Dhananjaya Wedding Live: ಮೈಸೂರಿನಲ್ಲಿ ಡಾಲಿ ಧನಂಜಯ್ ಮದುವೆ; ಹೇಗಿದೆ ಶಾಸ್ತ್ರಗಳು? ಯಾರೆಲ್ಲ ಸೆಲೆಬ್ರಿಟಿಗಳು ಬಂದ್ರು?

ಡಾಲಿ ಧನಂಜಯ್ ಮದುವೆಗೆ ಕನ್ನಡ ಚಿತ್ರರಂಗದ ಹಲವು ತಾರೆಯರು ಆಗಮಿಸಿ ಶುಭಾಶಯ ತಿಳಿಸಿದ್ದಾರೆ. ಮುಹೂರ್ತ, ಮಾಂಗಲ್ಯ ಧಾರಣೆಯ ಬಳಿಕ ನಟ ಶಿವರಾಜ್ ಕುಮಾರ್ ಅವರು ಡಾಲಿ ಮದುವೆಗೆ ಆಗಮಿಸಿದ್ದರು.ಮದುವೆ ಮಂಟಪಕ್ಕೆ ನಟ ಶಿವರಾಜ್‌ ಕುಮಾರ್ ಆಗಮಿಸುತ್ತಿದ್ದಂತೆ ಡಾಲಿ ಧನಂಜಯ್ ಭಾವುಕರಾಗಿ ತಬ್ಬಿಕೊಂಡರು. ಶಿವಣ್ಣನನ್ನು ಪ್ರೀತಿಯಿಂದ ಅಪ್ಪಿಕೊಂಡ ಡಾಲಿ ಧನಂಜಯ್ ವಿಶೇಷ ಧನ್ಯವಾದ ತಿಳಿಸಿದರು.ಕಾಲಿಗೆ ಬೀಳಲು ಬಂದ ಡಾಲಿ ಧನಂಜಯ್‌ನನ್ನು ಶಿವಣ್ಣ ತಡೆದು ಸರಳತೆ ಮೆರೆದು ಧನ್ಯತಾಗೂ ಮದುವೆ ಶುಭ ಹಾರೈಸಿದರು.

ಡಾಲಿ ಧನಂಜಯ್ ಅವರ ಮದುವೆಗೆ ಇಂದು ಕನ್ನಡ ಚಿತ್ರರಂಗದ ಗೋಲ್ಡನ್ ಕ್ವೀನ್ ರಮ್ಯಾ ಅವರು ಆಗಮಿಸಿದ್ದಾರೆ. ಡಾಲಿ ಧನಂಜಯ್ ಮತ್ತು ಡಾಕ್ಟರ್ ಧನ್ಯತಾಗೆ ಶುಭಾಶಯವನ್ನು ಕೋರಿದ್ದಾರೆ. ರಮ್ಯಾ ಜೊತೆ ನಿರ್ದೇಶಕಿ ಕವಿತಾ ಲಂಕೇಶ್ ಕೂಡ ಬಂದು ನವ ಜೋಡಿಗೆ ಶುಭ ಹಾರೈಸಿದ್ದಾರೆ. ಆ ನಂತರ ನಾಲ್ಕು ಜನ ಗ್ರೂಪ್ ಫೋಟೊ ಕ್ಲಿಕಿಸಿಕೊಂಡಿದ್ದಾರೆ.

ಇಬ್ಬರೂ ಬ್ಯುಸಿಯಾಗಿದ್ದೇವೆ. ಧನ್ಯತಾ ಅವರಿಗೂ ಸಾಕಷ್ಟು ಪೇಷೆಂಟ್‌ಗಳು ಕಾಯುತ್ತಿರುತ್ತಾರೆ. ಹೀಗಾಗಿ ಮದುವೆ ಬಳಿಕ ಚಿಕ್ಕದೊಂದು ಬ್ರೇಕ್ ಕೊಟ್ಟಿದ್ದೇವೆ ಅಷ್ಟೇ. ಮಾರ್ಚ್ 1ರಿಂದ ಮತ್ತೆ ಇಬ್ಬರೂ ಕೆಲಸಕ್ಕೆ ಮರಳುತ್ತೇವೆ ಎಂದಿದ್ದಾರೆ ಡಾಲಿ ಧನಂಜಯ್.

ಸಂಪ್ರದಾಯದ ಬಗ್ಗೆ ಪ್ರಶ್ನೆ ಮಾಡುತ್ತಿರುವವರಿಗೆ ಧನ್ಯವಾದಗಳು. ಪ್ರಶ್ನೆ ಮಾಡುತ್ತಿರುವವರ ಆಶೀರ್ವಾದ ಕೂಡ ಇರಲಿ. ನಾನೊಬ್ಬ ಕಲಾವಿದ ನನಗೆ ಎಲ್ಲಾ ಅನುಭವಗಳು ಮುಖ್ಯ ಎಂದಿದ್ದಾರೆ ಡಾಲಿ ಧನಂಜಯ್.

ಡಾಲಿ ಧನಂಜಯ್ ಮದುವೆ ಬಳಿಕ ತಮ್ಮ ಸಂಪ್ರದಾಯದ ಬಗ್ಗೆ ಹೇಳಿಕೊಂಡಿದ್ದಾರೆ. ಮನೆಯಲ್ಲಿ ಶಾಸ್ತ್ರಗಳನ್ನು ಮಾಡಿದ್ದಾರೆ. ಕೆಂಡ ತುಳಿದಿದ್ದು ನಾನು ಚಿಕ್ಕಂದಿನಿಂದ ತುಳಿದುಕೊಂಡು ಬಂದಿದ್ದೇನೆ. ಅದು ನನಗೆ ಜಾನಪದ. ವೀರಭದ್ರನನ್ನು ಇಟ್ಕೊಂಡಿರುವುದು ನನಗೆ ಜಾನಪದ ಅದು. ಒಂದು ಮಗು ತರ ಎಂಜಾಯ್ ಮಾಡಿದ್ದೇನೆ. ಅದರಲ್ಲಿ ನನಗೆ ತಪ್ಪೇನು ಕಂಡಿಲ್ಲ.

