Graamaayana Box Office Day 3: ಮೊದಲ 3 ದಿನಗಳಲ್ಲಿ 'ಗ್ರಾಮಾಯಣ' ಕಲೆಕ್ಷನ್ ಎಷ್ಟಾಯ್ತು? ಭಾನುವಾರ ಗಳಿಸಿದ್ದೆಷ್ಟು?

ಹಂಗೂ-ಹಿಂಗೂ ಒಂದಿಷ್ಟು ಅಡೆ-ತಡೆಗಳನ್ನು ದಾಟಿ ತೆರೆಗೆ ಬಂದಿದ್ದ 'ಗ್ರಾಮಾಯಾಣ' 4ನೇ ದಿನಕ್ಕೆ ಕಾಲಿಟ್ಟಿದೆ. ಇಂದು (ಜುಲೈ 6) 'ಗ್ರಾಮಾಯಣ' ಅಸಲಿ ಪರೀಕ್ಷೆಗೆ ಮುಂದಾಗಿದೆ. ಪ್ರತಿ ಹೊಸ ಸಿನಿಮಾಗಳು ಎದುರಿಸುವಂತೆ 'ಮಂಡೇ ಟೆಸ್ಟ್' ಎದುರಿಸುತ್ತಿದೆ. ಲಹರಿ ಸಂಸ್ಥೆ ನಿರ್ಮಾಣ ಮಾಡಿರುವ ಈ ಸಿನಿಮಾ ಕಳೆದ ಮೂರು ದಿನಗಳಲ್ಲಿ ಗಳಿಸಿದ ಕಲೆಕ್ಷನ್‌ನ ಅಂಕಿ-ಅಂಶಗಳ ಬಗ್ಗೆ ಚರ್ಚೆಯಾಗುತ್ತಿವೆ.

ವಿನಯ್ ರಾಜ್‌ಕುಮಾರ್, ಮೇಘಾ ಶೆಟ್ಟಿ, ಲೂಸ್ ಮಾದ ಯೋಗಿ ಪ್ರಮುಖ ಪಾತ್ರದಲ್ಲಿ ನಟಿಸಿರುವ 'ಗ್ರಾಮಾಯಣ' ಜುಲೈ 3 ರಂದು ರಾಜ್ಯಾದ್ಯಂತ ರಿಲೀಸ್ ಆಗಿತ್ತು. ಸಿನಿಮಾ ನೋಡಿದ ಪ್ರೇಕ್ಷಕರು ಮಿಶ್ರ ಪ್ರತಿಕ್ರಿಯೆಯನ್ನು ವ್ಯಕ್ತಪಡಿಸಿದ್ದರು. ಹೀಗಾಗಿ ಸಿನಿಮಾ ಕಲೆಕ್ಷನ್ ಬಗ್ಗೆ ಸಹಜವಾಗಿಯೇ ನಿರೀಕ್ಷೆ ಹುಟ್ಟಿಕೊಂಡಿದೆ. ಅದರಲ್ಲೂ ಲಹರಿ ಸಂಸ್ಥೆ ಸಿನಿಮಾ ನಿರ್ಮಾಣ ಮಾಡಿದ್ದರಿಂದ ಕಲೆಕ್ಷನ್ ಅಂಕಿ-ಅಂಶಗಳ ಬಗ್ಗೆ ಚರ್ಚೆ ಶುರುವಾಗಿದೆ. ಹಾಗಿದ್ದರೆ, ಮೊದಲ ಮೂರು ದಿನಗಳ ಕಲೆಕ್ಷನ್ ರಿಪೋರ್ಟ್ ಏನಿದೆ? ವೀಕೆಂಡ್‌ನಲ್ಲಿ ಕಲೆಕ್ಷನ್ ಹೇಗಿದೆ? ತಿಳಿಯುವುದಕ್ಕೆ ಮುಂದೆ ಓದಿ.

