ರಣ್‌ವೀರ್ ಸಿಂಗ್ - ದೀಪಿಕಾ ಜೋಡಿಗೆ ಮೊದಲ ಸೋಲು: '83' ಫ್ಲಾಪ್‌ಗೆ ಕಾರಣವೇನು?

ಸೈಡರ್ ಮ್ಯಾನ್, ಪುಷ್ಪ ಸವಾಲು

ಬಾಲಿವುಡ್ ಮಂದಿರ ಪ್ರಕಾರ, ಎರಡು ಸಿನಿಮಾಗಳು ಥಿಯೇಟರ್‌ನಲ್ಲಿ ಭರ್ಜರಿ ಪ್ರದರ್ಶನ ಕಾಣುತ್ತಿರುವಾಗ, ಹೊಸ ಸಿನಿಮಾ ಬಿಡುಗಡೆ ಮಾಡಬಾರದು. '83' ಸಿನಿಮಾ ರಿಲೀಸ್‌ಗೂ ಒಂದು ವಾರ ಮೊದಲು ಅಲ್ಲು ಅರ್ಜುನ್ ನಟನೆಯ 'ಪುಷ್ಪ' ಹಾಗೂ ಹಾಲಿವುಡ್ ಸಿನಿಮಾ 'ಸೈಡರ್ ಮ್ಯಾನ್' ಬಿಡುಗಡೆಯಾಗಿತ್ತು. ಈ ಎರಡೂ ಸಿನಿಮಾಗಳೂ ಬಾಕ್ಸಾಫೀಸ್‌ನಲ್ಲಿ ಧೂಳೆಬ್ಬಿಸುತ್ತಿದ್ದವು. ಇದಕ್ಕೆ ಸರಿಯಾಗಿ ಒಂದು ವಾರದ ಬಳಿಕ '83' ರಿಲೀಸ್ ಆಗಿತ್ತು. ಆದರೆ, 'ಸೈಡರ್ ಮ್ಯಾನ್' ಹಾಗೂ 'ಪುಷ್ಪ' ಹ್ಯಾಂಗೋವರ್‌ನಲ್ಲಿದ್ದವರು '83' ನೋಡಲು ಮನಸ್ಸು ಮಾಡಲಿಲ್ಲ.

ವಿಶ್ವ ಕಪ್ ಇತಿಹಾಸ ಎಲ್ಲರಿಗೂ ಗೊತ್ತಿದೆ

1983ರಲ್ಲಿ ಕಪಿಲ್ ದೇವ್ ಮತ್ತು ತಂಡ ಮೊದಲ ಬಾರಿಗೆ ಕ್ರಿಕೆಟ್‌ನಲ್ಲಿ ವಿಶ್ವಕಪ್ ಗೆದ್ದಿದ್ದು ಎಲ್ಲರಿಗೂ ಗೊತ್ತಿದೆ. ಈ ರೋಚಕ ಘಟನೆಯ ಬಗ್ಗೆ ಕಳೆದ ಮೂರೂವರೆ ದಶಕಗಳಿಂದ ಕೇಳುತ್ತಲೇ ಇದ್ದಾರೆ. ಹೀಗಾಗಿ ಜನರಿಗೆ ಈ ಕೇಳಿರುವ ರೋಚಕ ಕಥೆಯನ್ನು ಮತ್ತೆ ತೆರೆಮೇಲೆ ನೋಡುವ ಉತ್ಸಾಹ ಉಳಿದಿರಲಿಲ್ಲ. ಅಲ್ಲದೆ ತೆರೆಮೇಲೆ ಕ್ರಿಕೆಟ್‌ಗಿಂತ ಹೆಚ್ಚಾಗಿ ಭಾವನೆಗಳಿಗೆ ಹೆಚ್ಚು ಪ್ರಾಮುಖ್ಯತೆ ನೀಡಲಾಗಿದೆ ಎಂಬ ಮಾತುಗಳೂ ಕೂಡ ಕೇಳಿ ಬಂದಿದ್ದವು.

