'ಲವ್ ಯು ರಚ್ಚು' ಸಿನಿಮಾದ ಅಸಲಿ ನಿರ್ದೇಶಕ ಅಜಯ್ ರಾವ್: ಸಾಕ್ಷಿಗೆ ಡಿಂಪಲ್ ಕ್ವೀನ್ ರಚಿತಾ ರಾಮ್ ಸಹಿ!

'ಲವ್ ಯು ರಚ್ಚು' ಡೈರೆಕ್ಟ್ ಮಾಡಿದ್ದು ಯಾರು?

ರಚಿತಾ ರಾಮ್ ಹಾಗೂ ಅಜಯ್ ರಾವ್ ಸಿನಿಮಾ 'ಲವ್ ಯು ರಚ್ಚು' ದಿನದಿಂದ ದಿನಕ್ಕೆ ಒಂದೊಂದೇ ವಿವಾದಕ್ಕೆ ಸಿಲುಕುತ್ತಿದೆ. ಈಗ ಈ ಸಿನಿಮಾವನ್ನು ನಿರ್ದೇಶನ ಮಾಡಿದ್ದು ಯಾರು? ಎನ್ನುವ ಪ್ರಶ್ನೆ ಎದ್ದಿದೆ ಇದಕ್ಕೆ ಕಾರಣ ಒಂದು ಕರಾರುಪತ್ರ. ಅಜಯ್ ರಾವ್ ಹಾಗೂ ಜಿ ಸಿನಿಮಾಸ್ ಮಾಲೀಕ ಗುರುದೇಶಪಾಂಡೆ ನಡುವೆ ನಡೆದ ಆದ ಒಂದು ಒಡಂಬಡಿಕೆ ಈಗ ಎಲ್ಲೆಡೆ ಬೇಜಾನ್ ಸದ್ದು ಮಾಡುತ್ತಿದೆ. ಈ ಒಡಂಬಡಿಕೆಯಲ್ಲಿ ಅಜಯ್ ರಾವ್ ಅವರಿಗೆ ತೆರೆಯ ಹಿಂದೆ ನಿರ್ದೇಶನ ಮಾಡಲು ಒಪ್ಪಿ ನೀಡಿರುವುದಾಗಿ ತಿಳಿಸಲಾಗಿದೆ. ಹಾಗಿದ್ದರೆ, ಅಸಲಿಗೆ 'ಲವ್ ಯು ರಚ್ಚು' ಸಿನಿಮಾ ನಿರ್ದೇಶನ ಮಾಡಿದ್ದು ಯಾರು? ಎನ್ನುವ ಪ್ರಶ್ನೆ ಎದ್ದಿದೆ.

ಅಜಯ್ ಹಾಗೂ ಜಿ ಸಿನಿಮಾಸ್ ಒಡಂಬಡಿಕೆಯಲ್ಲೇನಿದೆ?

ಅಜಯ್ ರಾವ್ ಹಾಗೂ ಜಿ ಸಿನಿಮಾಸ್ ನಡುವೆ ನಡೆದ ಒಡಂಬಡಿಕೆಯ ಪತ್ರ ಹೀಗೆ ನಮೂದಿಸಲಾಗಿದೆ. " ಜಿ ಸಿನಿಮಾಸ್ ಸಂಸ್ಥೆಯಡಿಯಲ್ಲಿ ಗುರುದೇಶಪಾಂಡೆ ನಿರ್ಮಿಸುತ್ತಿರುವ ' ಲವ್ ಯು ರಚ್ಚು' ಕನ್ನಡ ಚಿಲನಚಿತ್ರಕ್ಕೆ ಅಜಯ್ ರಾವ್ ನಾಯಕನಾಗಿ ಹಾಗೂ ರಚಿತಾ ರಾಮ್ ನಾಯಕಿಯಾಗಿ ಅಭಿನಯಿಸುತ್ತಿದ್ದಾರೆ. ಈ ಚಿತ್ರವನ್ನು ತೆರೆಯ ಹಿಂದೆ ನಿರ್ದೇಶನ ಮಾಡಲು ಅಜಯ್ ರಾವ್ ಅವರಿಗೆ ನಮ್ಮ ಸಂಸ್ಥೆಯ ವತಿಯಿಂದ ಅಧಿಕೃತವಾಗಿ ಒಪ್ಪಿಗೆ ನೀಡಿರುತ್ತೇವೆ. ಆದರೆ ತೆರೆಯ ಮೇಲೆ ಶಂಕರ್ ಎಸ್ ರಾಜ್ ಅವರ ಹೆಸರನ್ನು ನಿರ್ದೇಶಕ ಎಂದು ಇಡಲಾಗುವುದು. ಚಿತ್ರದ ಮೊದಲ ಪ್ರತಿ ಬರುವವರಗೂ ಎಲ್ಲಾ ತಾಂತ್ರಿಕ ಕಾರ್ಯ ನಿರ್ವಹಣೆಯನ್ನು ಅಜಯ್ ರಾವ್ ಅವರ ನೇತೃತ್ವದಲ್ಲಿ ಮುಂದುವರೆಸಲು ಒಪ್ಪಿರುತ್ತೇವೆ." ಎಂದು ತಿಳಿಸಲಾಗಿದೆ.