ಡಾಲಿ ಮದುವೆ ಸಮಾರಂಭದಲ್ಲಿ ಸೆಟ್ಟು, ಅಲಂಕಾರಗಳು ಪ್ರಮುಖ ಆಕರ್ಷಣೆಯಾಗಿದ್ದವು. ಅದರಂತೆಯೇ ಸುಗಮ ಸಂಗೀತವನ್ನು ಆಯೋಜನೆ ಮಾಡಲಾಗಿತ್ತು. ವಿವಾಹಕ್ಕೆ ಬರುವವರಿಗೆ ಕೆಲ ಹೊತ್ತು ಕೂತು ಸುಗಮ ಸಂಗೀತವನ್ನು ಕೇಳುವ ಅವಕಾಶವನ್ನು ಮಾಡಿಕೊಡಲಾಗಿದೆ.

ಡಾಲಿ ಧನಂಜಯ್ ಹಾಗೂ ಧನ್ಯತಾ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದು ವಿಶ್ ಮಾಡುವುದಕ್ಕೆ ಅಭಿಮಾನಿಗಳು ಸಹಸ್ರಾರು ಸಂಖ್ಯೆಯಲ್ಲಿ ಆಗಮಿಸುತ್ತಿದ್ದಾರೆ. ತಮ್ಮ ಶುಭ ಕೋರಲು ಬಂದ ಪ್ರತಿಯೊಬ್ಬ ಅಭಿಮಾನಿಯಿಂದ ಶುಭಾಶಯಗಳನ್ನು ಸ್ವೀಕರಿಸುತ್ತಿರುವ ಡಾಲಿ ದಂಪತಿ.

ಸಪ್ತಪದಿ ತುಳಿಯುವ ಮುನ್ನ ಡಾಲಿ ಧನಂಜಯ್ ಮತ್ತು ಡಾಕ್ಟರ್ ಧನ್ಯತಾಗೆ ಕಂಕಣ ಕಟ್ಟಿ, ಬಾಸಿಂಗ ಧಾರಣೆ ಮಾಡಲಾಯಿತು. ಇದೇ ವೇಳೆ ಧನಂಜಯಗೆ ಅವರ ಮಾವ ಚಿನ್ನದ ಸರ ಹಾಗೂ ಬ್ರಾಸ್​ಲೈಟ್ ಹಾಕಿದರು. ಇದಾದ ಮೇಲೆ ಮಂಟಪದಲ್ಲಿ ಗೌರಿ ಪೂಜೆಯನ್ನು ವಿಜೃಂಭಣೆಯಿಂದ ಮಾಡಲಾಯಿತು.

ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿರುವ ಡಾಲಿ ಧನಂಜಯ್‌ ಹಾಗೂ ಧನ್ಯತಾಗೆ ತರುಣ್ ಸುಧೀರ್ ಹಾಗೂ ಪತ್ನಿ ಸೋನಾಲ್ ಮಾಂತೇರೋ ಶುಭ ಕೋರಿದ್ದಾರೆ. ತರುಣ್ ಸುದೀಪ್‌ ಟ್ರೆಡಿಷನಲ್ ಲುಕ್‌ನಲ್ಲಿ ಮಿಂಚಿದ್ದರು.

ಡಾಲಿ ಧನಂಜಯ್ ಮತ್ತು ಡಾಕ್ಟರ್ ಧನ್ಯತಾ ಅವರಿಗೆ ಶುಭ ಕೋರಲು ಅನೇಕ ಅಭಿಮಾನಿಗಳು ಬಂದಿದ್ದಾರೆ.ಸರತಿ ಸಾಲಿನಲ್ಲಿ ಬಂದು ತಮ್ಮ ನೆಚ್ಚಿನ ನಾಯಕ ಡಾಲಿಗೆ ಮದುವೆಯ ಶುಭ ಕೋರಿ ಸೆಲ್ಫಿಯನ್ನು ಕ್ಲಿಕಿಸಿಕೊಳ್ಳುತ್ತಿದ್ದಾರೆ. ಬಂದ ಎಲ್ಲರನ್ನೂ ಅಷ್ಟೇ ಪ್ರೀತಿಯಿಂದ ಡಾಲಿ ಧನಂಜಯ್ ಮಾತನಾಡಿಸಿ ಕಳುಹಿಸುತ್ತಿದ್ದಾರೆ.

ಡಾಲಿ ಧನಂಜಯ್ ಮತ್ತು ಡಾಕ್ಟರ್ ಧನ್ಯತಾ ಅವರ ಹೊಸ ಬದುಕಿಗೆ ಶುಭಾಶಯ ಕೋರಲು ಡಾಲಿ ಧನಂಜಯ್ ಅವರ ಅತ್ಯಾಪ್ತ ವಸಿಷ್ಠ ಸಿಂಹ ಬಂದಿದ್ದಾರೆ. ತಮ್ಮ ಸ್ನೇಹಿತನಿಗೆ ಶುಭಾಶಯವನ್ನು ಕೋರಿದ್ದಾರೆ. ಚಿನ್ನದ ಸರವನ್ನು ಉಡುಗೊರೆಯನ್ನಾಗಿ ನೀಡಿದ್ದಾರೆ.

