'ಧುರಂಧರ್' ನಟ ಅಕ್ಷಯ್ ಖನ್ನಾ ವಿಭಿನ್ನ ಜೀವನಶೈಲಿ: ದಿನಕ್ಕೆ 10 ಗಂಟೆ ನಿದ್ದೆ.. ಬೆಳಗ್ಗೆ ತಿಂಡಿ ತಿನ್ನಲ್ಲ

ಬಾಲಿವುಡ್ ಅಂದಮೇಲೆ ಅಲ್ಲಿನ ನಟ-ನಟಿಯರ ಜೀವನಶೈಲಿ ಬಹಳ ವಿಭಿನ್ನವಾಗಿರುತ್ತದೆ. ತೆರೆಯ ಮೇಲೆ ಮಿಂಚುವ ಕಲಾವಿದರು ತೆರೆಯ ಹಿಂದೆ ತಮ್ಮ ಆರೋಗ್ಯದ ಬಗ್ಗೆ ಅಷ್ಟೇ ಕಾಳಜಿ ವಹಿಸುತ್ತಾರೆ. ಪ್ರತಿಯೊಬ್ಬರಿಗೂ ಅವರದ್ದೇ ಆದ ಕೆಲವು ವಿಚಿತ್ರ ಮತ್ತು ಶಿಸ್ತಿನ ಹವ್ಯಾಸಗಳು ಇರುತ್ತವೆ.

ಕೆಲವರು ಜಿಮ್‌ನಲ್ಲಿ ಗಂಟೆಗಟ್ಟಲೆ ಕಳೆಯಲು ಇಷ್ಟಪಟ್ಟರೆ, ಇನ್ನು ಕೆಲವರು ಆಹಾರದ ವಿಚಾರದಲ್ಲಿ ತುಂಬಾ ಕಟ್ಟುನಿಟ್ಟಾಗಿ ಇರುತ್ತಾರೆ. ಸಿನಿಮಾ ಲೋಕದ ಗದ್ದಲದಿಂದ ದೂರವಿರುವ ಕಲಾವಿದರ ಜೀವನ ಹೇಗಿರುತ್ತದೆ ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಯಾವಾಗಲೂ ಇದ್ದೇ ಇರುತ್ತದೆ.

ತಮ್ಮ ಅದ್ಭುತ ನಟನೆಯಿಂದ ಮನೆಮಾತಾಗಿರುವ ಹಿರಿಯ ನಟ ವಿನೋದ್ ಖನ್ನಾ ಅವರ ಪುತ್ರ ಅಕ್ಷಯ್ ಖನ್ನಾ ಕೂಡ ಇಂತಹದ್ದೇ ಒಂದು ವಿಶಿಷ್ಟ ಹಾದಿಯಲ್ಲಿದ್ದಾರೆ. ಅವರು ಪ್ರಚಾರದಿಂದ ಸದಾ ದೂರವಿದ್ದರೂ ಅವರ ದಿನಚರಿಯ ಬಗ್ಗೆ ಈಗ ಸೋಶಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಚರ್ಚೆಯಾಗುತ್ತಿದೆ.

ಅಕ್ಷಯ್ ಖನ್ನಾ ಅವರ ಆಹಾರದ ಗುಟ್ಟು ಇಲ್ಲಿದೆ

ಅಕ್ಷಯ್ ಖನ್ನಾ ಅವರು ಆಹಾರದ ವಿಚಾರದಲ್ಲಿ ಬಹಳ ಸರಳ ವ್ಯಕ್ತಿ. ಅವರು ದಿನಕ್ಕೆ ಕೇವಲ ಎರಡು ಬಾರಿ ಮಾತ್ರ ಮುಖ್ಯ ಊಟ ಮಾಡುತ್ತಾರೆ. ಅಚ್ಚರಿಯ ವಿಷಯವೆಂದರೆ ಇವರು ಬೆಳಗಿನ ಉಪಹಾರ ಅಂದರೆ ಬ್ರೇಕ್‌ಫಾಸ್ಟ್ ಮಾಡುವುದೇ ಇಲ್ಲ. ನೇರವಾಗಿ ಮಧ್ಯಾಹ್ನದ ಊಟವನ್ನೇ ಮಾಡುತ್ತಾರೆ.

ಮಧ್ಯಾಹ್ನದ ಊಟದಲ್ಲಿ ಅವರು ಹೆಚ್ಚಾಗಿ ಮನೆಯಲ್ಲಿ ತಯಾರಿಸಿದ ಊಟ ಅನ್ನವನ್ನು (ದಾಲ್ ಚಾವಲ್) ಸೇವಿಸುತ್ತಾರೆ. ಇದರ ಜೊತೆಗೆ ಯಾವುದಾದರೂ ಒಂದು ತರಕಾರಿ ಪಲ್ಯ ಇರಲೇಬೇಕು. ನಾನ್-ವೆಜ್ ಪ್ರಿಯರಾಗಿರುವ ಇವರು ಚಿಕನ್ ಅಥವಾ ಮೀನಿನ ಖಾದ್ಯವನ್ನು ಸವಿಯಲು ಇಷ್ಟಪಡುತ್ತಾರೆ.

