ಆಫರ್‌ಗಳಿಗಾಗಿ ದುಬಾರಿ ಸಂಭಾವನೆ ಇಳಿಸಿಕೊಂಡ್ರಾ ಪೂಜಾ ಹೆಗ್ಡೆ? ಸಿನಿಮಾ ಮಂದಿ ಹೇಳೋದೇನು?

ಪೂಜಾ–ಹೆಗ್ಡೆ ಉತ್ತರ ದಕ್ಷಿಣದಲ್ಲಿ ಬ್ಯುಸಿ?

ಪೂಜಾ ಹೆಗ್ಡೆ ನಿರಂತರವಾಗಿ ಫ್ಲಾಪ್ ಸಿನಿಮಾಗಳನ್ನು ಕೊಟ್ಟಿದ್ದನ್ನು ಅಲ್ಲಗೆಳೆಯುವಂತಿಲ್ಲ. ಆದರೂ, ಕೈಯಲ್ಲಿ ಸಿನಿಮಾ ಇಲ್ಲ ಅನ್ನುವಂತೇನು ಇಲ್ಲ. ಬಾಲಿವುಡ್‌ನಲ್ಲಿ ಬಾಕ್ಸಾಫೀಸ್ ಸುಲ್ತಾನ್ ಸಲ್ಮಾನ್ ಖಾನ್ ಅಭಿನಯದ 'ಕಿಸಿ ಕಿ ಭಾಯ್ ಕಿಸಿ ಕಾ ಜಾನ್' ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಹಾಗೇ ಟಾಲಿವುಡ್‌ನಲ್ಲಿ ಸೂಪರ್‌ಸ್ಟಾರ್ ಮಹೇಶ್ ಬಾಬು ಸಿನಿಮಾಗೆ ಲೀಡ್ ಹೀರೊಯಿನ್ ಆಗಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾವನ್ನು ತ್ರಿಮಿಕ್ರಮ್ ನಿರ್ದೇಶನ ಮಾಡುತ್ತಿದ್ದಾರೆ. ಇವೆರಡು ಸಿನಿಮಾಗಳು ಬಿಟ್ಟರೆ ಮತ್ಯಾವುದೇ ಹೊಸ ಪ್ರಾಜೆಕ್ಟ್ ಕೈಯಲ್ಲಿ ಇಲ್ಲ. ಹೀಗಾಗಿ ಹೊಸ ಆಫರ್‌ಗಳನ್ನು ಗಿಟ್ಟಿಸಿಕೊಳ್ಳುವುದಕ್ಕೆ ಪೂಜಾ ಹೆಗ್ಡೆ ಸಂಭಾವನೆಯನ್ನೇ ಕಡಿಮೆ ಮಾಡಿಕೊಳ್ಳುತ್ತಿದ್ದಾರೆ ಅನ್ನೋದ ಸುದ್ದಿ ಹರಿದಾಡುತ್ತಿದೆ.

ಪೂಜಾ ಹೆಗ್ಡೆ ಸಂಭಾವನೆಗೆ ಕತ್ತರಿ

ಪೂಜಾ ಹೆಗ್ಡೆ ಕೈಯಲ್ಲಿ ಎರಡು ಸೂಪರ್‌ಸ್ಟಾರ್ ಸಿನಿಮಾಗಳಿವೆ. ಈ ಎರಡೂ ಸಿನಿಮಾಗಳೂ ಗಲ್ಲಲೇ ಬೇಕಿದೆ. ಒಂದ್ವೇಳೆ ಇವೂ ಮಕಾಡೆ ಮಲಗಿದೆ, ಪೂಜಾ ಹೆಗ್ಡೆಗೆ ಸಂಕಷ್ಟ ಕಟ್ಟಿಟ್ಟ ಬುತ್ತಿನೇ. ಅದಕ್ಕೆ ತನ್ನ ಸಂಭಾವನೆಯನ್ನೇ ಕಡಿಮೆ ಮಾಡಿಕೊಳ್ಳುವುದಕ್ಕೆ ನಿರ್ಧಾರ ಮಾಡಿದ್ದಾರೆ ಅಂತ ಟಾಲಿವುಡ್ ಮಾಧ್ಯಮಗಳು ವರದಿ ಮಾಡಿದೆ. ಬರೋಬ್ಬರಿ ಬ್ಯಾಕ್ ಟು ಬ್ಯಾಕ್ 4 ಸಿನಿಮಾಗಳು ಬಾಕ್ಸಾಫೀಸ್‌ನಲ್ಲಿ ಸೋತಿದ್ದರಿಂದ ಸಂಭಾವನೆ ಕಡಿತಗೊಳಿಸಿಕೊಳ್ಳಲೇ ಬೇಕಾದ ಅನಿವಾರ್ಯತೆ ಎದುರಾಗಿದ್ಯಂತೆ.