ಇಂದು ಹೊಸ ಬದುಕಿಗೆ ಮುನ್ನುಡಿ ಬರೆದ ಡಾಲಿ ಧನಂಜಯ್ ಇಂದು ಮದುವೆಗೆ ವರೈಟಿ ಭಕ್ಷ್ಯಗಳನ್ನು ತಮ್ಮ ಮದುವೆ ಮೆನುಗೆ ಸೇರಿಸಿದ್ದಾರೆ. ಬೆಳಗ್ಗೆ ತಿಂಡಿಗೆ ಕೇಸರಿ ಬಾತ್, ಇಡ್ಲಿ ಸಾಂಬಾರ್ ವಡೆ, ಖಾರಬಾತ್, ಸಿಹಿ, ಮಾಡಿಸಿರುವ ಡಾಲಿ ಧನಂಜಯ್ ಮಧ್ಯಾಹ್ನ ಊಟಕ್ಕೆ ಕೋಸಂಬರಿ, ಎರಡು ರೀತಿ ಪಲ್ಯ, ಪಾಯಸ, ಚಿರೋಟಿ, ಲಾಡು, ವೆಜ್ ಬೋಂಡಾ. ಅಕ್ಕಿರೊಟ್ಟಿ ಎಣ್ಣೆಗಾಯಿ, ರೈತ, ವೆಜ್ ಪಲಾವ್. ಅನ್ನ ಸಾಂಬಾರ್, ರಸಂ, ಮಜ್ಜಿಗೆಯನ್ನೊಂದಿರುವ ಮೆನುಗೆ ಜೈ ಎಂದಿದ್ದಾರೆ. ಬಾಳೆಹಣ್ಣು, ಐಸ್ ಕ್ರೀಂ, ಕೂಡ ಮೆನುಗೆ ಸೇರಿಸಿದ್ದಾರೆ.

ಡಾಲಿ ಧನಂಜಯ ಮತ್ತು ಧನ್ಯತಾ ಅವರ ಹಸೆಮಣೆ ಏರಿದ್ದಾರೆ. ಇಂದು (ಫೆ.16) ಮೈಸೂರಿನಲ್ಲಿ ವಿವಾಹ ನಡೆದಿದೆ. ಧನಂಜಯ ಅವರು ತಾಳಿ ಕಟ್ಟುತ್ತಿದ್ದಂತೆಯೇ ಧನ್ಯತಾ ಎಮೋಷನಲ್ ಆಗಿದ್ದಾರೆ. ತಾಳಿಯನ್ನು ಕಣ್ಣಿಗೆ ಒತ್ತಿಕೊಂಡಿದ್ದಾರೆ.

ಡಾಲಿ ಧನಂಜಯ್ ಮತ್ತು ಧನ್ಯತಾ ಹಸೆಮಣೆ ಏರ್ತಿರೋ ಲಗ್ನ ತುಂಬ ವಿಶೇಷವಾದ ಲಗ್ನವಂತೆ. ಲಕ್ಷ ದೋಷ ಇದ್ರೂ ನಿವಾರಣೆ ಆಗೋ ಲಗ್ನ ಇದಂತೆ. ಬೆಳಗ್ಗೆ 8 ಗಂಟೆಯಿಂದ 10.30ರ ತನಕ ಮುಹೂರ್ತ ಇದೆ. ಗಣಪತಿ ಚೌತಿ ಇರೋದ್ರಿಂದ ಈ ಮದುವೆ ತುಂಬಾ ಸ್ಪೆಷಲ್ ಅನ್ನೋದು ಪುರೋಹಿತರ ಮಾತು.

ಡಾಲಿ ಧನಂಜಯ್ ಕಲ್ಯಾಣೋತ್ಸವ ಸಂಭ್ರಮಕ್ಕೆ ಸಾಂಸ್ಕೃತಿಕ ನಗರಿ ಸಾಕ್ಷಿಯಾಗಿದೆ. ಅದ್ಧೂರಿ ಅರತಕ್ಷತೆಯಲ್ಲಿ ಚಂದನವನದ ನಟ-ನಟಿಯರು ಭಾಗಿಯಾಗಿ ಶುಭ ಹಾರೈಸಿದ್ದಾರೆ. ಇಂದು ಡಾಕ್ಟರ್-ಆಕ್ಟರ್ ವಿವಾಹವಾಗಲಿದ್ದು, ಬೆಳಗ್ಗೆಯಿಂದಲೇ ಮದುವೆ ಶಾಸ್ತ್ರಗಳು ಆರಂಭವಾಗಿವೆ.

ಮೈಸೂರಿನ ವಸ್ತು ಪ್ರದರ್ಶನ ಮೈದಾನದಲ್ಲಿ ಡಾಲಿ ಧನಂಜಯ ಅವರ ಮದುವೆ ನಡೆಯುತ್ತಿದೆ. ಡಾಕ್ಟರ್ ಧನ್ಯತಾ ಜೊತೆ ಧನಂಜಯ ಅವರು ವೈವಾಹಿಕ ಜೀವನಕ್ಕೆ ಕಾಲಿಡುತ್ತಿದ್ದಾರೆ. ತುಂಬ ಅದ್ದೂರಿಯಾಗಿ ಮದುವೆಯ ಸೆಟ್ ಹಾಕಲಾಗಿದೆ. ದೇವಸ್ಥಾನದ ಥೀಮ್​ನಲ್ಲಿ ಸೆಟ್ ನಿರ್ಮಾಣ ಆಗಿದೆ. ಶಿವ-ಪಾರ್ವತಿ ಮುಂತಾದ ದೇವರ ವಿಗ್ರಹಗಳನ್ನು ಇರಿಸಲಾಗಿದೆ.