'ಗ್ರಾಮಾಯಣ' ಭಾನುವಾರದ ಕಲೆಕ್ಷನ್

ಲಹರಿ ಸಂಸ್ಥೆ ನಿರ್ಮಿಸಿರುವ 'ಗ್ರಾಮಾಯಣ' ಟೀಸರ್, ಹಾಡುಗಳಿಂದ ಸದ್ದು ಮಾಡಿತ್ತು. ಸ್ಯಾಂಡಲ್‌ವುಡ್‌ನಲ್ಲಿ ಈ ವರ್ಷ ಹಿಟ್ ಸಿನಿಮಾಗಳ ಸಾಲಿಗೆ ಸೇರಬಹುದೆಂಬ ನಿರೀಕ್ಷೆಯಿದೆ. ಹೀಗಾಗಿ ಸ್ಯಾಂಡಲ್‌ವುಡ್‌ ಮಂದಿ ಮೊದಲ ಮೂರು ದಿನಗಳ ಬಾಕ್ಸಾಫೀಸ್ ಲೆಕ್ಕಾಚಾರ ಹಾಕುತ್ತಿದ್ದಾರೆ. ಬಾಕ್ಸಾಫೀಸ್ ಅಂಕಿ-ಅಂಶಗಳನ್ನು ವರದಿ ಮಾಡುವ Sacnilk ಪ್ರಕಾರ ಭಾನುವಾರ ಮೊದಲೆರಡು ದಿನಗಳಿಗಿಂತ ಹೆಚ್ಚು ಕಲೆಕ್ಷನ್ ಆಗಿದೆ. ಅಂದರೆ, 3ನೇ ದಿನ 40 ಲಕ್ಷ ರೂಪಾಯಿ (Net) ಗಳಿಕೆ ಆಗಿದೆ ಎಂದು ಹೇಳಲಾಗಿದೆ.

3 ದಿನಗಳಲ್ಲಿ ಕೋಟಿ ದಾಟಿತೇ?

ಯಾವುದೇ ಹೊಸ ಸಿನಿಮಾ ಆಗಿದ್ದರೂ ಮೊದಲ ಮೂರು ದಿನಗಳ ಕಲೆಕ್ಷನ್ ತುಂಬಾನೇ ಮುಖ್ಯ. 'ಗ್ರಾಮಾಯಣ'ಗೂ ಮೊದಲ ಮೂರು ದಿನಗಳ ಕಲೆಕ್ಷನ್ ಅಷ್ಟೇ ಅನಿವಾರ್ಯವಾಗಿತ್ತು. Sacnilk ವರದಿ ಮಾಡಿದಂತೆ ಈ ಸಿನಿಮಾ ಮೊದಲ ಮೂರು ದಿನಗಳಲ್ಲಿ ಸುಮಾರು 1 ಕೋಟಿ 8 ಲಕ್ಷ ರೂಪಾಯಿ ಕಲೆಕ್ಷನ್ ಮಾಡಿದೆ. ಮೊದಲ ದಿನಗಳ ಕಲೆಕ್ಷನ್ ರಿಪೋರ್ಟ್ ಹೀಗಿದೆ.

ಗ್ರಾಮಾಯಣ ಬಾಕ್ಸಾಫೀಸ್ ಕಲೆಕ್ಷನ್

1ನೇ ದಿನ ₹32 ಲಕ್ಷ (Net)
2ನೇ ದಿನ ₹32 ಲಕ್ಷ (Net)
3ನೇ ದಿನ ₹44 ಲಕ್ಷ (Net)
ಒಟ್ಟು ₹1.08 ಕೋಟಿ (Net)
₹1.20 ಕೋಟಿ (Gross)

ಪಂಡಿತರ ಲೆಕ್ಕಾಚಾರವೇನು?

