ಬಂಗಾರದ ಮನುಷ್ಯ ಚಿತ್ರವನ್ನು 60 ಬಾರಿ ನೋಡಿದ ಎಚ್ಡಿಕೆ

| Published: Thursday, January 5, 2012, 17:30 [IST]

ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿಗೂ ಸಿನಿಮಾರಂಗಕ್ಕೂ ಅಚ್ಚುಮೆಚ್ಚಿನ ನಂಟು. ವಿತರಕರಾಗಿ, ನಿರ್ಮಾಪಕರಾಗಿ ಗುರುತಿಸಿಕೊಂಡಿರುವ ಕುಮಾರಣ್ಣ ರಾಜಕೀಯದಲ್ಲಿ ಬಿಡುವು ಸಿಕ್ಕಾಗಲೆಲ್ಲಾ ಚಿತ್ರರಂಗದಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳುತ್ತಾರೆ. ಕನ್ನಡ ಚಿತ್ರರಂಗದ ಹೆಮ್ಮೆಯ "ಬಂಗಾರದ ಮನುಷ್ಯ" ಚಿತ್ರವನ್ನು ಕುಮಾರಸ್ವಾಮಿ ಬರೋಬರಿ 60 ಬಾರಿ ನೋಡಿದ್ದಾರಂತೆ.

ಟಿ ಕೆ ರಾಮರಾವ್ ಕಾದಂಬರಿ ಆಧಾರಿತ ಬಂಗಾರದ ಮನುಷ್ಯ ಮಾರ್ಚ್ 1972ರಲ್ಲಿ ತೆರೆ ಕಂಡಿತ್ತು. ನನ್ನ 13ನೇ ವಯಸ್ಸಿನಲ್ಲೇ ಈ ಚಿತ್ರವನ್ನು ನೋಡಿದ್ದೆ. ಮನಸಿಗೆ ಸ್ಫೂರ್ತಿ ನೀಡುವ ಚಿತ್ರವಿದು. ನಾನು ಅಣ್ಣಾವ್ರ ಅಭಿಮಾನಿ. ಚಿತ್ರ ಮರು ಬಿಡುಗಡೆ ಆದಾಗಲೆಲ್ಲಾ ಮತ್ತೆ ಮತ್ತೆ ಈ ಚಿತ್ರವನ್ನು ನೋಡುತ್ತಿದ್ದೆ. ನಾನು ಈ ಚಿತ್ರವನ್ನು ಅರವತ್ತು ಬಾರಿ ನೋಡಿದ್ದೇನೆ ಎಂದು ತನ್ನ ಫ್ಲ್ಯಾಶ್ ಬ್ಯಾಕ್ ಅನ್ನು ಮೆಲುಕು ಹಾಕಿದ್ದಾರೆ.

ಡಾ. ರಾಜಕುಮಾರ್, ಭಾರತಿ, ವಜ್ರಮುನಿ, ಬಾಲಕೃಷ್ಣ ಪ್ರಮುಖ ತಾರಾಗಣದಲ್ಲಿರುವ ಬಂಗಾರದ ಮನುಷ್ಯ ಚಿತ್ರವನ್ನು ಬಹುಷಃ ಕನ್ನಡಿಗರೆಂದೂ ಮರೆಯಲಾರರು. ದಾಖಲೆಗಳ ಮೇಲೆ ದಾಖಲೆ ಬರೆದ ಈ ಚಿತ್ರ ಕನ್ನಡ ಚಿತ್ರರಂಗಕ್ಕೆ ಹೊಸ ಆಯಾಮವನ್ನೇ ನೀಡಿತ್ತು.

ಡಾ. ರಾಜಕುಮಾರ್ ರಾಜೀವ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಸಾಮಾಜಿಕ ಹಿತಾಶಕ್ತಿಯುಳ್ಳ ಈ ಚಿತ್ರ ವೀಕ್ಷಿಸಿದ ಹಲವು ಯುವಕರು ಮನಪರಿವರ್ತನೆ ಗೊಂಡು ಕೃಷಿಗೆ ಆದ್ಯತೆ ನೀಡಿದ ಉದಾಹರಣೆ ಬಹಳಷ್ಟಿವೆ.

(ಕೃಪೆ:ಸಿನಿಗಂಧ)