ದೊಡ್ಡ ಸಂಖ್ಯೆಯಲ್ಲಿ ಅಭಿಮಾನಿಗಳು ನಟ ಧನಂಜಯ್-ಧನ್ಯತಾ ಆರತಕ್ಷತೆ ಕಾರ್ಯಕ್ರಮಕ್ಕೆ ಹಾಜರಾಗಿದ್ದರು. ಅತಿಥಿಗಳ ಜೊತೆ ಜೊತೆಗೆ ವೇದಿಕೆ ಏರಿ ಜೋಡಿ ಶುಭಹಾರೈಸುತ್ತಿದ್ದಾರೆ. ಅವರನ್ನು ನಿಯಂತ್ರಿಸಲು ಬೌನ್ಸರ್ಸ್ ಹಾಗೂ ಧನಂಜಯ್ ಸ್ನೇಹಿತರು ಹರಸಾಹಸಪಡುವಂತಾಗಿದೆ.

ಧನಂಜಯ್-ಧನ್ಯತಾ ಆರತಕ್ಷತೆ ಕಾರ್ಯಕ್ರಮಕ್ಕೆ ಅಮೂಲ್ಯ ತಮ್ಮ ಪತಿ ಜಗದೀಶ್ ಜೊತೆ ಆಗಮಿಸಿದ್ದರು. ಇನ್ನು ನಟರಾದ ಸೃಜನ್ ಲೋಕೇಶ್, ಝೈದ್ ಖಾನ್ ಕೂಡ ಜೋಡಿ ಶುಭ ಹಾರೈಸಿದರು.

ನಿರ್ದೇಶಕ ಪ್ರೇಮ್, ನಟಿ ರಕ್ಷಿತಾ ದಂಪತಿ ಕೂಡ ಧನಂಜಯ್-ಧನ್ಯತಾ ಜೋಡಿ ಆರತಕ್ಷತೆ ಕಾರ್ಯಕ್ರಮಕ್ಕೆ ಹಾಜರಾಗಿದ್ದರು. ಕೆವಿಎನ್ ಪ್ರೊಡಕ್ಷನ್ಸ್ ವೆಂಕಟ್ ಕೋನಂಕಿ ಸೇರಿದಂತೆ ಹಲವರು ಬಂದು ಶುಭ ಹಾರೈಸಿದ್ದಾರೆ. ಅಭಿಮಾನಿಗಳು ಕೂಡ ನೆಚ್ಚಿನ ನಟನ ಕೈ ಕುಲುಕಿ ಶುಭ ಕೋರುತ್ತಿದ್ದಾರೆ. ನಟಿಯರಾದ ಶ್ರುತಿ ಹರಿಹರನ್, ನಿಧಿ ಸುಬ್ಬಯ್ಯ, ಶ್ರದ್ದಾ ಶ್ರೀನಾಥ್ ಸಹ ಆಗಮಿಸಿದ್ದಾರೆ.

ಮಾಜಿ ಸಂಸದ ಡಿಕೆ ಸುರೇಶ್ ಕೂಡ ಧನಂಜಯ್- ಧನ್ಯತಾ ಜೋಡಿಗೆ ಶುಭಕೋರಿದ್ದಾರೆ. ಕೆಲ ದಿನಗಳ ಹಿಂದೆ ಡಿಸಿಎಂ ಡಿಕೆ ಶಿವಕುಮಾರ್ ಹಾಗೂ ಮಾಜಿ ಸಂಸದ ಡಿಕೆ ಸುರೇಶ್ ಅವರಿಗೆ ಧನಂಜಯ್ ಆಮಂತ್ರಣ ನೀಡಿದ್ದರು.

ಸಂಸದ ಯದುವೀರ್, ಬಿಜೆಪಿ ರಾಜ್ಯಾಧ್ಯಕ್ಷ ಬಿ. ಎಸ್ ವಿಜಯೇಂದ್ರ ಕೂಡ ಧನಂಜಯ್- ಧನ್ಯತಾ ಜೋಡಿ ಶುಭ ಹಾರೈಸಿದ್ದಾರೆ. ನಟ ಶ್ರೀನಗರ ಕಿಟ್ಟಿ, ನಿರ್ಮಾಪಕ ಕೆ. ಮಂಜು ಸೇರಿದಂತೆ ಹಲವರು ಧನು-ಧನ್ಯಾ ಆರತಕ್ಷತೆ ಕಾರ್ಯಕ್ರಮಕ್ಕೆ ಸಾಕ್ಷಿ ಆಗಿದ್ದಾರೆ.

ಉಪೇಂದ್ರ- ಪ್ರಿಯಾಂಕ ಹಾಗೂ ಧ್ರುವ ಸರ್ಜಾ- ಪ್ರೇರಣಾ ದಂಪತಿ ಕೂಡ ಧನು-ಧನ್ಯಾ ಮದುವೆ ಆರತಕ್ಷತೆ ಕಾರ್ಯಕ್ರಮಕ್ಕೆ ಹಾಜರಾಗಿದ್ದಾರೆ. ಜೋಡಿಗೆ ಶುಭ ಹಾರೈಸಿದ್ದಾರೆ. ವೇದಿಕೆ ಮೇಲೆ ಒಮ್ಮೆಲೆ ಹೆಚ್ಚು ಜನ ಹತ್ತಿರುವುದರಿಂದ ಕೊಂಚ ಗೊಂದಲದ ವಾತಾವರಣ ನಿರ್ಮಾಣವಾಗಿದೆ.