'ಗ್ರಾಮಾಯಣ' ಮೊದಲ ಮೂರು ದಿನದ ಕಲೆಕ್ಷನ್ ಸ್ಯಾಂಡಲ್‌ವುಡ್ ಮಂದಿ ಕೊಂಚ ಮಟ್ಟಿಗೆ ಸಮಾಧಾನ ತಂದಿದೆ. ಅದರಲ್ಲೂ ಭಾನುವಾರದ ಕಲೆಕ್ಷನ್ ಭರವಸೆ ಮೂಡಿಸಿದೆ. ಒಂದು ವಾರ ಕಳೆಯುವುದರೊಳಗೆ ಕಲೆಕ್ಷನ್ ಏನಾದರೂ 2 ಕೋಟಿಗೂ ಅಧಿಕ ದಾಟಿದರೆ, ನಿರ್ಮಾಪಕರು ಎರಡನೇ ವಾರದಿಂದ ಲಾಭವನ್ನು ನೋಡಬಹುದು ಎಂಬುವುದು ಸ್ಯಾಂಡಲ್‌ವುಡ್ ಮಂದಿಯ ಲೆಕ್ಕಾಚಾರ.

ಮಂಡೆ ಟೆಸ್ಟ್ ಪಾಸಾಗಬೇಕು

ಮೊದಲ ಮೂರು ದಿನ ಹೇಗೋ ಕಲೆಕ್ಷನ್ ಕೋಟಿ ದಾಟಿದೆ. ಭಾನುವಾರ ಕೂಡ ಹೆಚ್ಚು ಕಡಿಮೆ ₹50 ಲಕ್ಷದ ಹತ್ತಿರ ಕಲೆಕ್ಷನ್ ಆಗಿದೆ. ಹೀಗಾಗಿ ಸೋಮವಾರದ ಗಳಿಕೆ ಮೇಲೆ ಸಿನಿಮಾ ಭವಿಷ್ಯ ಲೆಕ್ಕಾಚಾರ ಹಾಕಲಾಗುತ್ತಿದೆ. ಒಂದು ವೇಳೆ 'ಗ್ರಾಮಾಯಣ' ಸಿನಿಮಾ ಸೋಮವಾರವೂ 30 ಲಕ್ಷ ರೂಪಾಯಿ ಮೇಲೆ ಕಲೆಕ್ಷನ್ ಆದರೆ, ಮೊದಲ ವಾರ 2 ಕೋಟಿ ರೂಪಾಯಿ ಕಲೆಕ್ಷನ್‌ಗೆ ಮೋಸವಿಲ್ಲ.

Disclaimer: ಈ ವರದಿಯಲ್ಲಿ ನೀಡಲಾಗಿರುವ ಸಿನಿಮಾದ ಬಾಕ್ಸ್ ಆಫೀಸ್ ಅಂಕಿ ಅಂಶಗಳ ಮಾಹಿತಿಯನ್ನು https://www.sacnilk.com ಬೇರೆ ಮೂಲಗಳು ಹಾಗೂ ನಿರ್ಮಾಣ ಸಂಸ್ಥೆಗಳು ಹಾಗೂ ಸಾರ್ವಜನಿಕವಾಗಿ ಲಭ್ಯವಿರುವ ಹಲವು ವೇದಿಕೆಗಳಿಂದ ತೆಗೆದುಕೊಳ್ಳಲಾಗಿದೆ. ಸಿನಿಮಾಗೆ ಸಂಬಂಧಿಸಿದ ಬಾಕ್ಸ್ ಆಫೀಸ್ ಕಲೆಕ್ಷನ್‌ಗಳ ಕುರಿತು ಪ್ರಕಟಿಸುವ ವರದಿಗಳಿಗೆ ಫಿಲ್ಮಿಬೀಟ್ ಯಾವುದೇ ಜವಾಬ್ದಾರಿಯನ್ನು ತೆಗೆದುಕೊಳ್ಳುವುದಿಲ್ಲ.