ಸಣ್ಣ ಊರುಗಳಲ್ಲಿ '83' ಸಿನಿಮಾ ಇಷ್ಟಪಡಲಿಲ್ಲ'

ಮುಂಬೈ, ಪೂನಾ, ದೆಹಲಿ ಇಂತಹ ಮಹಾನಗರಗಳಲ್ಲಿ ಸಿನಿಮಾ ಚೆನ್ನಾಗಿ ಓಡಿದೆ. ಆದರೆ, ಈ ಭಾಗಗಳಲ್ಲೇ ಕೆಲವೆಡೆ ಥಿಯೇಟರ್‌ನಲ್ಲಿ ಶೇ.50ರಷ್ಟು ಆಸನದ ವ್ಯವಸ್ಥೆ ಇತ್ತು. ಇದರೊಂದಿಗೆ ಉಳಿದ ಭಾಗಗಳಲ್ಲಿ ಸಿನಿಮಾ ನೋಡಲು ಜನರು ಉತ್ಸಾಹ ತೋರಲಿಲ್ಲ. ಜಿಲ್ಲೆಗಳು, ತಾಲೂಕು ಭಾಗಗಳಲ್ಲಿ ಜನರು ತೆರೆಮೇಲೆ ಕ್ರಿಕೆಟ್ ಪಂದ್ಯವನ್ನು ನೋಡಲು ಮನಸ್ಸು ಮಾಡಲಿಲ್ಲ. ಹೀಗಾಗಿ ಕೇವಲ ಮಹಾನಗರಕ್ಕೆ ಮಾತ್ರ ಸಿನಿಮಾ ಸೀಮಿತವಾಯಿತು.

'83' ವಿತರಣೆ ಮಾಡುವಲ್ಲಿ ಸೋತಿದೆ

'83' ಸಿನಿಮಾ ವಿತರಣೆ ವಿಚಾರದಲ್ಲಿ ವಿತರಕರ ಮನವೊಲಿಸಿಕೊಳ್ಳಲಿಲ್ಲ. ಹೀಗಾಗಿ ಕೆಲವೆಡೆ ವಿತರಕರು ಸಿನಿಮಾವನ್ನು ಸರಿಯಾಗಿ ಬಿಡುಗಡೆ ಮಾಡಿಲ್ಲ ಎನ್ನಲಾಗಿದೆ. ವಿತರಕರು ಹೆಚ್ಚಿಗೆ ಶೇರ್ ಕೇಳಿದ್ದರು ಮತ್ತು ಎರಡು ವಾರ ಥಿಯೇಟರ್‌ನಲ್ಲಿ ಪ್ರದರ್ಶನ ಮಾಡುವ ಭರವಸೆಯನ್ನು ನೀಡಿದ್ದರು. ಆದರೆ, ಸಿನಿಮಾ ತಂಡ ಈ ಮಾತನ್ನು ಒಪ್ಪಿಕೊಂಡಿಲ್ಲ. ಹೀಗಾಗಿ ವಿತರಕರು ಅತೀ ಹೆಚ್ಚು ಪ್ರೇಕ್ಷಕರು ಸೇರುವ ಸಣ್ಣ ಪುಟ್ಟ ಚಿತ್ರಮಂದಿರಗಳಲ್ಲಿ ಸಿನಿಮಾ ಬಿಡುಗಡೆ ಮಾಡುವ ರಿಸ್ಕ್ ತೆಗೆದುಕೊಳ್ಳಲಿಲ್ಲ. ಈ ಎಲ್ಲಾ ಕಾರಣಕ್ಕೆ ಸಿನಿಮಾ ಸೋತಿದೆ ಎಂದು ಬಾಲಿವುಡ್ ಮಂದಿ ಅಂದಾಜು ಮಾಡುತ್ತಿದ್ದಾರೆ.