ನಟ ರಾಕ್ಷಸ ಡಾಲಿ ಧನಂಜಯ್ ವಿವಾಹಕ್ಕೆ 'ಪುಷ್ಪ 2' ನಿರ್ದೇಶಕ ಬೆಳಗ್ಗೆಯೇ ಆಗಮಿಸಿದ್ದರು. ಆರತಕ್ಷತೆಗೆ ವೇದಿಕೆ ಮೇಲೆ ಬರುವುದಕ್ಕೂ ಮುನ್ನವೇ ಭೇಟಿ ಮಾಡಿ ಶುರು ಕೋರಿದ್ದ ಸುಕುಮಾರ್ ಆರತಕ್ಷತೆಗೆ ವೇದಿಕೆ ಮೇಲೆ ಬಂದು ಮಿಸ್ಟರ್ ಅಂಡ್ ಮಿಸ್ಸಸ್ ಡಾಲಿಗೆ ಹೂವಿನ ಗುಚ್ಛ ಕೊಟ್ಟು ಶುಭ ಹಾರೈಸಿದ್ದಾರೆ.

ಧನು-ಧನ್ಯಾ ಆರತಕ್ಷತೆ ಕಾರ್ಯಕ್ರಮದಲ್ಲಿ ತೆಲುಗು ನಿರ್ದೇಶಕ ಸುಕುಮಾರ್ ಭಾಗಿ ಆಗಿದ್ದಾರೆ. ತೆಲುಗಿನ 'ಪುಷ್ಪ' ಸರಣಿ ಸೇರಿದಂತೆ ಹಲವು ಹಿಟ್ ಸಿನಿಮಾಗಳನ್ನು ಅವರು ನಿರ್ದೇಶನ ಮಾಡಿದ್ದಾರೆ. 'ಪುಷ್ಪ' ಚಿತ್ರದಲ್ಲಿ ಜಾಲಿರೆಡ್ಡಿಯಾಗಿ ಧನಂಜಯ್ ಅಬ್ಬರಸಿದ್ದರು.

ಮಾಧ್ಯಮಗಳ ಜೊತೆ ಸಂಗೀತ ನಿರ್ದೇಶಕ ವಾಸುಕಿ ವೈಭವ್ ಮಾತನಾಡಿ "ಬಹಳ ಖುಷಿಯಾಗುತ್ತಿದೆ. ಸಿಕ್ಕಾಪಟ್ಟೆ ಒಳ್ಳೆ ಜೋಡಿ. ಜೋಡಿ ನೋಡೋಕೆ ಖುಷಿಯಾಗುತ್ತಿದೆ ಎಂದು ಹೇಳಿದ್ದಾರೆ. ಶಾಸಕರಾದ ಪ್ರದೀಪ್ ಈಶ್ವರ್ ಮಾತನಾಡಿ "ಧನಂಜಯ್ ಆತ್ಮೀಯ ಸ್ನೇಹಿತರು, ಅವ್ರಿಗೆ ಒಳ್ಳೆದಾಗ್ಬೇಕು, ಕಷ್ಟಪಟ್ಟು ಮೇಲೆ ಬಂದವ್ರು, ಒಳ್ಳೆದಾದಲಿ ಎಂದು ಶುಭ ಹಾರೈಸೋಕೆ ಬಂದಿದ್ದೀನಿ" ಎಂದಿದ್ದಾರೆ.

ಕನ್ನಡ ಚಿತ್ರರಂಗದ ಸ್ಟಾರ್ ದಂಪತಿ ಮಾಳವಿಕಾ ಅವಿನಾಶ್ ಹಾಗೂ ಅವಿನಾಶ್ ಇಬ್ಬರೂ ಮೈಸೂರಿಗೆ ಬಂದು ಡಾಲಿ ಧನಂಜಯ್ ಹಾಗೂ ಧನ್ಯತಾಗೆ ಶುಭ ಕೋರಿದ್ದಾರೆ. ವೇದಿಕೆಗೆ ಬಂದು ಇಬ್ಬರಿಗೂ ಆಶೀರ್ವಾದ ಮಾಡಿದ್ದಾರೆ.

ನಿರ್ಮಾಪಕಿ ಅಶ್ವಿನಿ ಪುನೀತ್ ರಾಜ್‌ಕುಮಾರ್ ಸಹ ಮೈಸೂರಿನಲ್ಲಿ ನಡೆಯುತ್ತಿರುವ ಧನಂಜಯ್-ಧನ್ಯತಾ ಮದುವೆ ಸಮಾರಂಭದಲ್ಲಿ ಭಾಗಿ ಆಗಿದ್ದಾರೆ. ನವ ಜೋಡಿಗೆ ಶುಭ ಹಾರೈಸಿದ್ದಾರೆ. ನಟ ಶ್ರೀಮುರಳಿ ಕೂಡ ವೇದಿಕೆ ಏರಿದ್ದಾರೆ.

ಮಾಜಿ ಸಚಿವ ಶ್ರೀರಾಮುಲು ಬಳಿಕ ಶಾಸಕ ಅಶ್ವಥ್ ನಾರಾಯಣ್ ವೇದಿಕೆಗೆ ಆಗಮಿಸಿದ್ದಾರೆ. ಧನಂಜಯ್- ಧನ್ಯತಾ ಜೋಡಿಗೆ ಶುಭ ಹಾರೈಸಿದ್ದಾರೆ. ಇನ್ನು ಸಾಕಷ್ಟು ರಾಜಕೀಯ ಮುಖಂಡರು ಕಾರ್ಯಕ್ರಮದಲ್ಲಿ ಭಾಗಿ ಆಗಲಿದ್ದಾರೆ.

