'ಮತ್ತೆ ಸಿಗೋಣ, ಮಾತನಾಡೋಣ...': ಇರ್ಫಾನ್ ಖಾನ್ ನೆನಪಲ್ಲಿ ಪತ್ನಿಯ ಹೃದಯಸ್ಪರ್ಶಿ ಬರಹ

ಅಲ್ಲಿ ಭೇಟಿ ಮಾಡುತ್ತೇನೆ...

'ತಪ್ಪು ಮಾಡುವುದು ಮತ್ತು ಸರಿ ಮಾಡುವುದು ಈ ಪರಿಕಲ್ಪನೆಗಳಾಚೆ ಒಂದು ಜಾಗವಿದೆ. ನಾನು ನಿಮ್ಮನ್ನು ಅಲ್ಲಿ ಭೇಟಿ ಮಾಡುತ್ತೇನೆ' ಎಂದು ತಮ್ಮ ಮೂರು ಸಾಲಿನ ಪುಟ್ಟ ಬರಹವನ್ನು ಸುತಾಪಾ ಪ್ರಾರಂಭಿಸಿದ್ದಾರೆ. ಅವರು ಹಂಚಿಕೊಂಡಿರುವ ಎರಡು ಫೋಟೊಗಳಲ್ಲಿ ಒಂದರಲ್ಲಿ ಇರ್ಫಾನ್ ಖಾನ್ ಹಸಿರು ಹುಲ್ಲು ಹಾಸಿನ ಮೇಲೆ ಮಲಗಿ ಕ್ಯಾಮೆರಾ ಕಡೆ ದಿಟ್ಟಿಸುತ್ತಿರುವಂತಿದೆ.

ನಾವು ಮತ್ತೆ ಸಿಗುವವರೆಗೂ...

'ಆತ್ಮವು ಆ ಹುಲ್ಲಿನ ಮೇಲೆ ಮಲಗಿಕೊಂಡಾಗ ಜಗತ್ತು ಮಾತನಾಡಲು ಸಾಧ್ಯವಾಗದಷ್ಟು ಹಿರಿದಾಗುತ್ತದೆ. ಇದು ಕೇವಲ ಸಮಯದ ಸಂಗತಿಯಷ್ಟೇ. ಸಿಗೋಣ ಆಗ ಮಾತಾಡೋಣ. ನಾವು ಮತ್ತೆ ಭೇಟಿಯಾಗುವವರೆಗೂ...' ಎಂದು ಸುತಾಪಾ ಬರೆದಿದ್ದಾರೆ.

ರೂಮಿ ಕವಿತೆಯ ಸಾಲುಗಳು

ಖ್ಯಾತ ಪರ್ಷಿಯನ್ ಕವಿ ರೂಮಿ ಬರೆದ ಕವಿತೆಯ ಸಾಲುಗಳಿವು. ಈ ಸಾಲುಗಳ ಜತೆಗೆ ಸುತಾಪಾ ಮತ್ತೊಂದು ಫೋಟೊ ಕೂಡ ಶೇರ್ ಮಾಡಿದ್ದಾರೆ. ಅದು ಕೂಡ ಹುಲ್ಲಿನ ಹಿನ್ನೆಲೆ ಹೊಂದಿದ್ದು, ಮುನ್ನೆಲೆಯಲ್ಲಿ ಸುತಾಪಾ ಪತಿ ಇರ್ಫಾನ್ ಖಾನ್ ಅವರ ಜತೆಗೆ ಇದ್ದಾರೆ.

ಸುದೀರ್ಘ ಬರಹ ಬರೆದಿದ್ದ ಸುತಾಪಾ

ಇರ್ಫಾನ್ ಮೃತಪಟ್ಟ ಎರಡು ದಿನಗಳ ಬಳಿಕ ಸುತಾಪಾ, ಸಾಮಾಜಿಕ ಜಾಲತಾಣದಲ್ಲಿ ಇರ್ಫಾನ್ ಅವರನ್ನು ಕುರಿತು ಸುದೀರ್ಘ ಪತ್ರ ಬರೆದಿದ್ದರು. ನಮ್ಮದು ಮದುವೆಯಲ್ಲ, ಅದು ಒಂದಾಗುವಿಕೆ. ಜೀವನ ಸಿನಿಮಾ ಅಲ್ಲ, ಇಲ್ಲಿ ರೀಟೇಕ್ಸ್ ಇರುವುದಿಲ್ಲ ಎಂಬ ಸಾಲುಗಳು ಎಂತಹವರ ಕಣ್ಣುಗಳನ್ನೂ ಒದ್ದೆ ಮಾಡುವಂತಿದ್ದವು.