಬಂಧಗಳ ಸಂಭ್ರಮದ ಮೆರವಣಿಗೆ ʻಜೇನುಗೂಡಿʼಗೆ 50 ನೇ ಸಂಚಿಕೆ!

'ಜೇನುಗೂಡು' ಧಾರಾವಾಹಿಯ ಪ್ರಿಮಿಯರ್ ಶೋ

ಅಂದು ಫೆಬ್ರವರಿ 21. 'ಜೇನುಗೂಡು' ಧಾರಾವಾಹಿಯ ಪ್ರಿಮಿಯರ್ ಶೋ ಅರೆಂಜ್ ಮಾಡಲಾಗಿತ್ತು. ಸಿನಿಮಾವಾದರೆ ಎರಡೂವರೆ ಗಂಟೆ ತೋರಿಸಿ ಅಭಿಪ್ರಾಯ ತಿಳಿಯಬಹುದಾಗಿತ್ತು. ಆದರೆ ಧಾರಾವಾಹಿಯನ್ನು ಹೇಗೆ ತೋರಿಸುತ್ತಾರೆ ಎಂಬ ಅನುಮಾನವೂ ಎಲ್ಲರಲ್ಲೂ ಇತ್ತು. ಕ್ಯೂರಿಯಾಸಿಟಿ ಇದ್ದವರೆಲ್ಲಾ 'ಜೇನುಗೂಡು' ಪ್ರಿಮಿಯರ್ ಶೋಗೂ ಹೋಗಿದ್ದರು. ಅವರ ನಿರೀಕ್ಷೆ ಮೀರಿ ಅಲ್ಲಿನ ಚಿತ್ರಣಗಳು ಕಂಡಿದ್ದವು. 'ಜೇನುಗೂಡು ಸೀರಿಯಲ್ ಝಲಕ್ ನೋಡಿ ಮೆಚ್ಚಿಕೊಂಡು ಹೊರಗೆ ಬಂದವರೆ ಹೆಚ್ಚಾಗಿದ್ದರು. ಅದ್ಭುತವಾಗಿ ಅಂದು ಜೇನುಗೂಡಿನ ಅನಾವರಣವಾಗಿತ್ತು.

'ಜೇನುಗೂಡು' ಧಾರಾವಾಹಿಗೆ ಪ್ರೇಕ್ಷಕರ ಫಿದಾ

ಕೆಲವೊಂದು ಧಾರಾವಾಹಿಗಳು ಮೊದ ಮೊದಲಿಗೆ ಸೆಳೆಯುವುದು ಕಷ್ಟ. ಇನ್ನು ಕೆಲವೊಂದು ಧಾರಾವಾಹಿಗಳು ಆರಂಭದಲ್ಲಿ ಸೆಳೆದರೂ ಆಮೇಲೆ ನೋಡಿಸಿಕೊಳ್ಳುವುದಿಲ್ಲ. ಆಸಕ್ತಿ ಕಳೆದುಕೊಂಡು ಬಿಡುತ್ತವೆ. ಆದರೆ 'ಜೇನುಗೂಡು' ಆರಂಭವಾದಾಗಿನಿಂದ ಪ್ರೇಕ್ಷಕರನ್ನು ಹೆಚ್ಚಿಸಿಕೊಂಡೆ ಬರುತ್ತಿದೆ. 50 ಎಪಿಸೋಡ್‌ಗಳನ್ನು ಪೂರೈಸಿದೆಯಾ ಎಂಬ ಆಶ್ಚರ್ಯ ನೋಡುಗರ ಮನದಲ್ಲೂ ಕಾಡುತ್ತಿದೆ. ಅಷ್ಟು ಅಚ್ಚುಕಟ್ಟಾಗಿ ಕಥೆಯನ್ನು ಎಲ್ಲಿಯೂ ಬೋರ್ ಹೊಡೆಸದೆ, ಹೆಣೆದುಕೊಂಡು ಬಂದಿದ್ದಾರೆ ನಿರ್ದೇಶಕ ಅನಿಲ್ ಕೋರಮಂಗಲ.

50 ಸಂಚಿಕೆ ಪೂರೈಸಿದ ಧಾರಾವಾಹಿಯಲ್ಲಿ ಏನೆಲ್ಲಾ ಇದೆ?

