ವೀಕೆಂಡ್ ಬಾಕ್ಸಾಫೀಸ್‌ನಲ್ಲಿ '777 ಚಾರ್ಲಿ' ಜೊತೆ ಗೆದ್ದು ಬೀಗಿದ ಸಿನಿಮಾಗಳ ಕಲೆಕ್ಷನ್ ಎಷ್ಟು?

ಜುರಾಸಿಕ್ ವರ್ಲ್ಡ್ ಕಲೆಕ್ಷನ್ ಎಷ್ಟು?

ಹಾಲಿವುಡ್ ಸಿನಿಮಾ 'ಜುರಾಸಿಕ್ ವರ್ಲ್ಡ್ ಡೊಮಿನಿಯನ್' ಜೂನ್ 10ರಂದು ಭಾರತದಲ್ಲಿ ಬಿಡುಗಡೆಯಾಗಿದೆ. 'ಜುರಾಸಿಕ್ ಪಾರ್ಕ್' ಸಿರೀಸ್‌ನ ಕೊನೆಯ ಸರಣಿ ಭಾರತದ ಬಾಕ್ಸಾಫೀಸ್‌ನಲ್ಲಿ ಚಿಂದಿ ಉಡಾಯಿಸುತ್ತಿದೆ. ಮೊದಲ ವೀಕೆಂಡ್‌ನಲ್ಲಿ ಸಿನಿಮಾ ಕಲೆಕ್ಷನ್ ಉತ್ತಮವಾಗಿದೆ. ಭಾನುವಾರ ಜುರಾಸಿಕ್ ವರ್ಲ್ಡ್ ಡೊನಿಯನ್ 14 ಕೋಟಿ ರೂ. ಕಲೆಕ್ಷನ್ ಮಾಡಿದೆ ಎಂದು ಸಿನಿಮಾ ಪಂಡಿತರು ಲೆಕ್ಕ ಕೊಟ್ಟಿದ್ದಾರೆ. ಇವರ ಲೆಕ್ಕದ ಪ್ರಕಾರ ಮೂರು ದಿನಗಳಲ್ಲಿ ಸಿನಿಮಾ 37.54 ಕೋಟಿ ರೂ. ಕಲೆಕ್ಷನ್ ಆಗಿದೆ.

'ಅಂಟೆ ಸುಂದರಾನಿಕಿ' ಕಲೆಕ್ಷನ್ ಎಷ್ಟು?

'777 ಚಾರ್ಲಿ'ಗೆ ಹೋಲಿಸಿದರೆ, ನಾನಿ ಸಿನಿಮಾ 'ಅಂಟೆ ಸುಂದರಾನಿಕಿ' ಕಲೆಕ್ಷನ್ ಅಷ್ಟೇನು ಆಶಾದಾಯಕವಾಗಿಲ್ಲ. ಮೊದಲ ಮೂರು ದಿನ 'ಅಂಟೆ ಸುಂದರಾನಿಕಿ' ಕಲೆಕ್ಷನ್ ಸಾಧಾರಣವೆನಿಸಿದೆ. ನಾನಿ ಹಾಗೂ ನಜ್ರಿಯಾ ಜೋಡಿ ಕಾಮಿಡಿ ಸೆಂಟಿಮೆಂಟ್ ಸಿನಿಮಾ ಮೂರು ದಿನಗಳಲ್ಲಿ 10 ಕೋಟಿ ರೂ. ಕಲೆಕ್ಷನ್ ಮಾಡಿದೆ.

ಮೊದಲ ದಿನ 3.87 ಕೋಟಿ ರೂ.
ಎರಡನೇ ದಿನ 3.48 ಕೋಟಿ ರೂ.
ಮೂರನೇ ದಿನ 3 ಕೋಟಿ ರೂ.

ಒಟ್ಟು 10.35 ಕೋಟಿ ರೂ.