ಮಧ್ಯಂತರ ಸ್ನ್ಯಾಕ್ಸ್ ತಿನ್ನುವ ಹವ್ಯಾಸ ಇವರಿಗಿಲ್ಲ

ಇಂದಿನ ಕಾಲದಲ್ಲಿ ಜನರು ಪದೇ ಪದೇ ಏನನ್ನಾದರೂ ತಿನ್ನುತ್ತಿರುತ್ತಾರೆ. ಆದರೆ ಅಕ್ಷಯ್ ಖನ್ನಾ ಅವರದ್ದು ಬೇರೆಯೇ ಶಿಸ್ತು. ಮಧ್ಯಾಹ್ನ ಮತ್ತು ರಾತ್ರಿಯ ಊಟದ ನಡುವೆ ಅವರು ಯಾವುದೇ ಸ್ಯಾಂಡ್‌ವಿಚ್ ಅಥವಾ ಬಿಸ್ಕೆಟ್ ತಿನ್ನುವುದಿಲ್ಲ. ಇದು ಅವರ ಜೀರ್ಣಕ್ರಿಯೆಗೆ ಪೂರಕವಾಗಿದೆ.

ಸಂಜೆ ಸಮಯದಲ್ಲಿ ಅವರು ಕೇವಲ ಒಂದು ಕಪ್ ಚಹಾ ಮಾತ್ರ ಕುಡಿಯುತ್ತಾರೆ. ಚಹಾದ ಜೊತೆ ಕೂಡ ಯಾವುದೇ ಸ್ನ್ಯಾಕ್ಸ್ ಇರುವುದಿಲ್ಲ. ಇಷ್ಟು ಕಟ್ಟುನಿಟ್ಟಾದ ಆಹಾರ ಪದ್ಧತಿಯೇ ಅವರ ಫಿಟ್ನೆಸ್ ರಹಸ್ಯ ಎನ್ನಬಹುದು.

ರಾತ್ರಿಯ ಊಟ ಮತ್ತು ನಿದ್ರೆಯ ಅಭ್ಯಾಸ

ರಾತ್ರಿಯ ವೇಳೆಯಲ್ಲೂ ಇವರ ಊಟ ಬಹಳ ಹಿತವಾಗಿರುತ್ತದೆ. ಹೆಚ್ಚಾಗಿ ಚಪಾತಿ (ರೋಟಿ) ಇವರ ಮೆನುವಿನಲ್ಲಿ ಇರುತ್ತದೆ. ಇದರೊಂದಿಗೆ ತರಕಾರಿ ಪಲ್ಯ ಮತ್ತು ಯಾವುದಾದರೂ ಒಂದು ಮಾಂಸಾಹಾರಿ ಡಿಶ್ ಅನ್ನು ಇವರು ಇಷ್ಟಪಟ್ಟು ತಿನ್ನುತ್ತಾರೆ.

ಅಕ್ಷಯ್ ಖನ್ನಾ ಅವರ ನಿದ್ರೆಯ ಅಭ್ಯಾಸ ಕೇಳಿದರೆ ನೀವು ನಿಜಕ್ಕೂ ಅಚ್ಚರಿ ಪಡುತ್ತೀರಿ. ಅವರು ದಿನಕ್ಕೆ ಸುಮಾರು 10 ಗಂಟೆಗಳ ಕಾಲ ನಿದ್ರೆ ಮಾಡುತ್ತಾರೆ. ಉತ್ತಮ ಆರೋಗ್ಯಕ್ಕಾಗಿ ಸುಖ ನಿದ್ರೆ ಅತ್ಯಗತ್ಯ ಎಂದು ಅವರು ನಂಬುತ್ತಾರೆ. ಸಿನಿಮಾ ಕೆಲಸಗಳ ಒತ್ತಡದ ನಡುವೆಯೂ ತಮ್ಮ ದೇಹಕ್ಕೆ ಬೇಕಾದ ವಿಶ್ರಾಂತಿಯನ್ನು ಅವರು ನೀಡುತ್ತಾರೆ.

ಬಾಲಿವುಡ್‌ನ ಈ ಗಂಭೀರ ನಟನ ಸರಳ ಜೀವನ ಮತ್ತು ಈ ಆಸಕ್ತಿದಾಯಕ ಸಂಗತಿಗಳು ಅಭಿಮಾನಿಗಳಿಗೆ ಪ್ರೇರಣೆಯಾಗುವುದರಲ್ಲಿ ಸಂಶಯವಿಲ್ಲ. ಇಷ್ಟು ವರ್ಷಗಳಾದರೂ ಅವರು ತಮ್ಮ ತೇಜಸ್ಸನ್ನು ಕಾಪಾಡಿಕೊಂಡಿರುವುದು ಇಂತಹ ಶಿಸ್ತಿನ ಜೀವನದಿಂದಲೇ ಇರಬಹುದು.