ಸುಶಾಂತ್ ಸಿಂಗ್ ರಜಪೂತ್ ಕೊನೆಯದಾಗಿ ನಟಿಸಿದ್ದು ಈ ಹಾಡಿನಲ್ಲಿ...

ಕಾಡುವ ಸುಶಾಂತ್ ನಗು

ಫರಾಹ್ ಖಾನ್ ನೃತ್ಯ ಸಂಯೋಜನೆ ಮಾಡಿರುವ ಈ ಹಾಡಿನಲ್ಲಿ ಸುಶಾಂತ್, ಬಾಸ್ಕೆಟ್ ಬಾಲ್ ಜೆರ್ಸಿಯಲ್ಲಿ ಗಮನ ಸೆಳೆದಿದ್ದಾರೆ. ಶೀರ್ಷಿಕೆ ಗೀತೆಯ ಟೀಸರ್‌ನಲ್ಲಿ ಅವರು ಹೆಜ್ಜೆ ಹಾಕುವಾಗ ಕಾಣಿಸುವ ನಗು ಅವರ ಅಭಿಮಾನಿಗಳಲ್ಲಿ ಮನಸಲ್ಲಿ ಮತ್ತೆ ನೋವನ್ನು ಸ್ಫೋಟಿಸುವಂತೆ ಮಾಡಿದೆ.

ಎಆರ್ ರೆಹಮಾನ್ ಸಂಗೀತ

'ಮ್ಯಾನಿ, ಕಿಜಿಯನ್ನು ಬೆರಗಾಗಿಸುವಂತೆ ತಂದು ಮೂಡಿಸಿದ ಜೀವಂತಿಕೆಯ ನೋಟ ಇಲ್ಲಿದೆ. ಮಾಂತ್ರಿಕ ಎ.ಆರ್. ರೆಹಮಾನ್ ಅವರ ಮ್ಯಾಜಿಕ್‌ ಅನ್ನು ನಿಮ್ಮ ಮುಂದೆ ತರಲಿದ್ದೇವೆ. ದಿಲ್ ಬೇಚಾರಾದ ಟೈಟಲ್ ಟ್ರ್ಯಾಕ್ ನಾಳೆ ಮಧ್ಯಾಹ್ನ 12 ಗಂಟೆಗೆ ಬಿಡುಗಡೆಯಾಗಲಿದೆ' ಎಂದು ನಿರ್ಮಾಣ ಸಂಸ್ಥೆ ತಿಳಿಸಿದೆ.

ಸಂಭಾವನೆ ಪಡೆಯದ ಫರಾಹ್

ದಿಲ್ ಬೇಚಾರಾ ಸುಶಾಂತ್ ಅವರ ಕೊನೆಯ ಸಿನಿಮಾವಾಗಿದ್ದರೆ, ಅವರು ಕೊನೆಯದಾಗಿ ನಟಿಸಿದ್ದು ಅದರ ಟೈಟಲ್ ಟ್ರ್ಯಾಕ್‌ನಲ್ಲಿ. ಇದಕ್ಕೆ ನೃತ್ಯ ಸಂಯೋಜಿಸಲು ಫರಾಹ್ ಖಾನ್ ಒಪ್ಪಿಕೊಂಡಿದ್ದರು. ಅದಕ್ಕೆ ಅವರು ಸಂಭಾವನೆ ಕೂಡ ಪಡೆದಿರಲಿಲ್ಲ ಎಂದು ನಿರ್ದೇಶಕ ಮುಕೇಶ್ ಛಾಬ್ರಾ ತಿಳಿಸಿದ್ದಾರೆ.

ಮನಸಿಗೆ ಹತ್ತಿರವಾದ ಹಾಡು

'ಈ ಹಾಡು ನನಗೆ ವಿಶೇಷವಾಗಿ ಬಹಳ ಹತ್ತಿರವಾಗಿದೆ. ಏಕೆಂದರೆ ನಾನು ಮೊದಲ ಬಾರಿಗೆ ಸುಶಾಂತ್‌ಗೆ ನೃತ್ಯ ಸಂಯೋಜನೆ ಮಾಡಿದ್ದೆ. ನಾವಿಬ್ಬರೂ ಬಹಳ ಸಮಯದಿಂದ ಗೆಳೆಯರಾಗಿದ್ದರೂ ಜತೆಯಾಗಿ ಕೆಲಸ ಮಾಡಿರಲಿಲ್ಲ. ನೀವು ನಿರ್ದೇಶನ ಮಾಡುವ ಮೊದಲ ಚಿತ್ರಕ್ಕೆ ನೃತ್ಯ ಸಂಯೋಜಿಸುವುದಾಗಿ ಮುಕೇಶ್ ಛಾಬ್ರಾ ಅವರಿಗೂ ಮಾತು ಕೊಟ್ಟಿದ್ದೆ. ಸುಶಾಂತ್ ಇದನ್ನು ಚೆನ್ನಾಗಿ ನಿಭಾಯಿಸುತ್ತಾರೆ ಎಂದು ಇಡೀ ಹಾಡನ್ನು ಒಂದೇ ಶಾಟ್‌ನಲ್ಲಿ ಚಿತ್ರೀಕರಿಸಲಾಗಿತ್ತು' ಎಂದು ಫರಾಹ್ ಖಾನ್ ತಿಳಿಸಿದ್ದಾರೆ.