'ಜನ್‌ ಹಿತ್ ಮೇ ಜಾರಿ' ಸಿನಿಮಾ

ಬಾಲಿವುಡ್‌ನಲ್ಲಿ ಸ್ಮಾಲ್ ಬಜೆಟ್ ಸಿನಿಮಾವೊಂದು ಕಳೆದ ವಾರ ರಿಲೀಸ್ ಆಗಿತ್ತು. ಕಾಮಿಡಿ ಸಿನಿಮಾವೊಂದು ಬಾಕ್ಸಾಫೀಸ್‌ನಲ್ಲಿ ದೊಡ್ಡ ಮಟ್ಟಕ್ಕೆ ಸದ್ದು ಮಾಡುವಲ್ಲಿ ಸೋತಿದೆ. ಕಳೆದ ಮೂರು ದಿನಗಳಲ್ಲಿ ಈ ಸಿನಿಮಾ 2 ಕೋಟಿ ರೂ. ಗಡಿ ದಾಟಿದೆಯಷ್ಟೆ. ಮೊದಲ ದಿನ 43 ಲಕ್ಷ ರೂ. ಎರಡನೇ ದಿನ 83 ಲಕ್ಷ ರೂ. ಮೂರನೇ ದಿನ 94 ಲಕ್ಷ ರೂ. ಗಳಿಸಿದ್ದು, ಒಟ್ಟು ಗಳಿಕೆ 2.20 ಕೋಟಿ ರೂ. ದಾಟಿದೆ.

'ಭುಲ್ ಭುಲಯ್ಯ 2' ಗಳಿಸಿದ್ದೆಷ್ಟು?

ಕಾರ್ತಿಕ್ ಆರ್ಯನ್ ಸಿನಿಮಾ 'ಭುಲ್ ಭುಲಯ್ಯ 2' ಹೊಸ ಸಿನಿಮಾಗಳೊಂದಿಗೆ ಅಖಾಡಕ್ಕಿಳಿದಿದೆ. ನಾಲ್ಕನೇ ವಾರವೂ ಸಿನಿಮಾ ಕಲೆಕ್ಷನ್ ಅದ್ಭುತವಾಗಿದೆ. ಈ ವೀಕೆಂಡ್‌ನಲ್ಲಿ 8.37 ಕೋಟಿ ರೂ. ಗಳಿಸಿದ್ದು, ನಾಲ್ಕನೇ ಭಾನುವಾರ 3.80 ಕೋಟಿ ರೂ. ಗಳಿಸಿದೆ. ಈ ಮೂಲಕ ಒಟ್ಟು ಗಳಿಕೆ 171.52 ಕೋಟಿ ರೂ. ಗಳಿಸಿದೆ.

ಕಮಲ್ ಹಾಸನ್ 'ವಿಕ್ರಂ'

ಕಮಲ್ ಹಾಸನ್ ಸಿನಿಮಾ 'ವಿಕ್ರಂ' ಬಾಕ್ಸಾಫೀಸ್‌ನಲ್ಲಿ ಇನ್ನೂ ತನ್ನ ಆರ್ಭಟವನ್ನು ಮುಂದುವರೆಸಿದೆ. ಕಮಲ್ ಹಾಸನ್ ಸಿನಿಮಾ 'ವಿಕ್ರಂ' ಬಾಕ್ಸಾಫೀಸ್‌ನಲ್ಲಿ ಈ ವಾರಾಂತ್ಯಕ್ಕೆ 300 ಕೋಟಿ ರೂ. ಕಲೆಕ್ಷನ್ ಮಾಡಿದೆ.

'777 ಚಾರ್ಲಿ' ಗಳಿಕೆ ಎಷ್ಟು?

ಕನ್ನಡದ ಮತ್ತೊಂದು ಪ್ಯಾನ್ ಇಂಡಿಯಾ ಸಿನಿಮಾ '777 ಚಾರ್ಲಿ'ಗೆ ವಿಶ್ವದಾದ್ಯಂತ ಒಳ್ಳೆ ರೆಸ್ಪಾನ್ಸ್ ಸಿಕ್ಕಿದೆ. ದಿನದಿಂದ ದಿನಕ್ಕೆ ಬಾಕ್ಸಾಫೀಸ್ ಕಲೆಕ್ಷನ್ ಚೆನ್ನಾಗಿದೆ. ಮೂರು ದಿನಗಳಲ್ಲಿ ಈ ಸಿನಿಮಾದ ಒಟ್ಟು ಕಲೆಕ್ಷನ್ 23.50 ಕೋಟಿ ರೂ. ಗಳಿಸಿದೆ. ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ ಕೊಂಚ ಕಡಿಮೆ ಅಂತ ಅನಿಸಿದ್ದರು. ಪಾಸಿಟಿವ್ ಟಾಕ್‌ನಿಂದ ಸಿನಿಮಾ ನೋಡುವವರ ಸಂಖ್ಯೆ ಹೆಚ್ಚಾಗುತ್ತಿದೆ.