ಸ್ನೇಹಿತರು, ಬಂಧುಗಳು, ಅಭಿಮಾನಿಗಳು ವೇದಿಕೆ ಏರಿ ಧನಂಜಯ್ - ಧನ್ಯಾತಾ ಜೋಡಿಗೆ ಶುಭ ಹಾರೈಸಿದ್ದಾರೆ. ಅತಿಥಿಗಳಿಗೆಲ್ಲಾ ತರಹೇವಾರಿ ಊಟದ ವ್ಯವಸ್ಥೆ ಮಾಡಲಾಗಿದೆ. ಅಭಿಮಾನಿಗಳು, ಸೆಲೆಬ್ರೆಟಿಗಳು ಎಲ್ಲರಿಗೂ ಒಂದೇ ತರಹದ ಮೆನ್ಯು ಇದೆ. ಆದರೆ ಬೇರೆ ಬೇರೆ ಕೌಂಟರ್‌ಗಳಲ್ಲಿ ಊಟಕ್ಕೆ ವ್ಯವಸ್ಥೆ ಮಾಡಲಾಗಿದೆ.

ಮೈಸೂರಿನಲ್ಲಿ ನಡೆಯುತ್ತಿರುವ ಧನಂಜಯ್-ಧನ್ಯತಾ ಮದುವೆ ಆರತಕ್ಷತೆ ಕಾರ್ಯಕ್ರಮಕ್ಕೆ ಮಲ್ಲೇಶ್ವರಂ ಶಾಸಕ ಅಶ್ವಥ್ ನಾರಾಯಣ ಆಗಮಿಸಿದ್ದಾರೆ. ನವ ಜೋಡಿಗೆ ಶುಭ ಹಾರೈಸಿದ್ದಾರೆ.

ಡಾಲಿ ಧನಂಜಯ್ ಹಾಗೂ ಧನ್ಯತಾ ಮದುವೆ ಕಾಂಗೆಸ್ ಮುಖಂಡ ಹಾಗೂ ಶಾಸಕ ಜಮೀರ್ ಅಹಮದ್ ಖಾನ್ ಆಗಮಿಸಿದ್ದಾರೆ. ವಧು ವರರಿಬ್ಬರಿಗೂ ಆಶೀರ್ವಾದ ಮಾಡಿ ಶುಭ ಕೋರಿದ್ದಾರೆ.

ಹಾಸನ ಜಿಲ್ಲೆಯ ಅರಸೀಕೆರೆ ಕಾಂಗ್ರೆಸ್‌ ಶಾಸಕ ಶಿವಲಿಂಗೇಗೌಡ ಧನಂಜಯ್- ಧನ್ಯತಾ ಮದುವೆ ಆರತಕ್ಷತೆ ಕಾರ್ಯಕ್ರಮಕ್ಕೆ ಹಾಜರಾಗಿದ್ದಾರೆ. ವೇದಿಕೆ ಮುಂಭಾಗದಲ್ಲಿ ಕುಳಿತಿದ್ದಾರೆ. ಇನ್ನು ಸಾಕಷ್ಟು ಗಣ್ಯರು ಕೆಲವೇ ಕ್ಷಣಗಳಲ್ಲಿ ಆಗಮಿಸಲಿದ್ದಾರೆ.

ಸ್ಯಾಂಡಲ್‌ವುಡ್ ನಟ ಡಾಲಿ ಧನಂಜಯ್ ಆರತಕ್ಷತೆಗೆ ಕರ್ನಾಟಕದ ರಾಜ್ಯಪಾಲರಾದ ಶ್ರೀ ಥಾವರ್‌ ಚಂದ್‌ ಗೆಹ್ಲೋಟ್‌ ಆಗಮಿಸಿ ವಧು ವರರಿಗೆ ಆಶೀರ್ವಾದ ಮಾಡಿದ್ದಾರೆ. ಇದೇ ವೇಳೆ ಧನಂಜಯ್ ಕುಟುಂಬದ ಕಡೆಯಿಂದ ರಾಜ್ಯಪಾಲರಿಗೆ ಸನ್ಮಾನ ಮಾಡಲಾಗಿದೆ.

ಡಾಲಿ ಧನಂಜಯ್ ಹಾಗೂ ಧನ್ಯತಾ ಆರತಕ್ಷತೆ ಅದ್ಧೂರಿಯಾಗಿ ಮೈಸೂರಿನಲ್ಲಿ ನಡೆಯುತ್ತಿದೆ. ಇಬ್ಬರೂ ಆರತಕ್ಷತೆಗೆ ವೇದಿಕೆ ಮೇಲೆ ಬಂದಿದ್ದಾರೆ. ಮಿರಮಿರ ಮಿಂಚುವ ಶೇರ್ವಾನಿಯಲ್ಲಿ ಡಾಲಿ ಧನಂಜಯ್ ಕಂಡರೆ, ಇತ್ತ ಧನ್ಯತಾ ಕೂಡ ಮ್ಯಾಚಿಂಗ್ ಡ್ರೆಸ್‌ನಲ್ಲಿ ಕಂಗೊಳಿಸಿದ್ದಾರೆ.

