ಯಶ್ ರಾಜ್ ಸ್ಟುಡಿಯೋದಲ್ಲಿ ಅರ್ಜುನ್ ಜನ್ಯ,ಪ್ರೇಮ್: ಪಕ್ಕದಲ್ಲಿರೋ ದಿಗ್ಗಜ ಯಾರು?

ಮ್ಯೂಸಿಕ್ ಮೂಡ್ನಲ್ಲಿ ಅರ್ಜುನ್ ಜನ್ಯ!

ಜೋಗಿ ಪ್ರೇಮ್ ಆಕ್ಷನ್ ಪ್ರಿನ್ಸ್ ಧ್ರುವ ಸರ್ಜಾಗೆ ಆಕ್ಷನ್ ಕಟ್ ಹೇಳುತ್ತಿರೋದು ಗೊತ್ತೇ ಇದೆ. ಈ ಸಿನಿಮಾಗಾಗಿಯೇ ಮ್ಯೂಸಿಕ್ ಕಂಪೋಸ್ ಮಾಡಲಾಗುತ್ತಿದೆ. ಸದ್ಯ ಚಿತ್ರತಂಡ ಹಲವು ಫೋಟೊಗಳನ್ನು ಶೇರ್ ಮಾಡಿಕೊಂಡಿದೆ. ಸಂಗೀತ ಕ್ಷೇತ್ರದ ದಿಗ್ಗಜ ತೌಫಿಕ್ ಖುರೇಶಿ ಜೊತೆ ಅರ್ಜುನ್ ಜನ್ಯ ಕೈ ಜೋಡಿಸಿದ್ದಾರೆ. ಸಿನಿಮಾಗೆ ಬೇಕಿರೋ ರಿಧಂಗಳನ್ನು ರೆಕಾರ್ಡ್ ಮಾಡಲಾಗುತ್ತಿದ್ದು, ಮುಂಬೈನ ವೈಆರ್‌ಎಫ್ ಸ್ಟುಡಿಯೋದಲ್ಲಿ ಬೀಡು ಬಿಟ್ಟಿದ್ದಾರೆ.

ತೌಫಿಕ್ ಖುರೇಶಿ ಯಾರು?

ಅರ್ಜುನ್ ಜನ್ಯ ಹಾಗೂ ಪ್ರೇಮ್ ಜೊತೆ ಫೋಟೊದಲ್ಲಿ ಕಾಣಿಸಿಕೊಳ್ಳುತ್ತಿರುವ ದಿಗ್ಗಜ ತೌಫಿಕ್ ಖುರೇಷಿ. ಖ್ಯಾತ ತಬಲ ವಾದಕ ಜಾಕಿರ್ ಹುಸೇನ್ ಅವರ ಸಹೋದರ. ಸಂಗೀತ ಕ್ಷೇತ್ರದಲ್ಲಿ ತೌಫಿಕ್ ಖುರೇಶಿ ಸಾಧನೆ ಕೂಡ ಬಹಳ ದೊಡ್ಡದಿದೆ. ಈತ ಖ್ಯಾತ ಜಂಬೆ ವಾದಕನಾಗಿದ್ದು, ಪ್ರೇಮ್ ಹಾಗೂ ಧ್ರುವ ಸರ್ಜಾ ಕಾಂಬಿನೇಷನ್ ಸಿನಿಮಾಗೆ ಬೇಕಾಗಿರೋ ರಿಧಂಗಳನ್ನು ರೆಕಾರ್ಡ್ ಮಾಡುವುದಕ್ಕೆ ಅರ್ಜುನ್ ಜರ್ನಾಗೆ ನೆರವು ನೀಡುತ್ತಿದ್ದಾರೆ.

ಅಂಡರ್‌ವರ್ಲ್ಡ್ ಕಥೆನಾ?

ಜೋಗಿ ಪ್ರೇಮ್ ಹಾಗೂ ಧ್ರುವ ಸರ್ಜಾ ಕಾಂಬಿನೇಷನ್‌ ಕುತೂಹಲ ದುಪ್ಪಟ್ಟಾಗಿದೆ. ಅಂದ್ಹಾಗೆ ಇದು ಜೋಗಿ ಪ್ರೇಮ್ ನಿರ್ದೇಶನ 9ನೇ ಸಿನಿಮಾ. ಈ ಬಾರಿ ಪ್ರೇಮ್ 70 ದಶಕದ ಭೂಗಲೋಕದ ಕಥೆಯನ್ನು ಹೇಳುತ್ತಿದ್ದಾರೆ ಎನ್ನಲಾಗಿದೆ. ಕೊತ್ವಾಲ್ ರಾಮಚಂದ್ರ ಹಾಗೂ ಎಂ ಪಿ ಜೈರಾಜ್ ಕಾಲ ಭೂಗತಲೋಕದ ಕತೆಯೊಂದನ್ನುತೆರೆಮೇಲೆ ತರಲು ಹೊರಟಿದ್ದಾರೆ ಅನ್ನೋ ಮಾತಿದೆ. ಇದು 1968 ಮತ್ತು 1978 ರ ನಡುವೆ ಕಾಲಘಟ್ಟದ ನೈಜ ಘಟನೆಯನ್ನು ಆಧರಿಸಿದೆ ಅನ್ನೋ ಮಾತಿದೆ.

ಸಂಗೀತವೂ ಪ್ರಧಾನ

ಜೋಗಿ ಪ್ರೇಮ್ ನಿರ್ದೇಶನದ 'ಕರಿಯಾ', 'ಜೋಗಿ', 'ಜೋಗಯ್ಯ' ದಂತಹ ಸಿನಿಮಾಗಳನ್ನು ನೋಡಿದರೆ, ಸಂಗೀತ ಪ್ರಮುಖ ಪಾತ್ರವಹಿಸಿತ್ತು. ಇದು ಭೂಗತಲೋಕದ ಕಥೆಯಾಗಿದ್ದರೂ, ಪ್ರೇಮ್ ಸಂಗೀತಕ್ಕೆ ಹೆಚ್ಚು ಪ್ರಾಮುಖ್ಯತೆ ನೀಡಿದ್ದಾರೆ ಎನ್ನಲಾಗಿದೆ. ಇನ್ನೊಂದು ಕಡೆ ಕೆವಿಎನ್ ಪ್ರೊಡಕ್ಷನ್‌ನಂತಹ ಸಂಸ್ಥೆ ಈ ಸಿನಿಮಾಗೆ ಬಂಡವಾಳವನ್ನು ಹೂಡುತ್ತಿದೆ. ಹೀಗಾಗಿ ಈ ಬಾರಿ ಆಕ್ಷನ್ ಪ್ರಿನ್ಸ್ ಫ್ಯಾನ್ಸ್‌ಗೆ ಸಖತ್ ಸಿನಿಮಾ ಸಿಗೋದು ಗ್ಯಾರಂಟಿ ಅನ್ನೋ ಮಾತು ಗಾಂಧಿನಗರದಲ್ಲಿದೆ.