ದೀಪಿಕಾ 'ಗೆಹ್ರೈಯಾನ್' ಕೆಟ್ಟ ಮತ್ತು ಅಶ್ಲೀಲ ಸಿನಿಮಾ ಎಂದು ಟೀಕಿಸಿದ ಕಂಗನಾ!

ಅನಿಸಿದ್ದನ್ನು ಸದಾ ಮುಕ್ತವಾಗಿ ಮಾತು ವ್ಯಕ್ತಪಡಿಸುವ ನಟಿ ಕಂಗನಾ

ಬಾಲಿವುಡ್ ನಟಿ ಕಂಗನಾ ರಣಾವತ್ ತನ್ನ ಬೋಲ್ಡ್ ಹಾಗೂ ಖಡಕ್ ಹೇಳಿಕೆಗಳಿಂದಾಗಿಯೇ ಸಾಕಷ್ಟು ಸುದ್ದಿಯನ್ನು ಮಾಡಿರುವ ನಟಿಯಾಗಿದ್ದಾರೆ. ಅನೇಕ ಸಂದರ್ಭಗಳಲ್ಲಿ ಕಂಗನಾ ಹೇಳುವ ಮಾತುಗಳು ದೊಡ್ಡ ಚರ್ಚೆ ಮತ್ತು ವಿವಾದಗಳಿಗೆ ಕಾರಣವಾಗುತ್ತದೆ. ತಮಗೆ ಅನಿಸಿದ್ದನ್ನು ಸದಾ ಮುಕ್ತವಾಗಿ ಮಾತು ವ್ಯಕ್ತಪಡಿಸುವ ನಟಿ ಕಂಗನಾ ರಣಾವತ್ ಬಾಲಿವುಡ್‌ನ ಯಾವ ನಟರನ್ನು ಕೂಡಾ ಎದುರು ಹಾಕಿಕೊಳ್ಳುವುದಕ್ಕೆ ಹಿಂಜರಿಯುವುದಿಲ್ಲ. ನೇರವಾಗಿ ಟೀಕಾಪ್ರಹಾರವನ್ನು ಮಾಡುವ ಮೂಲಕ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಳ್ಳುತ್ತಾರೆ.

ಸಿನಿಮಾದ ಕುರಿತಾಗಿ ತಮ್ಮ ಅಸಮಾಧಾನವನ್ನು ಹೊರಹಾಕಿದ ನಟಿ

ಕೆಲವೇ ದಿನಗಳ ಹಿಂದೆಯಷ್ಟೇ ನಟಿ ದೀಪಿಕಾ ಪಡುಕೋಣೆ,‌ ಅನನ್ಯ ಪಾಂಡೆ,‌ ಸಿದ್ದಾಂತ್ ಚತುರ್ವೇದಿ ಧೈರ್ಯ ಕರ್ವ, ಹಿರಿಯ ನಟ ನಾಸೀರುದ್ದಿನ್ ಶಾ ಮುಂತಾದವರು ಪ್ರಮುಖ ಪಾತ್ರಗಳಲ್ಲಿದ್ದ ಶಕುನ್ ಬಾತ್ರಾ ನಿರ್ದೇಶನ ಮಾಡಿರುವ ಗೆಹರಾಯಿಯಾ ಸಿನಿಮಾ ಓಟಿಟಿಯಲ್ಲಿ ಬಿಡುಗಡೆಯಾಗಿತ್ತು. ಈ ಸಿನಿಮಾ ನೋಡಿದ ನಂತರ ನಟಿ ಕಂಗನಾ ರಣಾವತ್ ತಮ್ಮದೇ ಆದ ಕಟುವಾದ ಶೈಲಿಯಲ್ಲಿ ಸಿನಿಮಾದ ಕುರಿತಾಗಿ ತಮ್ಮ ಅಸಮಾಧಾನವನ್ನು ಹೊರಹಾಕಿದ್ದಾರೆ.

ಕಟುವಾಗಿ ಸಿನಿಮಾವನ್ನು ಟೀಕೆ ಮಾಡಿದ ಕಂಗನಾ

ಕಂಗನಾ ತಮ್ಮ ಸೋಶಿಯಲ್ ಮೀಡಿಯಾ ಖಾತೆಯಲ್ಲಿ ಪೋಸ್ಟ್ ಮಾಡಿ, ಗೆಹರಾಯಿಯಾ ಸಿನಿಮಾದ ಕುರಿತಾಗಿ ತಮ್ಮ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ. ಕಂಗನಾ, "ನಾನು ಕೂಡ ಈ ಕಾಲದವಳೆ, ಇಂತಹ ರೋಮ್ಯಾನ್ಸ್ ಅನ್ನು ಅರ್ಥಮಾಡಿಕೊಳ್ಳಬಲ್ಲೆ. ಆದರೆ ಸಹಸ್ರಮಾನದ ಸಿನಿಮಾ, ಈ ಕಾಲದ ಸಿನಿಮಾ, ನಗರ ಪ್ರದೇಶದ ಸಿನಿಮಾ ಎಂದು ಉಲ್ಲೇಖ ಮಾಡುತ್ತಾ ಕಸವನ್ನು ಮಾರಾಟ ಮಾಡಬೇಡಿ" ಎಂದು ಗೆಹರಾಯಿಯಾ ಸಿನಿಮಾದ ಕುರಿತಾಗಿ ಟೀಕೆ ಮಾಡಿದ್ದಾರೆ.