ಮದುವೆ ಆಗಲ್ಲ ಅಂತ ಹೇಳುತ್ತಿದ್ದ. ಆದರೆ, ಈಗ ಇಡೀ ಕರ್ನಾಟಕಕ್ಕೆ ಗೊತ್ತಾಗುವ ಹಾಗೆ ಆಗುತ್ತಿದ್ದಾನೆ. ತುಂಬಾನೇ ಖುಷಿಯಾಗುತ್ತಿದೆ. ಅವನನ್ನು ಮದುವೆ ಮಾಡುವುದೇ ಒಂದು ಟೆನ್ಷನ್ ಆಗಿತ್ತು. ಆದ್ರೀಗ ಮನೆಯವರು ಹೇಳಿದಂತೆ ಮದುವೆ ಆಗುತ್ತಿದ್ದಾನೆ. ಐದು ವರ್ಷದಿಂದಲೂ ಮದುವೆ ಆಗುವಂತೆ ಹೇಳುತ್ತಲೇ ಇದ್ವಿ. ಆದರೆ, ಮದುವೆ ಆಗಿರಲಿಲ್ಲ ಎಂದು ತಾಯಿ ಸಾವಿತ್ರಮ್ಮ ಹೇಳಿದ್ದಾರೆ.

ಡಾಲಿ -ಧನ್ಯಾ ಮದುವೆಗೆ ಎರಡು ಮಂಟಪಗಳು ಸಿದ್ಧವಾಗಿದೆ. ಒಂದು ವೇದಿಕೆಯಲ್ಲಿ ಮದುವೆ ಆರತಕ್ಷತೆ ಕಾರ್ಯಕ್ರಮ ನಡೆಯಲಿದೆ. ಮತ್ತೊಂದು ವೇದಿಕೆಯಲ್ಲಿ ಧಾರಾ ಮುಹೂರ್ತಕ್ಕೆ ಸಿದ್ಧತೆ ಮಾಡಲಾಗಿದೆ. ಧಾರಾ ಮುಹೂರ್ತದ ಮಂಟಪವನ್ನು ದೇಗುಲದಂತೆ ನಿರ್ಮಿಸಲಾಗಿದ್ದು, ಆರತಕ್ಷತೆಯ ಸ್ಥಳವನ್ನು ಪ್ಯಾಲೇಸ್ ಥೀಮ್‌ನಲ್ಲಿ ನಿರ್ಮಾಣ ಮಾಡಲಾಗಿದೆ. ಈ ಸೆಟ್ ನಿರ್ಮಾಣದ ಜವಾಬ್ದಾರಿಯನ್ನು ಕಲಾ ನಿರ್ದೇಶಕ ಅರುಣ್ ಸಾಗರ್ ಹೊತ್ತುಕೊಂಡಿದ್ದಾರೆ.

ಮೈಸೂರಿನಲ್ಲಿ ಧನಂಜಯ್ ಹಾಗೂ ಧನ್ಯತಾ ಮದುವೆ ಕಳೆ ಕಟ್ಟಿದೆ. ಕೆಲವೇ ಕ್ಷಣಗಳಲ್ಲಿ ಆರತಕ್ಷತೆ ಕಾರ್ಯಕ್ರಮ ಶುರುವಾಗಲಿದೆ. ಸಿಎಂ ಸಿದ್ದರಾಮಯ್ಯ ಸೇರಿದಂತೆ ಸಾಕಷ್ಟು ರಾಜಕೀಯ ಗಣ್ಯರಿಗೆ ಧನು ಮದುವೆ ಆಮಂತ್ರಣ ನೀಡಿದ್ದಾರೆ. ಸಿಎಂ ಸಿದ್ದರಾಮಯ್ಯ, ಡಿಸಿಎಂ ಡಿಕೆ ಶಿವಕುಮಾರ್ ಸೇರಿದಂತೆ ಹಲವೂ ರಾಜಕೀಯ ಗಣ್ಯರು ಭಾಗಿ ಸಾಧ್ಯತೆಯಿದೆ. ಇನ್ನು ಅಭಿಮಾನಿಗಳಿಗೆ ವಿದ್ಯಾಪತಿ ದ್ವಾರದ ಮೂಲಕ ಪ್ರವೇಶಕ್ಕೆ ಅವಕಾಶ ಮಾಡಿಕೊಡಲಾಗಿದೆ.

ಡಾಲಿ ಧನಂಜಯ್ ಆರಕ್ಷತೆಯ ಫುಡ್ ಮೆನ್ಯೂ ಹೀಗಿದೆ. ಹೋಳಿಗೆ ತುಪ್ಪ, ಮಸಾಲ ದೋಸೆ, ತೆಂಗಿನಕಾಯಿ ಚಟ್ನಿ, ರೋಟಿ, ಗ್ರೇವಿ, ಬೇಬಿಕಾರ್ನ್ ಮಂಚೂರಿ, ಮೆಣಸಿಕಾಯಿ ಬಜ್ಜಿ, ಬೆಂಡೆಕಾಯಿ ಫ್ರೈ, ರೂಮಾಲಿ ರೋಟಿ, ವೆಜ್ ಬಿರಿಯಾನಿ, ರಾಯಿತಾ, ಅನ್ನ, ಸಾಂಬರ್, ರಸಂ, ಮೊಸರು ಇವಿಷ್ಟನ್ನು ಆರತಕ್ಷತೆಯಲ್ಲಿ ಅಭಿಮಾನಿಗಳು ಸವಿಯಬಹುದಾಗಿದೆ. ಒಂದು ಬ್ಯಾಚ್‌ಗೆ ಸುಮಾರು ಮೂರು ಸಾವಿರ ಮಂದಿ ಬಂದು ಊಟವನ್ನು ಮಾಡುವ ವ್ಯವಸ್ಥೆಯನ್ನು ಮಾಡಲಾಗಿದೆ. ವೃದ್ಧರಿಗೆ ಕೂತು ಊಟ ಮಾಡುವುದಕ್ಕೆ ಬಾಳೆ ಎಲೆ ಊಟದ ವ್ಯವಸ್ಥೆಯನ್ನು ಮಾಡಲಾಗಿದೆ. ಹಾಗೆ ಮಹಿಳೆಯರಿಗೆ ಒಂದು ಪ್ರತ್ಯೇಕ ಕೌಂಟರ್ ಇದೆ.

