ಸುಶಾಂತ್‌ಗೆ ಬೈಪೊಲಾರ್ ಡಿಸಾರ್ಡರ್ ಇತ್ತು ಎಂದಿದ್ದ ವೈದ್ಯೆಯೇ ನಾಪತ್ತೆ!

ವೈದ್ಯೆ ಬಗ್ಗೆ ಹೆಚ್ಚಿದ ಅನುಮಾನ

ಸುಶಾಂತ್ ಅವರಿಗೆ ಬೈಪೊಲಾರ್ ಡಿಸಾರ್ಡರ್ ಮತ್ತು ಮಾನಸಿಕ ಖಿನ್ನತೆ ಸೇರಿದಂತೆ ವಿವಿಧ ಸಮಸ್ಯೆಗಳು ಇದ್ದವು ಎಂದು ಹೇಳಿಕೆ ನೀಡಿದ್ದ ವೈದ್ಯೆ ಸುಸಾನ್ ಮೊಫತ್ ಅವರ ಲಿಂಕ್ಡ್ ಇನ್ ಖಾತೆಯನ್ನು ನೆಟ್ಟಿಗರು ಜಾಲಾಡಿದ್ದರು. ಆಕೆ ಈ ಚಿಕಿತ್ಸೆಗಳಿಗೆ ನೀಡುವಷ್ಟು ಪರಿಣತರಾಗಿರಲಿಲ್ಲ ಎಂದು ಆರೋಪಿಸಿದ್ದರು. ಸುಸಾನ್ ಅವರಲ್ಲಿ ಯಾವುದೇ ವೈದ್ಯಕೀಯ ಪದವಿ ಇಲ್ಲ. ಅವರೊಬ್ಬ ಕೌನ್ಸಲರ್ ಅಷ್ಟೇ ಎಂದು ಹೇಳಿದ್ದರು.

ಲಿಂಕ್ಡ್ ಇನ್ ಖಾತೆ

ಈ ಸಂದರ್ಶನ ಪ್ರಸಾರವಾದ ಮರುದಿನವೇ ಸುಸಾನ್ ವಾಕರ್ ತಮ್ಮ ಲಿಂಕ್ಡ್ ಇನ್ ಖಾತೆಯನ್ನು ಡಿಲೀಟ್ ಮಾಡಿದ್ದಾರೆ. ಲಂಡನ್ ವಿಶ್ವವಿದ್ಯಾಲಯದಲ್ಲಿ ಪದವಿ ಪಡೆದಿರುವುದಾಗಿ ಹೇಳಿರುವ ಸುಸಾನ್, ಮುಂಬೈನಲ್ಲಿ ನೆಲೆಸಿದ್ದಾರೆ. ಸುಶಾಂತ್ ಪ್ರಕರಣದಲ್ಲಿ ಹೇಳಿಕೆ ನೀಡಿದ ಮರುದಿನವೇ ಅವರು ಖಾತೆ ಡಿಲೀಟ್ ಮಾಡಿರುವುದು ಮತ್ತಷ್ಟು ಅನುಮಾನ ಮೂಡಿಸಿದೆ. ಸುಸಾನ್ ಈ ಸಂಚಿನಲ್ಲಿ ಭಾಗಿಯಾಗಿದ್ದಾರೆ ಎಂದು ನೆಟ್ಟಿಗರು ಆರೋಪಿಸಿದ್ದಾರೆ.

ರಿಯಾ ವಿರುದ್ಧ ಸಂಚು ನಡೆಯುತ್ತಿದೆ

ರಿಯಾ ವಿರುದ್ಧ ಎಲ್ಲರೂ ತಪ್ಪು ಮಾಹಿತಿ ಹರಡುತ್ತಿರುವಾಗ ಹಾಗೂ ಸಂಚು ಮಾಡುತ್ತಿರುವಾಗ ಸುಮ್ಮನೆ ಇರುವುದು ಸಾಧ್ಯವಿಲ್ಲ. ಹೀಗಾಗಿ ವಾಸ್ತವ ತಿಳಿಸುವುದು ನನ್ನ ಕರ್ತವ್ಯ. ಹಾಗಾಗಿ ಮಾಧ್ಯಮದ ಮುಂದೆ ಬಂದಿದ್ದೇನೆ. ಕ್ಲಿನಿಕಲ್ ಸೈಕಾಲಜಿಸ್ಟ್ ಮತ್ತು ಸೈಕೋಥೆರಪಿಸ್ಟ್ ಆಗಿರುವ ನಾನು 2019ರ ನವೆಂಬರ್ ಮತ್ತು ಡಿಸೆಂಬರ್ ಅವಧಿಯಲ್ಲಿ ಸುಶಾಂತ್ ಹಾಗೂ ರಿಯಾ ಅವರನ್ನು ಭೇಟಿಯಾಗಿದ್ದೇನೆ ಎಂದು ಸುಸಾನ್ ಹೇಳಿದ್ದರು.

ಅಮ್ಮನಂತೆ ನೋಡಿಕೊಂಡಿದ್ದರು

ಸುಶಾಂತ್ ಖಿನ್ನತೆ ಹಾಗೂ ಹೈಪೋಮೇನಿಯಾದಿಂದ ಬಳಲುತ್ತಿದ್ದರು. ಅವರಿಗೆ ಬೆಂಬಲವಾಗಿ ರಿಯಾ ಇದ್ದರು. ಅಮ್ಮನ ಹಾಗೆ ಪ್ರೀತಿ ಮತ್ತು ಕಾಳಜಿ ತೋರಿಸುತ್ತಿದ್ದದ್ದನ್ನು ಕಂಡು ಅಚ್ಚರಿಯಾಗಿತ್ತು. ಸುಶಾಂತ್ ಚಿಕಿತ್ಸೆಗೆ ಭಯ ಪಡುವಾಗ ರಿಯಾ ಧೈರ್ಯ ತುಂಬುತ್ತಿದ್ದರು ಎಂದು ಸುಸಾನ್ ಹೇಳಿಕೆ ನೀಡಿದ್ದರು.