65 ವರ್ಷ ದಾಟಿದ ನಟರು ಸಿನಿಮಾದಲ್ಲಿ ನಟಿಸುವಂತಿಲ್ಲ: ಸರ್ಕಾರದ ನಿಯಮ ಪ್ರಶ್ನಿಸಿದ ಹೈಕೋರ್ಟ್

ನಟ ಪ್ರಮೋದ್ ಪಾಂಡೆ ಅರ್ಜಿ

ಸರ್ಕಾರದ ಆದೇಶದ ಪ್ರಕಾರ 65 ವರ್ಷ ಮತ್ತು ಅದಕ್ಕೂ ಮೇಲ್ಪಟ್ಟವರು ಮತ್ತು 10 ವರ್ಷ ಕೆಳಗಿನವರನ್ನು ಬಳಸಿಕೊಳ್ಳುವಂತಿಲ್ಲ. ಕೊರೊನಾ ವೈರಸ್ ಸೋಂಕು ಈ ವಯಸ್ಸಿನವರಿಗೆ ಅಪಾಯಕಾರಿಯಾದ ಕಾರಣ ಈ ನಿರ್ಬಂಧ ವಿಧಿಸಲಾಗಿದೆ. ಆದರೆ ಸಿನಿಮಾ ಚಿತ್ರೀಕರಣವಿಲ್ಲದೆ ಹಿರಿಯ ನಟರು ಹಾಗೂ ಇತರೆ ಸಿಬ್ಬಂದಿ ಕೆಲವು ತಿಂಗಳಿನಿಂದ ಕೆಲಸವಿಲ್ಲದೆ ತೀವ್ರ ಸಂಕಷ್ಟದಲ್ಲಿದ್ದಾರೆ. ಈಗಲೂ ಅವರಿಗೆ ಅವಕಾಶ ನೀಡದೆ ಇರುವುದು ಸರಿಯಲ್ಲ ಎಂದು ಪ್ರಮೋದ್ ಪಾಂಡೆ ಆಕ್ಷೇಪಿಸಿದ್ದಾರೆ.

ನಿಯಮದ ಹಿಂದಿನ ಆಧಾರವೇನು?

ಇದನ್ನು ಪರಿಗಣಿಸಿರುವ ಹೈಕೋರ್ಟ್, ಶುಕ್ರವಾರದ ವೇಳೆಗೆ ಪ್ರತಿಕ್ರಿಯೆ ನೀಡುವಂತೆ ಸರ್ಕಾರಕ್ಕೆ ಸೂಚಿಸಿದೆ. ಹಿರಿಯ ನಟರು ಮತ್ತು ತಂತ್ರಜ್ಞರಿಗೆ ಕೆಲಸ ಮಾಡಲು ಅವಕಾಶ ನೀಡದೆ ಇದ್ದರೆ ಅವರು ಹೇಗೆ ತಾನೆ ಸಂಪಾದಿಸಲು ಮತ್ತು ಗೌರವಾನ್ವಿತವಾಗಿ ಬದುಕಲು ಸಾಧ್ಯ ಎಂಬುದನ್ನು ವಿವರಿಸುವಂತೆ ಆದೇಶಿಸಿದೆ. ಹಾಗೆಯೇ, ಈ ಆದೇಶ ನೀಡಲು ಯಾವ ಅಂಕಿಅಂಶಗಳನ್ನು ಪರಿಗಣಿಸಲಾಗಿದೆ ಎಂಬ ಮಾಹಿತಿಯನ್ನೂ ಕೇಳಿದೆ.

ನಮ್ಮಂಥಹವರು ಸಾಯಬೇಕೇ?

ತಮ್ಮಂತಹ ನಟನರಿಗೆ ಪ್ರಸ್ತುತ ಯಾವುದೇ ಕೆಲಸವಿಲ್ಲದಂತಾಗಿದೆ ಎಂದು ಪ್ರಮೋದ್ ಪಾಂಡೆ ಹೇಳಿದ್ದಾರೆ. 'ನನ್ನ ಸಂಪೂರ್ಣ ಜೀವನ ಕಷ್ಟಪಟ್ಟಿದ್ದೇನೆ. ಸಿನಿಮಾಗಳಿದ್ದಾಗ ತಿಂಗಳಿಗೆ ಸುಮಾರು 40 ಸಾವಿರ ಸಂಪಾದಿಸುತ್ತಿದ್ದೆ. ಆದರೆ ಈಗ ಕೆಲಸವಿಲ್ಲ. ಜತೆಗೆ ಈಗ ಆಡಿಷನ್‌ಗೆ ಕರೆಗಳೂ ಕೂಡ ಬರುತ್ತಿಲ್ಲ. ಚಿತ್ರೀಕರಣದಲ್ಲಿ ಚಿಕ್ಕ ಮಕ್ಕಳು ಇರುವಂತಿಲ್ಲ ಎಂಬ ನಿಯಮ ಅರ್ಥವಾಗುತ್ತದೆ. ಅವರನ್ನು ನೋಡಿಕೊಳ್ಳಲು ಅವರ ಪೋಷಕರು ಇರುತ್ತಾರೆ. ಆದರೆ 65 ವರ್ಷ ಮೇಲ್ಪಟ್ಟ ನಟರು ಮತ್ತು ಸಿಬ್ಬಂದಿ ಏನು ಮಾಡುವುದು? ಕೆಲಸವಿಲ್ಲದೆ ಸಾಯುತ್ತಾರೆ' ಎಂದು ಹೇಳಿದ್ದಾರೆ.

ವಿಡಿಯೋ ಆಯ್ಕೆಗೆ ಆಕ್ಷೇಪ

ವಿಡಿಯೋ ಆಪ್‌ಗಳ ಮೂಲಕವೇ ಸಿನಿಮಾಗಳಿಗೆ ಕಲಾವಿದರನ್ನು ಆಯ್ಕೆ ಮಾಡಿಕೊಳ್ಳಬೇಕು ಎಂಬ ಮಹಾರಾಷ್ಟ್ರ ಸರ್ಕಾರದ ನಿಯಮವನ್ನು ಕೂಡ ಕೋರ್ಟ್ ಪ್ರಶ್ನಿಸಿದೆ. ಯಾವುದೇ ನಿರ್ದೇಶಕರು ಅಥವಾ ನಿರ್ಮಾಪಕರು ಸಣ್ಣ ಪುಟ್ಟ ಪಾತ್ರಗಳಿಗೆ ಈ ರೀತಿ ಆಯ್ಕೆ ಮಾಡಲು ಒಪ್ಪುವುದಿಲ್ಲ. ಹೀಗಾಗಿ ಅವರು ಸ್ಟುಡಿಯೋಗಳಿಗೆ ಹೋಗದೆ ಬೇರೆ ಆಯ್ಕೆಯಿಲ್ಲ ಎಂದು ಕೋರ್ಟ್ ಹೇಳಿದೆ.