ಪೂಜಾ ಹೆಗ್ಡೆ ಸಂಭಾವನೆ ಎಷ್ಟು?

ಪೂಜಾ ಹೆಗ್ಡೆ ಟಾಲಿವುಡ್‌ನ ನಂ 1 ನಟಿ ಅನ್ನೋ ಪಟ್ಟಕ್ಕೆ ಏರಿದ್ದಾಗ, ಭಾರಿ ಸಂಭಾವನೆ ಕೇಳುತ್ತಿದ್ದರಂತೆ. ಟಾಲಿವುಡ್ ಮೂಲಗಳ ಪ್ರಕಾರ, ಪೂಜಾ ಹೆಗ್ಡೆ ಸರಿ ಸುಮಾರು 3 ರಿಂದ 3.5 ಕೋಟಿ ರೂ. ಸಂಭಾವನೆ ಪಡೆಯುತ್ತಿದ್ದರಂತೆ. ಆದ್ರೀಗ ಸಿನಿಮಾ ಸೋತಿದ್ದರಿಂದ ಆಫರ್‌ಗಳಿಗೋಸ್ಕರ ತಾನಾಗಿಯೇ ಸಂಭಾವನೆ ಕಡಿಮೆ ಮಾಡಿಕೊಂಡಿದ್ದಾರೆ ಅಂತ ಟಾಲಿವುಡ್‌ನಲ್ಲಿ ಚರ್ಚೆಯಾಗುತ್ತಿದೆ.

2 ಸಿನಿಮಾದಿಂದ ಪೂಜಾ ಹೆಗ್ಡೆ ಔಟ್

ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ ಮಿಂಚಿರೋ ಪೂಜಾ ಹೆಗ್ಡೆ ಈಗ ಸಿನಿಮಾ ಮಂದಿ ಪಾಲಿಗೆ ಫ್ಲಾಪ್ ಸ್ಟಾರ್. ಚಿರಂಜೀವಿ ರಾಮ್ ಚರಣ್ ಅಭಿನಯದ 'ಆಚಾರ್ಯ', ಪ್ರಭಾಸ್ ನಟನೆಯ 'ರಾಧೆಶ್ಯಾಮ್', ರಣ್‌ವೀರ್ ಸಿಂಗ್ ಸಿನಿಮಾ 'ಸರ್ಕಸ್', ದಳಪತಿ ವಿಜಯ್ ಸಿನಿಮಾ 'ಬೀಸ್ಟ್' ಇಷ್ಟರಲ್ಲೂ ನಟಿಸಿದ್ದರು. ಅವೆಲ್ಲವೂ ಬಾಕ್ಸಾಫೀಸ್‌ನಲ್ಲಿ ಸೋತಿವೆ. ಅಲ್ಲದೆ 'ಭವದೀಯುಡು ಭಗತ್ ಸಿಂಗ್' ಸಿನಿಮಾದಿಂದ ಕೈ ಬಿಟ್ಟಿದ್ದು, ವಿಜಯ್ ದೇವರಕೊಂಡ ಜೊತೆ ನಟಿಸಬೇಕಿದ್ದ ಸಿನಿಮಾ 'ಜನಗನಮನ' ನಿಂತೇ ಹೋಗಿದೆ. ಹೀಗಾಗಿ ಮಹೇಶ್ ಬಾಬು ಜೊತೆ ನಟಿಸುತ್ತಿರೋ ಸಿನಿಮಾ ಗೆದ್ದರೆ, ಪೂಜಾ ಹೆಗ್ಡೆ ಖದರ್ ಮತ್ತೆ ಹೆಚ್ಚಾಗಬಹುದು.