ಡಾಲಿ ಧನಂಜಯ್ ಹಾಗೂ ಧನ್ಯತಾ ಮದುವೆ ಸಮಾರಂಭಕ್ಕೆ ಎರಡು ರೀತಿಯ ಸೆಟ್ಟೆ ಸೆಟ್ಟೇರಿದೆ. ಆರತಕ್ಷತೆಗೆ ಮೈಸೂರು ಅರಮನೆಯನ್ನು ಗಮನದಲ್ಲಿ ಇಟ್ಟುಕೊಂಡು ಅಂತಹದ್ದೇ ಸೆಟ್‌ ಅನ್ನು ನಿರ್ಮಿಸಲಾಗಿದೆ. ನಾಳೆ ನಡೆಯಲಿರುವ ಮದುವೆ ಸಮಾರಂಭಕ್ಕೆ ದೇವಸ್ಥಾನದ ಸೆಟ್ ಅನ್ನು ಹಾಕಲಾಗಿದೆ. ಎರಡೂ ಸೆಟ್‌ಗಳನ್ನು ಅರುಣ್ ಸಾಗರ್ ನಿರ್ಮಾಣ ಮಾಡಿದ್ದಾರೆ.

ಧನಂಜಯ್ ಈ ಹಿಂದೆ ಹೇಳಿದಂತೆ ತಮ್ಮ ಮದುವೆ ಬರುವವರಿಗೆ ಹೋಳಿಗೆ ಊಟವನ್ನು ಹಾಕಿಸುತ್ತಿದ್ದಾರೆ. ಚಿತ್ರರಂಗದ ಗಣ್ಯರು, ರಾಜಕೀಯ ಮುಖಂಡರು, ಸಂಬಂಧಿಕರು ಹಾಗೂ ಅಭಿಮಾನಿಗಳು ಸೇರಿದಂತೆ ಸುಮಾರು 25 ಸಾವಿರದಿಂದ 30 ಸಾವಿರ ಮಂದಿಗೆ ಬರುವ ನಿರೀಕ್ಷೆಯಿದ್ದು, ಅವರಿಗೆ ಊಟದ ವ್ಯವಸ್ಥೆಯನ್ನು ಮಾಡಲಾಗಿದೆ.

ಧನಂಜಯ್ ಹಾಗೂ ಧನ್ಯತಾ ಮದುವೆಯಲ್ಲಿ ಇಂದು ಬೆಳಗ್ಗೆ ಬಳೆ ಶಾಸ್ತ್ರ ನಡೆದಿದೆ. ಧನ್ಯತಾ ಹಾಗೂ ಅವರ ಕುಟುಂಬಸ್ಥರು ಬಳೆಶಾಸ್ತ್ರದಲ್ಲಿ ಭಾಗಿಯಾಗಿದ್ದರು. ಮೈಸೂರಿನಲ್ಲಿ ಡಾಲಿ ಮದುವೆಯ ಶಾಸ್ತ್ರಗಳು ಆರಂಭ ಆಗಿವೆ.

ಕಳೆದೆರಡು ದಿನಗಳಿಂದ ಧನಂಜಯ್- ಧನ್ಯತಾ ಮದುವೆ ಶಾಸ್ತ್ರಗಳು ಜೋರಾಗಿ ನಡೀತಿದೆ. ಆರತಕ್ಷತೆಗೂ ಮುನ್ನ ಗಂಗೆ ತರೋ ಶಾಸ್ತ್ರ, ತಂದೆ ತಾಯಿಯರ ವಾಗ್ದಾನ ಶಾಸ್ತ್ರ, ವಧು ವರರ ನಿರೀಕ್ಷಣೆ ಶಾಸ್ತ್ರಗಳು ನಡೆದಿದೆ. ಧನ್ಯತಾ ಗೌರಿ ಪೂಜೆ ಮಾಡಿದ್ದಾರೆ. ಬಳೆ ಶಾಸ್ತ್ರವೂ ನಡೆದಿದ್ದು ಅದರ ಫೋಟೊಗಳು ವೈರಲ್ ಆಗ್ತಿದೆ. ವಧು ವರರ ಪ್ರಥಮ ಶಾಸ್ತ್ರ ಕೂಡ ನೆರವೇರಿದೆ.

ಡಾಲಿ ಧನಂಜಯ್ ಮದುವೆ ಸಮಾರಂಭ ಇಂದು (ಫೆಬ್ರವರಿ 15) ಮತ್ತು ನಾಳೆ (ಫೆಬ್ರವರಿ 16) ನಡೆಯುತ್ತಿದೆ. ಶನಿವಾರ ಸಂಜೆಯಿಂದ ಮೈಸೂರಿನ ವಸ್ತು ಪ್ರದರ್ಶನ ಮೈದಾನದಲ್ಲಿ ಅದ್ಧೂರಿ ಆರತಕ್ಷತೆಯಿದೆ. ಡಾಲಿ ಮದುವೆಯನ್ನು ಕಣ್ತುಂಬಿಕೊಳ್ಳುವುದಕ್ಕೆ 'ಪುಷ್ಪ 2' ಸಿನಿಮಾದ ನಿರ್ದೇಶಕ ಸುಕುಮಾರ್ ಆಗಮಿಸಿದ್ದಾರೆ. ಸುಕುಮಾರ್ ಹಾಗೂ ಡಾಲಿಯ ಫೋಟೊ ಇಲ್ಲಿದೆ.