ಇದರಲ್ಲಿ ಯಾವುದೇ ರೀತಿಯ ಗಹನವಾದ ವಿಷಯವಿಲ್ಲ!

ಎಷ್ಟು ಪ್ರಮಾಣದಲ್ಲಿ ಅಶ್ಲೀಲತೆ ಮತ್ತು ಚರ್ಮ ಪ್ರದರ್ಶನವನ್ನು ಮಾಡಿದರೂ ಕೂಡಾ ಕೆಟ್ಟ ಸಿನಿಮಾವನ್ನು ಗೆಲ್ಲಿಸುವುದಕ್ಕೆ ಸಾಧ್ಯವಿಲ್ಲ. ಒಂದು ಕೆಟ್ಟ ಸಿನಿಮಾ ಯಾವಾಗಲೂ ಕೆಟ್ಟ ಸಿನಿಮಾ ಆಗಿಯೇ ಇರುತ್ತದೆ. ಇದು ಮೂಲಭೂತವಾದ ವಿಚಾರವಾಗಿದ್ದು ಇದರಲ್ಲಿ ಯಾವುದೇ ರೀತಿಯ ಗಹನವಾದ ವಿಷಯವಿಲ್ಲ, ಎಂದು ಹೇಳುವ ಮೂಲಕ ದೀಪಿಕಾ ಪಡುಕೋಣೆ ಅವರ ಹೊಸ ಸಿನಿಮಾವನ್ನು ಟೀಕಿಸಿದ್ದಾರೆ. ಕಂಗನಾ ಹೇಳಿಕೆಯನ್ನು ಕಂಡು ದೀಪಿಕಾ ಪಡುಕೋಣೆ ಅಭಿಮಾನಿಗಳು ಸಿಟ್ಟಾಗಿದ್ದಾರೆ. ಆದರೆ ಇನ್ನೊಂದಷ್ಟು ಜನ ಕಂಗನಾ ಅವರ ಹೇಳಿಕೆಗೆ ಮೆಚ್ಚುಗೆಯನ್ನು ನೀಡಿದ್ದಾರೆ.

ಸಾಕಷ್ಟು ಟ್ರೋಲ್‌ಗೆ ಒಳಗಾಗುತ್ತಿರುವ ದೀಪಿಕಾ ಪಡುಕೋಣೆ!

ಶಕುನ್ ಬಾತ್ರಾ ನಿರ್ದೇಶನದ 'ಗೆಹ್ರೈಯಾನ್' ಚಿತ್ರ ಓಟಿಟಿಯಲ್ಲಿ ಉತ್ತಮ ರೆಸ್ಪಾನ್ಸ್ ಪಡೆದುಕೊಳ್ಳುತ್ತಿದೆ. ಚಿತ್ರದಲ್ಲಿ ದೀಪಿಕಾ ಪಡುಕೋಣೆ, ಸಿದ್ಧಾಂತ್ ಚತುರ್ವೇದಿ ನಡುವೆ ಒಂದಷ್ಟು ಹಾಟ್ ದೃಶ್ಯಗಳು ಮತ್ತು ಲಿಪ್ ಲಾಕ್ ಸೀನ್‌ಗಳು ಇವೆ. ದೀಪಿಕಾ ಕಿಸ್ಸಿಂಗ್ ದೃಶ್ಯಗಳು ಟ್ರೋಲ್‌ಗೆ ತುತ್ತಾಗಿವೆ. "ನೀವೂ ಕಿಸ್ಸಿಂಗ್ ದೃಶ್ಯದಲ್ಲಿ ಅಭಿನಯಿಸುವ ಮುನ್ನ ಪತಿ ರಣ್ವೀರ್ ಸಿಂಗ್ ಬಳಿ ಅನುಮತಿ ಪಡೆದುಕೊಂಡಿದ್ದಾರಾ." ಎಂದು ಕಮೆಂಟ್ ಮಾಡಲಾಗಿದೆ. ಸಂದರ್ಶನ ಒಂದರಲ್ಲಿ ನಟಿ ದೀಪಿಕಾಗೆ ಈ ಪ್ರಶ್ನೆ ಕೂಡ ಎದುರಾಗಿತ್ತು.