'ಲಾಲ್‌ ಸಿಂಗ್ ಚಡ್ಡ' ಮೂರನೇ ದಿನ ಬಾಕ್ಸಾಫೀಸ್‌ನಲ್ಲಿ ಚೇತರಿಕೆ ಕಂಡರೂ ಸಾಕಾಗಲ್ಲ!

ಆಮಿರ್ ಸಿನಿಮಾ 3ನೇ ದಿನದ ಕಲೆಕ್ಷನ್ ಎಷ್ಟು?

ಆಮಿರ್ ಖಾನ್ 'ಲಾಲ್ ಸಿಂಗ್ ಚಡ್ಡ' ಈ ವರ್ಷ ಬಾಲಿವುಡ್‌ನ ಅತೀ ಹೆಚ್ಚು ಗಳಿಕೆ ಮಾಡುವ ಸಿನಿಮಾ ಮಾಡಬಹುದು ಅನ್ನೋ ನಿರೀಕ್ಷೆ ಹುಸಿಯಾಗಿದೆ. ಮೊದಲ ದಿನವೇ ಈ ಸಿನಿಮಾದ ಕಲೆಕ್ಷನ್ ಶಾಕ್ ಕೊಟ್ಟಿತ್ತು. ಅಂದ್ಹಾಗೆ ಮೊದಲ ಎರಡು ದಿನ ಬಾಕ್ಸಾಫೀಸ್‌ನಲ್ಲಿ ಹೇಳಿಕೊಳ್ಳುವಂತಹ ಮೋಡಿ ಮಾಡಿರಲಿಲ್ಲ. ಆದರೆ ಮೂರನೇ ದಿನ 'ಲಾಲ್ ಸಿಂಗ್ ಚಡ್ಡ' ಕಲೆಕ್ಷನ್‌ನಲ್ಲಿ ಕೊಂಚ ಏರಿಕೆ ಕಂಡಿದೆ. ಸುಮಾರು 8.74 ಕೋಟಿ ರೂ. ಕಲೆಕ್ಷನ್ ಮಾಡಿದ್ದು, ಎರಡನೇ ದಿನಕ್ಕೆ ಹೋಲಿಸಿದರೆ ಶೇ.20ರಷ್ಟು ಏರಿಕೆ ಆಗಿದೆ ಎನ್ನಲಾಗಿದೆ.

3 ದಿನಗಳ ಕಲೆಕ್ಷನ್ ಎಷ್ಟು?

'ಲಾಲ್‌ ಸಿಂಗ್ ಚಡ್ಡ' ಕೆಲಕ್ಷನ್ ಆಶಾದಾಯಕವಾಗಿಲ್ಲ. ಬಿಗ್ ಬಜೆಟ್ ಸಿನಿಮಾ ಮೊದಲ ಮೂರು ದಿನಗಳಲ್ಲಿ ನೂರು ಕೋಟಿ ಕ್ಲಬ್ ಸೇರಬೇಕಿತ್ತು. ಆದರೆ, 50 ಕೋಟಿ ರೂ. ಕ್ಲಬ್ ಅನ್ನೂ ಸೇರಿಲ್ಲ. 'ಲಾಲ್ ಸಿಂಗ್ ಚಡ್ಡ' ಮೊದಲ ದಿನ ಗಳಿಸಿದ ಗಳಿಕೆ ಹೀಗಿದೆ.
ಮೊದಲ ದಿನ 11.70 ಕೋಟಿ ರೂ.
ಎರಡನೇ ದಿನ 07.26 ಕೋಟಿ ರೂ.
ಮೂರನೇ ದಿನ 08.74 ಕೋಟಿ ರೂ.

ಒಟ್ಟು 27.70 ಕೋಟಿ ರೂ.

ಪಂಜಾಬ್‌ನಲ್ಲಿ ಸೂಪರ್ ರೆಸ್ಪಾನ್ಸ್

ಆಮಿರ್ ಖಾನ್ ಸಿನಿಮಾ 'ಲಾಲ್ ಸಿಂಗ್ ಚಡ್ಡ' ಪಂಜಾಬ್‌ನಲ್ಲಿ ಸಖತ್ ರೆಸ್ಪಾನ್ಸ್ ಸಿಗುತ್ತಿದೆ. ದೆಹಲಿ, ಉತ್ತರ ಪ್ರದೇಶ ಹಾಗೂ ಪಂಜಾಬ್‌ನಲ್ಲಿ ಶನಿವಾರ (ಆಗಸ್ಟ್ 13) ಶೇ. 40ರಷ್ಟು ಏರಿಕೆಯಾಗಿದೆ. ಆದರೆ, ಭಾರತದ ಮೇಜರ್ ಸಿಟಿಗಳಲ್ಲಿ ಈ ಸಿನಿಮಾಗೆ ಉಲ್ಟಾ ರೆಸ್ಪಾನ್ಸ್ ಸಿಕ್ಕಿದೆ. ಮಹಾರಾಷ್ಟ್ರ ಹಾಗೂ ಗುಜರಾತ್ ಅಂತಹ ಏರಿಯಾಗಳಲ್ಲಿ ಸಿನಿಮಾಗೆ ಉತ್ತಮ ಗಳಿಕೆ ಕಾಣುತ್ತಿಲ್ಲ. ಹೀಗಾಗಿ ಈ ಎಲ್ಲಾ ಏರಿಯಾಗಳಲ್ಲಿ ಸಿನಿಮಾ ಎದ್ದು ನಿಲ್ಲಬೇಕಿದೆ. ಟ್ರೇಡ್ ಅನಲಿಸ್ಟ್‌ಗಳ ಪ್ರಕಾರ, ಲಾಲ್‌ ಸಿಂಗ್ ಚಡ್ಡ 5 ದಿನಗಳಲ್ಲಿ 50 ಕೋಟಿ ರೂ. ಗಳಿಕೆ ಮಾಡಬಹುದು ಎನ್ನಲಾಗಿದೆ.

ವಿವಾದಗಳೇ ವಿಲನ್

'ಲಾಲ್ ಸಿಂಗ್ ಚಡ್ಡ' ಬಿಡುಗಡೆಗೆ ಕೆಲವೇ ದಿನಗಳು ಕೆಲವು ಜನರು ಸೋಶಿಯಲ್ ಮೀಡಿಯಾದಲ್ಲಿ ಬಾಯ್‌ಕಾಟ್ ಸೋಶಿಯಲ್ ಮೀಡಿಯಾ ಆರಂಭಿಸಿದ್ದರು. ಅಲ್ಲದೆ ಧಾರ್ಮಿಕ ಭಾವನೆಗಳಿಗೆ ನೋವುಂಟು ಮಾಡಿದ್ದು ಹಾಗೂ ಭಾರತೀಯ ಸೇನೆಯನ್ನು ಕೆಟ್ಟದಾಗಿ ತೋರಿಸಿದ್ದಾರೆ ಎನ್ನುವ ಆರೋಪ ಈ ಸಿನಿಮಾ ಮೇಲಿದೆ. ಈ ಕಾರಣಕ್ಕೆ ಸೋಶಿಯಲ್ ಮೀಡಿಯಾದಲ್ಲಿ ಸಿನಿಮಾ ನೋಡದೆ ಇರಲು ಕೆಲವು ವರ್ಗ ನಿರ್ಧರಿಸಿತ್ತು.