ರಾಜಮೌಳಿ ಸಿನಿಮಾದಲ್ಲಿ ಮಹೇಶ್ ಬಾಬು ಪಾತ್ರವೇನು? ಜೇಮ್ಸ್ ಬಾಂಡ್ ಲುಕ್ ಕೊಟ್ಟಿದ್ದೇಕೆ?

ಬಾಂಡ್ ಲುಕ್‌ನಲ್ಲಿ ಮಹೇಶ್ ಬಾಬು

ಮೂವಿ ಮಾಂತ್ರಿಕ ರಾಜಮೌಳಿ, ಟಾಲಿವುಡ್‌ ಸೂಪರ್‌ಸ್ಟಾರ್‌ಗೆ ಯಾವ ಪಾತ್ರ ಕೊಡಬಹುದು? ಸಿನಿಮಾದ ಕಥೆ ಹೇಗಿರಬಹುದು? ಅಂತ ಪ್ರಿನ್ಸ್ ಅಭಿಮಾನಿಗಳು ತಲೆಗೆ ಹುಳ ಬಿಟ್ಟುಕೊಂಡಿದ್ದಾರೆ. ಈ ಮಧ್ಯೆ ಟಾಲಿವುಡ್‌ನಲ್ಲಿ ಕಿಕ್ಕೇರಿಸುವ ಸುದ್ದಿಯೊಂದು ಓಡಾಡುತ್ತಿದೆ. ಸೋಶಿಯಲ್ ಮೀಡಿಯಾದಲ್ಲಿ ಮಹೇಶ್ ಬಾಬು ಲುಕ್ ಬಗ್ಗೆನೇ ಚರ್ಚೆಯಾಗುತ್ತಿದೆ. ಪ್ರಿನ್ಸ್ ಈ ಸಿನಿಮಾದಲ್ಲಿ ಜೇಮ್ಸ್ ಬಾಂಡ್‌ಗೆ ಹೋಲುವ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನುವ ಸುದ್ದಿ ಹಬ್ಬಿದೆ.

ಪ್ರಿನ್ಸ್ ಜೇಮ್ಸ್ ಬಾಂಡ್: ಸುದ್ದಿ ಹಬ್ಬಿದ್ದೇಗೆ?

ರಾಜಮೌಳಿ ಸಿನಿಮಾದಲ್ಲಿ ಮಹೇಶ್ ಬಾಬು ಪಕ್ಕಾ ಜೇಮ್ಸ್ ಬಾಂಬ್‌ನಂತಹ ಪಾತ್ರದಲ್ಲಿ ನಟಿಸಲಿದ್ದಾರೆ ಎಂದು ಚರ್ಚೆಯಾಗುತ್ತಿದೆ. ಅಸಲಿಗೆ ಈ ಚರ್ಚೆ ಆರಂಭ ಶುರುವಾಗುವುದಕ್ಕೆ ಕಾರಣ, ಮ್ಯಾಗಜೀನ್ ಒಂದಕ್ಕೆ ಮಹೇಶ್ ಬಾಬು ನೀಡಿದ ಪೋಸ್ . ಸ್ಟೈಲಿಶ್ ಕಾರಿನ ಮುಂದೆ ಅಷ್ಟೇ ಸ್ಟೈಲಿಶ್ ಆಗಿ ಮಹೇಶ್ ಬಾಬು ಪೋಸ್ ನೀಡಿದ್ದೇ ಈ ಚರ್ಚೆಗೆ ಕಾರಣ. ಅಲ್ಲದೆ ಸೋಶಿಯಲ್ ಮೀಡಿಯಾದಲ್ಲಿ ಇದೊಂದು ಲುಕ್ ಬಗ್ಗೆ ಜನರ ಅಭಿಪ್ರಾಯ ತಿಳಿಯಲೆಂದೇ ಮ್ಯಾಗಜೀನ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ ಅಂತಾನೂ ಹೇಳುತ್ತಿದ್ದಾರೆ.

ಮಹೇಶ್‌ ಬಾಬುಗೆ ಅಡ್ವೆಂಚರ್ ಸಿನಿಮಾ

ರಾಜಮೌಳಿ ಮುಂದೆ ನಿರ್ದೇಶಿಸಲಿರುವ ಸಿನಿಮಾದಲ್ಲಿ ಅಡ್ವೆಂಚರ್ ಕಥೆ ಇದ್ದು, ಮಹೇಶ್ ಬಾಬುಗೆ ನಿರ್ದೇಶನ ಮಾಡಲು ಸಜ್ಜಾಗುತ್ತಿದ್ದಾರೆ. ಈ ಸಿನಿಮಾದ ಬಜೆಟ್ ಸುಮಾರು 800 ಕೋಟಿ ಎಂದು ಅಂದಾಜಿಸಲಾಗುತ್ತಿದೆ. ಈ ಮಧ್ಯೆ ಮಹೇಶ್ ಬಾಬು ಮ್ಯಾಗಜೀನ್ ಲುಕ್ ಬಗ್ಗೆ ಚರ್ಚೆ ಶುರುವಾಗಿದ್ದು, ಬಾಂಡ್ ಅಂತಹ ಪಾತ್ರದಲ್ಲಿ ಕಾಣಿಸಿಕೊಳ್ಳಬಹುದು ಅನ್ನು ಅನುಮಾನ ಮೂಡುತ್ತಿದೆ. ಈ ಮಧ್ಯೆ ಅಭಿಮಾನಿಗಳು ಅತ್ಯದ್ಭುತವಾದ ಆಕ್ಷನ್ ಸಿನಿಮಾದಲ್ಲಿ ನಟಿಸಬೇಕು ಎಂದು ಕಮೆಂಟ್ ಮಾಡುತ್ತಿದ್ದಾರೆ.

ಸದ್ಯಕ್ಕಿಲ್ಲ ರಾಜಮೌಳಿ ಸಿನಿಮಾ

'ಸರ್ಕಾರು ವಾರಿ ಪಾಟ' ಸಿನಿಮಾ ಬಳಿಕ ಮಹೇಶ್ ಬಾಬು ರಾಜಮೌಳಿ ತಂಡ ಸೇರಿಕೊಳ್ಳಬಹುದು ಎಂದು ನಂಬಲಾಗಿತ್ತು. ಆದರೆ, ಅದಕ್ಕೂ ಮುನ್ನ ಮಹೇಶ್ ಬಾಬು ಇನ್ನೊಂದು ಸಿನಿಮಾದಲ್ಲಿ ನಟಸಲಿದ್ದಾರೆ. ತ್ರಿವಿಕ್ರಮ್ ಶ್ರೀನಿವಾಸ್ ನಿರ್ದೇಶನದ ಚಿತ್ರದಲ್ಲಿ ಮಹೇಶ್ ಬಾಬು ನಟಿಸಲಿದ್ದು, ಬಳಿಕ ರಾಜಮೌಳಿ ಚಿತ್ರದಲ್ಲಿ ನಟಿಸಲಿದ್ದಾರೆ.