ಮುಖಪುಟ

ಸಿನಿ ಸಮಾಚಾರ

ಡಕೋಟ ಪಿಕ್ಚರ್

ಈಗ ಬಿಡುಗಡೆಯಾಗಿರುವ 'ಡಕೋಟ ಪಿಕ್ಚರ್' ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಏತನ್ಮಧ್ಯೆಯೇ ಮತ್ತೊಂದು ಡಕೋಟ ಚಿತ್ರಕ್ಕೆ ಓಂ ಮುಹೂರ್ತ ಮಾಡಿ ಮುಗಿಸಿದ್ದಾರೆ. ಈ ಬಾರಿ ತಮ್ಮ ಚಿತ್ರಕ್ಕೆ 'ಡಕೋಟ ಫ್ಯಾಮಿಲಿ' ಎಂದು ಹೆಸರಿಟ್ಟಿದ್ದಾರೆ.

ಕನ್ನಡ ಚಿತ್ರಗಳ 'ಧೀರ' ರಾಕ್ ಲೈನ್ ವೆಂಕಟೇಶ್ ಹಲವರೊಂದಿಗೆ ಕೈಜೋಡಿಸಿ ನಿರ್ಮಿಸುತ್ತಿರುವ ಚಿತ್ರವಿದು. ಚಿತ್ರ ನಿರ್ಮಾಣದ ಜೊತೆಗೆ ಈ ಬಾರಿಯೂ ಅವರು ಓಂ ಜೊತೆ ಬಣ್ಣ ಹಚ್ಚುತ್ತಿದ್ದಾರೆ. ಡಿ.ಮನೋಹರ್ ಕಥೆ ಬರೆದಿರುವ ಈ ಚಿತ್ರಕ್ಕೆ ಎನ್.ಓಂಪ್ರಕಾಶ್ ರಾವ್ ಚಿತ್ರಕಥೆ ಹೆಣೆದಿದ್ದಾರೆ.

ಈ ಸಲ ಓಂ ಪಕ್ಕಾ ಟೀಂ ರೆಡಿ ಮಾಡಿಕೊಂಡಿದ್ದಾರೆ. ಸಂಗೀತ ಹಾಗೂ ಸಾಹಿತ್ಯದ ಜವಾಬ್ದಾರಿಯನ್ನು ಹಂಸಲೇಖ ಅವರು ಹೊತ್ತಿದ್ದರೆ ಸಂಭಾಷಣೆ 'ಮಠ' ಖ್ಯಾತಿಯ ಗುರುಪ್ರಸಾದ್ ಹೆಗಲಿಗಿದೆ. ಚಿತ್ರಕ್ಕೆ ವಾಲಿ ಅವರ ಛಾಯಾಗ್ರಹಣವಿದೆ. ಎಸ್.ಮನೋಹರ್ ಸಂಕಲನ, ಪಳನಿರಾಜ್ ಸಾಹಸ ನಿರ್ದೇಶನ ಹಾಗೂ ಕೆ.ಕೆ.ರಾಜು ಕಲಾ ನಿರ್ದೇಶನ ಈ ಚಿತ್ರಕ್ಕಿದೆ.

ಈ ತಿಂಗಳ ಒಂಭತ್ತರಿಂದ ಚಿತ್ರಕ್ಕೆ ಬೆಂಗಳೂರಿನಲ್ಲಿ ಒಂದೇ ಹಂತದ ಚಿತ್ರೀಕರಣ ನಡೆಯಲಿದೆ. ಚಿತ್ರದ ಪಾತ್ರವರ್ಗದಲ್ಲಿ ಶ್ರೀನಿವಾಸಮೂರ್ತಿ, ತುಲಸಿ, ಸಾಧು ಕೋಕಿಲ, ಬುಲೆಟ್ ಪ್ರಕಾಶ್, ಶೋಭರಾಜ್, ಮೈಕೋ ನಾಗರಾಜ್ ಸೇರಿದಂತೆ ಇನ್ನಿತರರಿದ್ದಾರೆ. ಈಗಾಗಲೆ ಮೊದಲ ಹಂತದ ಚಿತ್ರೀಕರಣ ಮೈಸೂರಿನಲ್ಲಿ ಭರದಿಂದ ಸಾಗುತ್ತಿದೆ. (ಏಜೆನ್ಸೀಸ್)