ಸದ್ಯ ಸ್ಟಾರ್ ಸುವರ್ಣದ 'ಜೇನುಗೂಡು 50 ಸಂಚಿಕೆಯನ್ನು ಪೂರೈಸಿದೆ. ಈ ಐವತ್ತು ದಿನದಲ್ಲಿ ಒಂದು ದಿನವೂ ನಕ್ಕಿಲ್ಲ ಎಂಬುದಿಲ್ಲ. ಅದರಲ್ಲೂ ನಡುಕೋಟೆ ಕುಟುಂಬವನ್ನು ನೋಡುತ್ತಿದ್ದರೆ ಎಲ್ಲರ ಮನಸ್ಸಿಗೂ ಖುಷಿ. ಆ ಕುಟುಂಬದಲ್ಲಿ ಎಲ್ಲವೂ ಇದೆ. ಪ್ರತಿಯೊಬ್ಬರು ಕಲಿಯಬೇಕಾದ ಪಾಠವಿದೆ. ಅತ್ತೆ ಸೊಸೆಯನ್ನು ಹೇಗೆ ಸ್ವೀಕರಿಸಬೇಕು, ತುಂಬು ಕುಟುಂಬಕ್ಕೆ ಬಂದ ಸೊಸೆ ಜವಾಬ್ದಾರಿ ಏನು? ಮನೆಯ ಹಿರಿಯ ಮನುಷ್ಯ ಸಂಸಾರ ನಿಭಾಯಿಸಲು ಏನು ಮಾಡಬೇಕು? ಕುಟುಂಬ ಸಮೇತ ಮನೆಯಲ್ಲಿದ್ದಾಗ ಹೇಗೆಲ್ಲಾ ಸಂತೋಷವಾಗಿರಬಹುದು? ಮೊಬೈಲ್ ಯುಗದಲ್ಲಿ ಅದನ್ನೂ ಮೀರಿದ ಸಂತೋಷವನ್ನು ಹೇಗೆಲ್ಲಾ ಕಂಡು ಹಿಡಿದುಕೊಳ್ಳಬಹುದು? ಅಬ್ಬಬ್ಬಾ ಒಂದಾ ಎರಡಾ? ಸಾಕಷ್ಟು ಒಳ್ಳೆಯದ್ದನ್ನೇ 'ಜೇನುಗೂಡು' ನೀಡಿದೆ. ನಡುಕೋಟೆ ಕುಟುಂಬವನ್ನು ನೋಡಿದಾಗ ಕಂಡಿತಾ ಇಂಥದ್ದೊಂದು ಕುಟುಂಬ ಸಿಗಬಾರದಾ ಎಂದು ಬಯಸಿದವರು ಇದ್ದೇ ಇರುತ್ತಾರೆ.

ಡಾಕ್ಟರ್ ಪರಿಚಯ, ದಿಯಾ ಎಂಟ್ರಿ ಯಾವಾಗ?

ಸದ್ಯ ಇಡೀ ಧಾರಾವಾಹಿ ಸಖತ್ ಮನರಂಜನೆ ನೀಡುತ್ತಿರುವುದು ದಿಯಾ ಮತ್ತು ಶಶಾಂಕ್ ಮೇಲೆ. ಅವರಿಬ್ಬರ ಮದುವೆ ಬೇರೆ ಫಿಕ್ಸ್ ಆಗಿದೆ. ಹಾವು ಮುಂಗುಸಿಯಂತೆ ಯಾವಾಗಲೂ ಕಿತ್ತಾಡುತ್ತಿರುತ್ತಾರೆ. ಇದೇ ಪ್ರೇಕ್ಷಕರಿಗೆ ಮನರಂಜನೆ ನೀಡಿದೆ. ಮನೆ ಮಗಳು ಸುಮಿ ಕಷ್ಟದಲ್ಲಿದ್ದಾಗ ಸಹಾಯ ಮಾಡಿದ ಸಮಯದಿಂದ ಡಾಕ್ಟರ್ ನಡುಕೋಟೆ ಮನೆಗೆ ಹತ್ತಿರವಾಗಿ ಬಿಟ್ಟಿದ್ದಾರೆ. ಈಗ ಮಗಳನ್ನು ಸೊಸೆ ಮಾಡಲು ಹೊರಟಿದ್ದಾರೆ. ಸದ್ಯ ಆ ಸಂಭ್ರಮ ನೋಡಲು, ಮದುವೆ ಶಾಸ್ತ್ರಗಳನ್ನು ಎಂಜಾಯ್ ಮಾಡಲು 'ಜೇನುಗೂಡು' ಕುಟುಂಬದ ಜೊತೆಗೆ ಸ್ಟಾರ್ ಸುವರ್ಣ ಪ್ರೇಕ್ಷಕರ ಬಳಗ ಕೂಡ ಕಾಯುತ್ತಿದ್ದಾರೆ.