ವೈಲ್ಡ್ ಕಾರ್ಡ್ ಎಂಟ್ರಿಯಲ್ಲಿ 'ಬಿಗ್' ಮನೆಗೆ ಬಂದಿದ್ದು ಒಬ್ಬರಲ್ಲ, ಮೂವರು.!

ಮೇಘಶ್ರೀ ಮೆಗಾ ಎಂಟ್ರಿ

'ನಾಗಕನ್ನಿಕೆ' ಧಾರಾವಾಹಿಯಲ್ಲಿ ನಟಿಸುತ್ತಿದ್ದ ಮೇಘಶ್ರೀ ಬಿಗ್ ಬಾಸ್ ಮನೆಗೆ ವೈಲ್ಡ್ ಕಾರ್ಡ್ ಎಂಟ್ರಿ ಪಡೆದುಕೊಂಡಿದ್ದಾರೆ. ಕಿರುತೆರೆಯ ಜೊತೆ ಕನ್ನಡ ಹಾಗೂ ತೆಲುಗು ಸಿನಿಮಾರಂಗದಲ್ಲಿ ಮೇಘಶ್ರೀ ಗುರುತಿಸಿಕೊಂಡಿದ್ದಾರೆ.

ಮೇಘಶ್ರೀ ಅಭಿನಯದ ಚಿತ್ರಗಳು

ತೀರ್ಥಹಳ್ಳಿಯ ಹುಡುಗಿ ಮೇಘಶ್ರೀ ತೆಲುಗಿನಲ್ಲಿ 'ಪಂಚಮುಖಿ', 'ಖಾಕಿ', 'ಓ‌ ಮೈ ಗಾಡ್', 'ಅನಗನಗ ಒಕ ಚಿತ್ರಮು' ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕನ್ನಡದಲ್ಲಿ 'ಪಂಡಿತ್ ಭಾಗ್ಯ ವಿಧಾತ', ಕೋಡ್ಲು ರಾಮಕೃಷ್ಣ ನಿರ್ದೇಶನದ 'ಮಾರ್ಚ್ 22' ಹಾಗೂ ಸಂಚಾರಿ ವಿಜಯ್ ಅಭಿನಯದ 'ಕೃಷ್ಣ ತುಳಸಿ' ಚಿತ್ರದಲ್ಲಿ ಮೇಘ ನಟಿಸಿದ್ದಾರೆ. ವಿಜಯ ಸೂರ್ಯ ಜೊತೆಗೆ ನಾಯಕಿಯಾಗಿ ನಟಿಸಿರುವ 'ಕದ್ದುಮುಚ್ಚಿ' ಹಾಗೂ ಚಿರಂಜೀವಿ ಸರ್ಜ ಜೊತೆಗಿನ 'ಮಾರ್ತಾಂಡ' ಚಿತ್ರದ ಬಿಡುಗಡೆಯ ನಿರೀಕ್ಷೆಯಲ್ಲಿದ್ದಾರೆ. ಕ್ರೇಜಿಸ್ಟಾರ್ ವಿ.ರವಿಚಂದ್ರನ್ ಅವರ ಮಗಳಾಗಿ 'ದಶರಥ' ಸಿನಿಮಾದಲ್ಲಿ ನಟಿಸಿರುವ ಮೇಘಶ್ರೀ ಪ್ರಸ್ತುತ ದ್ವಿಭಾಷಾ ಚಿತ್ರವಾಗಿ ಮೂಡಿ‌ ಬರುತ್ತಿರುವ 'ಅಮೃತವರ್ಷಿಣಿ'ಯ ಚಿತ್ರೀಕರಣದಲ್ಲಿದ್ದರು.

ಮತ್ತೆ ಬಂದ ನಿವೇದಿತಾ ಗೌಡ

ಬಿಗ್ ಬಾಸ್ ಕನ್ನಡ 5ನೇ ಆವೃತ್ತಿ ಸ್ಪರ್ಧಿಯಾಗಿದ್ದ ಗೊಂಬೆ ಖ್ಯಾತಿಯ ನಿವೇದಿತಾ ಗೌಡ ಆರನೇ ಆವೃತ್ತಿಯಲ್ಲಿ ಮತ್ತೆ ಮನೆಗೆ ಎಂಟ್ರಿ ಕೊಟ್ಟಿದ್ದಾರೆ. ವೈಲ್ಡ್ ಕಾರ್ಡ್ ಎಂಟ್ರಿಯಲ್ಲಿ ಸರ್ಪ್ರೈಸ್ ಎಂಬಂತೆ ಮೇಘಶ್ರೀ ಜೊತೆ ನಿವೇದಿತಾನೂ ಗೃಹಪ್ರವೇಶ ಮಾಡಿದ್ದಾರೆ.

ಬಿಂದಾಸ್ ಜೀವಿತಾ

ಮೇಘಶ್ರೀ ಮತ್ತು ನಿವೇದಿತಾ ಗೌಡ ಜೊತೆ ಜೀವಿತಾ ಎಂಬ ಮತ್ತೋರ್ವ ಸ್ಪರ್ಧಿಯೂ ವೈಲ್ಡ್ ಕಾರ್ಡ್ ಎಂಟ್ರಿಯಾಗಿದ್ದಾರೆ. ವೃತ್ತಿಯಲ್ಲಿ ಮಾಡೆಲ್ ಮತ್ತು ಡ್ಯಾನ್ಸರ್ ಆಗಿರುವ ಜೀವಿತಾ ಕೆಲವು ಧಾರಾವಾಹಿಯಲ್ಲೂ ನಟಿಸಿದ್ದಾರಂತೆ.

ಸದಸ್ಯರ ಸಂಖ್ಯೆ ಹೆಚ್ಚಾಯಿತು

ಸದ್ಯ, ಹನ್ನೊಂದು ಜನ ಇದ್ದ ಬಿಗ್ ಮನೆಯಲ್ಲಿ ಈಗ ಮೂರು ಜನ ಹೊಸ ಸದಸ್ಯರು ಸೇರ್ಪಡೆಯಾಗಿದ್ದು, ಹದಿನಾಲ್ಕು ಜನ ಆಗಿದ್ದಾರೆ. ಇದರಿಂದ ಈಗಾಗಲೇ ಮನೆಯಲ್ಲಿದ್ದ ಸದಸ್ಯರಿಗೆ ಮೇಲ್ನೋಟಕ್ಕೆ ಖುಷಿ ಎನಿಸಿದರೂ, ಹೊಸದಾಗಿ ಬಂದಿರುವ ಮೂರು ಜನರು ತಮಗೆ ಪೈಪೋಟಿ ಆಗಲಿದ್ದಾರೆ ಎಂಬ ಆತಂಕದಲ್ಲಿದ್ದಾರೆ.