ಬಾಲಿವುಡ್‌ನ ಬಹು ನಿರೀಕ್ಷೆಯ ಸಿನಿಮಾಗಳ ಪಟ್ಟಿಯಲ್ಲಿ 'ಕೆಜಿಎಫ್ 2'ಗೆ ಮೊದಲ ಸ್ಥಾನ: ಏನು ಹೇಳುತ್ತೆ ಸರ್ವೆ?

ಬಾಲಿವುಡ್‌ನಲ್ಲಿ ಕೆಜಿಎಫ್ ನಂ. 1

2022ರಲ್ಲಿ ಬಾಲಿವುಡ್‌ನಲ್ಲಿ ಬಿಗ್ ಬಜೆಟ್ ಸಿನಿಮಾಗಳು ಬಿಡುಗಡೆಗೆ ಸಜ್ಜಾಗಿ ನಿಂತಿವೆ. ಹೀಗಾಗಿ ಮುಂಬೈ ಮೂಲಕ ಮೀಡಿಯಾ ಕನ್ಸಲ್ಟಿಂಗ್ ಕಂಪನಿ ಓರ್ಮ್ಯಾಕ್ಸ್ ಒಂದು ಸರ್ವೆ ಮಾಡಿದೆ. ಈ ವರ್ಷ ಬಾಲಿವುಡ್‌ನ ಬಹುನಿರೀಕ್ಷೆಯ ಸಿನಿಮಾ ಯಾವುದು ಎಂದು ಸರ್ವೆ ಮಾಡಲಾಗಿದೆ. ಈ ಸರ್ವೆಯಲ್ಲಿ ಅಚ್ಚರಿ ಎಂಬಂತೆ ಕನ್ನಡದ ಪ್ಯಾನ್ ಇಂಡಿಯಾ ಸಿನಿಮಾಗೆ ಹೆಚ್ಚು ಮತಗಳು ಸಿಕ್ಕಿದ್ದು, ಕೆಜಿಎಫ್ 2 ನಂಬರ್ 1 ಸ್ಥಾನದಲ್ಲಿದೆ ಎಂದು ಮಾಹಿತಿ ನೀಡಿದೆ. ಆಮಿರ್ ಖಾನ್, ಅಕ್ಷಯ್ ಕುಮಾರ್, ರಣ್‌ವೀರ್ ಸಿಂಗ್, ರಣ್‌ಬೀರ್ ಕಪೂರ್ ಸೇರಿದಂತೆ ದಿಗ್ಗಜರ ಸಿನಿಮಾಗಳನ್ನೇ ಹಿಂದಿಕ್ಕಿ 'ಕೆಜಿಎಫ್ 2' ಮೊದಲ ಸ್ಥಾನಕ್ಕೆ ಏರಿದೆ.

'ಕೆಜಿಎಫ್ 2' ಹಿಂದಿಕ್ಕಿದ ಸಿನಿಮಾಗಳಿವು

ಓರ್ಮ್ಯಾಕ್ಸ್ ಸರ್ವೆಯಲ್ಲಿ ಸ್ಯಾಂಡಲ್‌ವುಡ್‌ನ ಪ್ಯಾನ್‌ ಇಂಡಿಯಾ ಸಿನಿಮಾ 'ಕೆಜಿಎಫ್ 2' ನಂಬರ್ 1 ಸ್ಥಾನದಲ್ಲಿರುವುದೇನೋ ಸರಿ. ಆದರೆ, ಬಾಲಿವುಡ್‌ನ ಯಾವ್ಯಾವ ಸಿನಿಮಾಗಳನ್ನು ಹಿಂದಿಕ್ಕಿದೆ? ಯಾವ ಸಿನಿಮಾ ಯಾವ ಸ್ಥಾನದಲ್ಲಿದೆ ಎನ್ನುವುದನ್ನು ನೋಡುವುದಾದರೆ, ರಣ್‌ಬೀರ್ ಕಪೂರ್ ಸಿನಿಮಾ 'ಬ್ರಹ್ಮಾಸ್ತ್ರ', ಎರಡನೇ ಸ್ಥಾನದಲ್ಲಿದೆ. ಲಾಲ್ ಸಿಂಗ್ ಚಡ್ಡಗೆ ಮೂರನೇ ಸ್ಥಾನ, ಟ್ರೈಗರ್ ಶ್ರಾಫ್ ಅಭಿನಯದ 'ಹೀರೋಪಂತಿ 2' ನಾಲ್ಕನೇ ಸ್ಥಾನದಲ್ಲಿದ್ದು, ಅಕ್ಷಯ್ ಕುಮಾರ್ ಅಭಿನಯದ 'ರಾಮ್ ಸೇತು' ಈ ವರ್ಷದ ಬಹು ನಿರೀಕ್ಷೆಯ ಸಿನಿಮಾಗಳ ಪಟ್ಟಿಯಲ್ಲಿ 5ನೇ ಸ್ಥಾನದಲ್ಲಿದೆ.

