RRR ಆಯ್ತು.. ಈಗ ದಂಗಲ್ ದಾಖಲೆ ಧೂಳೀಪಟ: ಕೆಜಿಎಫ್ 21ನೇ ದಿನದ ಸಾಧನೆಯೇನು?

'ದಂಗಲ್' ದಾಖಲೆ ಧೂಳೀಪಟ

ಕನ್ನಡದ ಪ್ಯಾನ್ ಇಂಡಿಯಾ ಸಿನಿಮಾವೊಂದು ಇಷ್ಟು ದೊಡ್ಡ ದಾಖಲೆ ಮಾಡುತ್ತೆ ಅನ್ನೋದು ಯಾರೂ ಊಹಿಸಿರಲು ಸಾಧ್ಯವೇ ಇಲ್ಲ. ಆದರೆ, ಕೆಜಿಎಫ್ 2' ನಂಬಲು ಅಸಾಧ್ಯವಾದ ದಾಖಲೆಗಳನ್ನು ಹಲವು ದಿನಗಳಿಂದ ಮಾಡುತ್ತಲೇ ಇದೆ. ಆಮಿರ್ ಖಾನ್ ನಟಿಸಿದ 'ದಂಗಲ್' ಸಿನಿಮಾ ಬಾಲಿವುಡ್‌ ಬಾಕ್ಸಾಫೀಸ್‌ನಲ್ಲಿ ಸುಮಾರು 387.38 ಕೋಟಿ ಕಲೆಹಾಕಿತ್ತು. ಈ ದಾಖಲೆಯನ್ನು 'ಕೆಜಿಎಫ್ 2' ಬೀಟ್ ಮಾಡಿದೆ. ನಿನ್ನೆ (ಮೇ 4) 'ಕೆಜಿಎಫ್ 2' ಸಿನಿಮಾ 8.75 ಕೋಟಿ ಗಳಿಕೆ ಕಂಡಿದೆ. ಇದರಿಂದ 'ಕೆಜಿಎಫ್ 2' ಬಾಲಿವುಡ್ ಬಾಕ್ಸಾಫೀಸ್ ಕಲೆಕ್ಷನ್ 391.65 ಕೋಟಿ ಆಗಿದೆ. ನಿನ್ನೆ ಕನ್ನಡದ ಪ್ಯಾನ್ ಇಂಡಿಯಾ ಸಿನಿಮಾವೊಂದು ಬಾಲಿವುಡ್‌ನಲ್ಲಿ ಅತೀ ಹೆಚ್ಚು ಗಳಿಕೆ ಕಂಡ ಎರಡನೇ ಸಿನಿಮಾವಾಗಿ ಹೊರಹೊಮ್ಮಿದೆ. ಮುಂದಿನ ಗುರಿ ಬಾಹುಬಲಿ 2 ಕಲೆಕ್ಷನ್ 510.99 ಕೋಟಿ.

'ಕೆಜಿಎಫ್ 2' 21 ದಿನಗಳಲ್ಲಿ ಗಳಿಸಿದ್ದೆಷ್ಟು?

ರಾಕಿ ಭಾಯ್ ಹಾಗೂ ಪ್ರಶಾಂತ್ ನೀಲ್ ಚಮತ್ಕಾರ ಮಾಡಿದ್ದಾರೆ. 21ನೇ ದಿನವೂ 'ಕೆಜಿಎಫ್ 2' ಸಿನಿಮಾದ ಗಳಿಕೆ ಮಾತ್ರ ಕಮ್ಮಿಯಾಗಿಲ್ಲ. ರಂಜಾನ್ ಮಾರನೇ ದಿನವೂ (ಮೇ 05) 'ಕೆಜಿಎಫ್ 2' ತೂಫಾನ್‌ನಂತೆ ಮತ್ತೆ ಅಬ್ಬರಿಸಿದೆ. ಈ ಸಿನಿಮಾ ಬಿಡುಗಡೆಯಾದ 21 ದಿನಗಳಲ್ಲಿ 1097.10 ಕೋಟಿ ಗಳಿಕೆ ಕಂಡಿದೆ. ಈ ಮೂಲಕ ರಾಜಮೌಳಿ ನಿರ್ದೇಶನದ RRR ದಾಖಲೆಯನ್ನೂ ಶೀಘ್ರದಲ್ಲಿಯೇ ಉಡೀಸ್ ಮಾಡಲಿದೆ.

RRR ದಾಖಲೆನೂ ಧೂಳೀಪಟ

ರಾಜಮೌಳಿ ನಿರ್ದೇಶನದ RRR ಸಿನಿಮಾ ಬಿಡುಗಡೆಯಾಗಿ 41 ದಿನಗಳಾಗಿದೆ. ಈ 41 ದಿನಗಳಲ್ಲಿ RRR ವರ್ಲ್ಡ್‌ ವೈಡ್ ಕಲೆಕ್ಷನ್ 1126.15 ಕೋಟಿ ಗಳಿಕೆ ಕಂಡಿದೆ. ಕೆಜಿಎಫ್ ಇನ್ನೊಂದೆರಡು ದಿನಗಳಲ್ಲಿ ಈ ದಾಖಲೆಯನ್ನೂ ಲೂಟಿ ಮಾಡಲಿದೆ. ಅದೇ RRR 21ನೇ ದಿನ ಹಿಂದಿ ಬೆಲ್ಟ್‌ನಲ್ಲಿ 3 ಕೋಟಿ ಹಾಗೂ ವಲ್ಡ್‌ವೈಟ್ 7 ಕೋಟಿ ಕಲೆಹಾಕಿತ್ತು. ಆದೇ 'ಕೆಜಿಎಫ್ 2' ವರ್ಲ್ಡ್‌ವೈಡ್ 32 ಕೋಟಿ ಲೂಟಿ ಮಾಡಿದೆ. ಈ ಲೆಕ್ಕಾಚಾರದ ಪ್ರಕಾರ, 'ಕೆಜಿಎಫ್ 2' ಮುಂದಿನ ಗುರಿ 1500 ಕೋಟಿ ಎನ್ನಬಹುದು.

ಕನ್ನಡ, ತಮಿಳಿನಲ್ಲೂ ಕ್ರೇಜ್

'ಕೆಜಿಎಫ್ 2' ಹಿಂದಿ ಬೆಲ್ಟ್‌ನಲ್ಲಿ ಅಷ್ಟೇ ಅಲ್ಲ. ಕರ್ನಾಟಕ ಹಾಗೂ ತಮಿಳುನಾಡಿನಲ್ಲೂ ಉತ್ತಮ ಗಳಿಕೆ ಕಂಡಿದೆ. ಕರ್ನಾಟಕದಲ್ಲಿ ಇದೂವರೆಗೂ ನಿರ್ಮಾಪಕರಿಗೆ 70 ರಿಂದ 80 ಕೋಟಿ ಸಿಕ್ಕಿದೆ. ಇನ್ನೊಂದು ಕಡೆ ತಮಿಳುನಾಡಿನಲ್ಲೂ ವಿತರಕರು ಲಾಭದಲ್ಲಿದ್ದು, 40 ರಿಂದ 50 ಕೋಟಿ ಲಾಭದಲ್ಲಿದ್ದಾರೆ ಎನ್ನಲಾಗಿದೆ. ಕೇರಳದಿಂದ ನಿರ್ಮಾಪಕರ ಜೇಬು ಸೇರಿದ್ದು 10 ಕೋಟಿ ಎನ್ನಲಾಗಿದೆ.