ನಟಿ ಸಂಜನಾ ಬುರ್ಲಿ ಫಿಟ್‌ನೆಸ್ ಗುಟ್ಟೇನು ಗೊತ್ತಾ..?

ಓದಿಕೊಂಡೇ ನಟಿಸುತ್ತಿದ್ದ ಚೆಲುವೆ

ಸಂಜನಾ ಬುರ್ಲಿ ಬೆಂಗಳೂರಿನಲ್ಲೇ ಓದಿ ಬೆಳೆದ ಚೆಲುವೆ. ಇವರ ತಂದೆ ಅಜಿತ್ ಬುರ್ಲಿ ಮತ್ತು ತಾಯಿ ಭಾರತಿ. ಎಂಜಿನಿಯರ್ ಆಗಿರುವ ಸಂಜನಾ ಬುರ್ಲಿ ಎಂಜಿನಿಯರ್ ಓದುವಾಗ ಶೂಟಿಂಗ್ ಹಾಗೂ ಕಾಲೇಜು ಎರಡನ್ನೂ ಬ್ಯಾಲೆನ್ಸ್ ಮಾಡುತ್ತಿದ್ದರು. ರ್ಯಾಂಕ್ ಸ್ಟುಡೆಂಟ್ ಆಗಿರುವ ಸಂಜನಾಗೆ ಓದುವುದು ದೊಡ್ಡ ಕನಸಾದರೆ, ನಟನೆ ಪ್ಯಾಷನ್ ಎಂದು ಸ್ವತಃ ಅವರೇ ಹೇಳಿಕೊಂಡಿದ್ದಾರೆ. ಎಂಜಿನಿಯರ್ ಓದಿ ಈಗ ನಟನೆಯನ್ನೇ ತಮ್ಮ ವೃತ್ತಿ ಬದುಕನ್ನಾಗಿ ಆರಿಸಿಕೊಂಡಿದ್ದಾರೆ.

ಸಿನಿಮಾಗಳಲ್ಲೂ ನಟಿಸಿರುವ ಸಂಜನಾ ಬುರ್ಲಿ

ಸಂಜನಾ ಅವರು 'ಪತ್ತೆದಾರಿ ಪ್ರತಿಭಾ' ಧಾರಾವಾಹಿ ಮೂಲಕ ಕಿರುತೆರೆಗೆ ಎಂಟ್ರಿಕೊಟ್ಟರು. ಬಳಿಕ 'ಲಗ್ನಪತ್ರಿಕೆ' ಧಾರಾವಾಹಿಯಲ್ಲಿ ನಟಿಸುತ್ತಿದ್ದರು. ಆದರೆ ಇದು ಅರ್ಧಕ್ಕೆ ನಿಂತು ಹೋಗಿದ್ದಕ್ಕೆ ಬೇಸರಗೊಂಡಿದ್ದರು. ಇನ್ನು ಸಂಜನಾ ಅವರು ಸಿನಿಮಾಗಳಲ್ಲೂ ನಟಿಸಿದ್ದು, 'ಸ್ನೇಹರ್ಷಿ' ಸಿನಿಮಾ ಮೂಲಕ ಚಂದನವನಕ್ಕೆ ಪಾದಾರ್ಪಣೆ ಮಾಡಿದ್ದಾರೆ. ಇನ್ನು 'ರಾಧ ಸರ್ಚಿಂಗ್ ರಮಣ ಮಿಸ್ಸಿಂಗ್' ಎಂಬ ಚಿತ್ರದಲ್ಲೂ ನಟಿಸಿದರು. ಬಳಿಕ ಎವರ್ ಗ್ರೀನ್ ಸ್ಟಾರ್ ಅನಂತ್ ನಾಗ್ ಅವರ ಜೊತೆಗೆ 'ವೀಕೆಂಡ್' ಎಂಬ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಇನ್ನು 'ನಾನ್ ವೆಜ್' ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿದ್ದಾರೆ.

ಶೂಟಿಂಗ್ ಸಮಯದಲ್ಲೂ ವ್ಯಾಯಾಮ

ನಟಿ ಸಂಜನಾ ಬುರ್ಲಿ ಅವರು ಮೊದಲು ಬ್ಯಾಡ್ಮಿಟನ್, ಈಜು ಹಾಗೂ ಕೆಲ ಆಟಗಳನ್ನು ಆಡುತ್ತಿದ್ದರಂತೆ. ಆದರೆ, ಈಗ ನಿತ್ಯ ಒಂದು ಗಂಟೆಯ ಕಾಲ ಜಿಮ್ ನಲ್ಲಿ ವ್ಯಾಯಾಮ ಮಾಡುತ್ತಾರೆ. ಫಿಟ್ನೆಸ್ ಬಗ್ಗೆ ಹೆಚ್ಚು ಗಮನ ಕೊಡುವ ಸಂಜನಾ ಅವರು ಹೆಚ್ಚು ವ್ಯಾಯಾಮ ಮಾಡದೆ, ಅವಶ್ಯಕತೆಗೆಷ್ಟು ಬೇಕೋ ಅಷ್ಟೇ ಮಾಡುವುದು ಒಳ್ಳೆಯದು ಎನ್ನುತ್ತಾರೆ. ಇನ್ನು ಬಿಡುವು ಸಿಕ್ಕರೆ ಶೂಟಿಂಗ್ ಮಾಡುವ ವೇಳೆಯಲ್ಲಿ ಸಮಯ ಸಿಕ್ಕರೆ, ಅಲ್ಲೂ ಕೂಡ ಸಂಜನಾ ಅವರು ಸಣ್ಣ-ಪುಟ್ಟ ವ್ಯಾಯಾಮವನ್ನು ಮಾಡುತ್ತಾರಂತೆ. ಆಗಾಗ ಟ್ರಕ್ಕಿಂಗ್ ಹೋಗುತ್ತಾರಂತೆ.

ಪ್ರೊಟೀನ್‌ಯುಕ್ತ ಆಹಾರ ಸೇವಿಸುವುದು ಉತ್ತಮ

ಸಸ್ಯಹಾರಿಯಾಗಿರುವ ಸಂಜನಾ ಅವರು ತಮ್ಮ ಫಿಟ್‌ನೆಸ್ ಕಾಪಾಡಲು ಮಿತ ಆಹಾರವನ್ನು ಸೇವಿಸುತ್ತಾರಂತೆ. ಹೊರಗಡೆ ಹೋದಾಗ, ಟ್ರಾವೆಲಿಂಗ್‌ನಲ್ಲಿದ್ದಾಗ ಕರಿದಿರುವ ಪದಾರ್ಥಗಳನ್ನು ಅವಾಯ್ಡ್ ಮಾಡುತ್ತಾರಂತೆ. ಮೈದಾ ಹಿಟ್ಟು ಹಾಗೂ ಸಿಹಿ ಪದಾರ್ಥಗಳನ್ನು ಆದಷ್ಟು ದೂರವಿಡುವ ಸಂಜನಾ ಅವರು ನಿತ್ಯ 7 ಗಂಟೆಗಳ ಕಾಲ ನಿದ್ದೆಯನ್ನು ಮಾಡುತ್ತಾರಂತೆ. ಇನ್ನು ಹೆಚ್ಚು ಪ್ರೊಟೀನ್ ಇರುವ ಆಹಾರವನ್ನು ಸೇವಿಸುವುದಾಗಿ ಸಂಜನಾ ಹೇಳಿದ್ದಾರೆ.