'ಕೆಜಿಎಫ್ 2' ಹೊಸ ದಾಖಲೆ ನಿರೀಕ್ಷೆ

'ಕೆಜಿಎಫ್ ಚಾಪ್ಟರ್ 2' ಚಿತ್ರದ ಟೀಸರ್ ಬರೆದ ದಾಖಲೆಗಳನ್ನು ನೋಡಿದರೆ, ಬಾಕ್ಸಾಫೀಸ್‌ನಲ್ಲಿ ಸದ್ದು ಮಾಡುವುದು ಖಚಿತ. ಆದರೆ, ಯಾವ ಭಾಷೆಯಲ್ಲಿ ಎಷ್ಟು ಗಳಿಕೆ ಮಾಡುತ್ತೆ ಅನ್ನುವುದೇ ಕೂತೂಹಲ. ಅದರಲ್ಲೂ ಬಾಲಿವುಡ್‌ ಗಲ್ಲಾಪಟ್ಟೆಗೆಯಲ್ಲಿ ಬಾಹುಬಲಿ ಬಿಟ್ಟರೆ, ಬೇರಾವುದೇ ಸಿನಿಮಾ ಆ ಮಟ್ಟಕ್ಕೆ ತಲುಪಿದ ಉದಾಹರಣೆಗಳೇ ಇಲ್ಲ. ಹೀಗಾಗಿ ಈ ಬಾರಿ 'ಕೆಜಿಎಫ್ 2' ಹೊಸ ದಾಖಲೆ ಬರೆಯಬಹುದೆಂಬ ನಿರೀಕ್ಷೆಯಿದೆ.

'ಕೆಜಿಎಫ್ 2' Vs 'ಲಾಲ್ ಸಿಂಗ್ ಚಡ್ಡ'

ಬಾಲಿವುಡ್‌ ಚಿತ್ರರಂಗದಲ್ಲಿ ದಿಗ್ಗಜರು ನಟಿಸಿದ ಸಿನಿಮಾಗಳನ್ನು 'ಕೆಜಿಎಫ್ 2' ಸರ್ವೆಯಲ್ಲಿ ಹಿಂದಿಕ್ಕಿದೆ. ಆದರೆ, ಅಸಲಿ ಹೋರಾಟ ಇರುವುದು ಥಿಯೇಟರ್‌ನಲ್ಲಿ. ಏಪ್ರಿಲ್ 14ಕ್ಕೆ 'ಕೆಜಿಎಫ್ 2' ರಿಲೀಸ್ ಆಗುತ್ತಿದ್ದರೆ, ಇನ್ನೊಂದು ಕಡೆ ಬಾಲಿವುಡ್ ಸೂಪರ್‌ಸ್ಟಾರ್ ಆಮಿರ್ ಖಾನ್ ನಟಿಸುತ್ತಿರುವ 'ಲಾಲ್ ಸಿಂಗ್ ಚಡ್ಡ' ಕೂಡ ಏಪ್ರಿಲ್ 14ಕ್ಕೆ ಬಿಡುಗಡೆಯಾಗಲಿದೆ. ಇದೂವರೆಗೂ ಕೆಜಿಎಫ್ ಆಗಲಿ, ಲಾಲ್ ಸಿಂಗ್ ಚಡ್ಡ ತಂಡವಾಗಲಿ ಬಿಡುಗಡೆ ದಿನವನ್ನು ಬದಲಾಯಿಸಿಕೊಂಡಿಲ್ಲ. ಹೀಗಾಗಿ ಥಿಯೇಟರ್ ಕಾಳಗವೇ ಅಂತಿಮ ಎನ್ನಬಹುದು.