ಗಾಯಕ KKಯ ಪ್ರಾಥಮಿಕ ಮರಣೋತ್ತರ ಪರೀಕ್ಷೆ ವರದಿಯಲ್ಲಿ ಹೇಳಿದ್ದೇನು?

ಕೆಕೆ ಪೋಸ್ಟ್ ಮಾರ್ಟಮ್ ವರದಿಯಲ್ಲೇನಿದೆ?

ಕೊಲ್ಕತ್ತಾ ಪೊಲೀಸರು ಕೆಕೆ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ಎಸ್‌ಎಸ್‌ಕೆಎಂ ಆಸ್ಪತ್ರೆಗೆ ಕಳುಹಿಸಿಕೊಟ್ಟಿದ್ದರು. ಆರಂಭದಲ್ಲಿ ಕೆಕೆಗೆ ಆಡಿಟೋರಿಯಂನಲ್ಲಿ ಓವರ್ ಕ್ರೌಡ್‌ನಿಂದ ಉಸಿರಾಟ ಸಮಸ್ಯೆಯಾಗಿ ಕೊನೆಯುಸಿರೆಳಿದಿದ್ದಾರೆ ಎನ್ನಲಾಗಿತ್ತು. ಆದ್ರೀಗ ಪ್ರಾಥಮಿಕ ಮರಣೋತ್ತರ ವರದಿ ಬಂದಿದ್ದು, ಕೆಕೆ ಹೃದಯಾಘಾತದಿಂದ ಸಾವನ್ನಪ್ಪಿದ್ದಾರೆ ಎಂದು ಹೇಳಲಾಗಿದೆ. ಈ ವರದಿ ಸದ್ಯ ಕೋಲ್ಕತ್ತಾ ಪೊಲೀಸರ ಕೈ ಸೇರಿದೆ.

ಪೊಲೀಸರು ಕೇಸ್ ದಾಖಲಿಸಿದ್ದೇಕೆ?

ಕೆಕೆ ಮೃತದೇಹದ ಮೇಲೆ ಗಾಯದ ಗುರುತುಗಳಾಗಿದ್ದವು. ಕೆಕೆ ಮುಖ ಹಾಗೂ ಹಣೆಯ ಮೇಲೆ ಗಾಯಗಳಾಗಿದ್ದಿದ್ದನ್ನು ಗುರುತಿಸಿದ್ದರು. ಈ ಕಾರಣಕ್ಕೆ ಪೊಲೀಸರು ಅಸಹಜ ಸಾವು ಎಂದು ಕೇಸ್ ದಾಖಲಿಸಿಕೊಂಡು ತನಿಖೆಯನ್ನು ಆರಂಭಿಸಿದ್ದರು. ಈ ಕಾರಣಕ್ಕೆ ಕೆಕೆ ಮನೆಯವರ ಅನುಮತಿಯನ್ನು ಪಡೆದು ಮರಣೋತ್ತರ ಪರೀಕ್ಷೆಗೆ ಮೃತ ದೇಹವನ್ನು ರವಾನೆ ಮಾಡಲಾಗಿತ್ತು. ಈಗ ಹೃದಯಘಾತದಿಂದ ಸಂಭವಿಸಿದೆ ಎಂಬ ಪ್ರಾಥಮಿಕ ವರದಿ ಪೊಲೀಸರ ಕೈ ಸೇರಿದೆ.

ಪೂರ್ಣ ವರದಿ ಸಿಗೋದು ಯಾವಾಗ?

ಕೆಕೆ ಮರಣೋತ್ತರ ಪರೀಕ್ಷೆಯನ್ನು ಕೋಲ್ಕತ್ತಾದ ಎಸ್‌ಎಸ್‌ಕೆಎಂ ಆಸ್ಪತ್ರೆಯಲ್ಲಿ ನಡೆದಿದೆ. ಸದ್ಯ ಕೆಕೆಯ ಪಾರ್ಥಿವ ಶರೀರ ಮುಂಬೈ ತಲುಪಿದೆ. ನಾಳೆ ( ಜೂನ್ 02)ರಂದು ಕೆಕೆ ಅಂತಿಮ ಸಂಸ್ಕಾರ ನಡೆಯಲಿದೆ. ಸದ್ಯ ಪೊಲೀಸರ ಕೈಗೆ ಪ್ರಾಥಮಿಕ ವರದಿಯಷ್ಟೇ ಸೇರಿದ್ದು, 72 ಗಂಟೆಯೊಳಗೆ ಸಂಪೂರ್ಣ ವರದಿ ಪೊಲೀಸರಿಗೆ ಸಿಗಲಿದೆ.

ಕೆಕೆ ಸಾವಿಗೆ ಚಿತ್ರರಂಗದ ಕಂಬನಿ

ಬಾಲಿವುಡ್‌ ಸಿನಿಮಾಗಳಲ್ಲಿ ಗುರುತಿಸಿಕೊಂಡಿದ್ದರೂ, ಕನ್ನಡ, ತೆಲುಗು ಸೇರಿದಂತೆ ಹಲವು ಭಾಷೆಗಳಲ್ಲಿ ಹಾಡಿದ್ದಾರೆ. ಹೀಗಾಗಿ ಕೆಕೆ ದಿಢೀರ್ ಅಗಲಿಕೆಯ ಸುದ್ಧಿ ಕೇಳಿ ಶಾಕ್ ಆಗಿದ್ದಾರೆ. ಅಲ್ಲು ಅರ್ಜುನ್, ಅಕ್ಷಯ್ ಕುಮಾರ್, ಶ್ರೇಯಾ ಘೋಷಾಲ್, ಎ.ಆರ್ ರೆಹಮಾನ್, ಸಲ್ಮಾನ್ ಖಾನ್, ಆಮಿರ್ ಖಾನ್ ಸೇರಿದಂತೆ ಚಿತ್ರರಂಗದ ಗಣ್ಯರು ಕಂಬನಿ ಮಿಡಿದಿದ್ದಾರೆ.