ಈ ಒಡಂಬಡಿಕೆಗೆ ರಚಿತಾ ರಾಮ್ ಸಹಿ

'ಲವ್ ಯು ರಚ್ಚು' ಸಿನಿಮಾವನ್ನು ಅಜಯ್ ರಾವ್ ಅವರೇ ನಿರ್ದೇಶನ ಮಾಡುತ್ತಾರೆ ಎನ್ನುವ ಪತ್ರಕ್ಕೆ ಇಬ್ಬರು ಸಾಕ್ಷಿಗಳು ಸಹಿ ಹಾಕಿದ್ದಾರೆ. ಇದು ಅಜಯ್ ರಾವ್ ಹಾಗೂ ಜಿ ಸಿನಿಮಾಸ್ ನಡುವೆ ನಡೆದ ಕರಾರು ಪತ್ರ. ಇದಕ್ಕೆ 'ಲವ್ ಯು ರಚ್ಚು' ಸಿನಿಮಾ ನಾಯಕಿ ರಚಿತಾ ರಾಮ್ ಸಾಕ್ಷಿಯಾಗಿ ಸಹಿ ಮಾಡಿದ್ದಾರೆ. ಶಂಕರ್ ಎನ್ನುವ ಮತ್ತೊಬ್ಬರು ಸಹಿ ಮಾಡಿದ್ದಾರೆ. ಹೀಗಾಗಿ 'ಲವ್ ಯು ರಚ್ಚು' ಅಸಲಿ ನಿರ್ದೇಶಕ ಯಾರು ಎನ್ನುವ ಬಗ್ಗೆ ಚರ್ಚೆ ಆರಂಭ ಆಗಿದೆ.

ಜಿ ಸಿನಿಮಾಸ್ ಮಾಲೀಕ ಏನಂತಾರೆ?

ಅಜಯ್ ರಾವ್ ಹಾಗೂ ಜಿ ಸಿನಿಮಾಸ್ ಮಾಲೀಕರ ನಡುವೆ ನಡೆದ ಈ ಒಡಂಬಡಿಕೆ ಬಗ್ಗೆ ಗುರುದೇಶಪಾಂಡೆ ಪ್ರತಿಕ್ರಿಯೆ ನೀಡಿದ್ದಾರೆ. "ಇದು ಒಂದು ಸಿನಿಮಾ ತಂಡದೊಳಗೆ ಇರಬೇಕಾಗಿತ್ತು. ಇದು ಹೇಗೆ ಲೀಕ್ ಆಗಿದೆ ಅನ್ನುವುದು ಗೊತ್ತಿಲ್ಲ. ಈ ಬಗ್ಗೆ ನಾನು ಪ್ರತಿಕ್ರಿಯೆ ನೀಡುವುದಿಲ್ಲ. ನಿಮಗೆ ಯಾರು ಈ ಪತ್ರವನ್ನು ನೀಡಿದ್ದಾರೋ ಅವರ ಬಳಿಯೇ ಮಾಹಿತಿ ಪಡೆದುಕೊಳ್ಳಿ." ಎಂದು ನಿರ್ಮಾಪಕ ಗುರು ದೇಶಪಾಂಡೆ ಫಿಲ್ಮಿಬೀಟ್‌ಗೆ ಪ್ರತಿಕ್ರಿಯೆ ನೀಡಿದ್ದಾರೆ. ಈ ಒಡಂಬಡಿಕೆ ಪತ್ರದ ಬಗ್ಗೆ ಸರಿಯಾಗಿ ಮಾಹಿತಿ ನೀಡದೆ ಇರುವುದರಿಂದ 'ಲವ್ ಯು ರಚ್ಚು' ಸಿನಿಮಾದ ಅಸಲಿ ನಿರ್ದೇಶಕರು ಯಾರು ಎಂಬ ಪ್ರಶ್ನೆಗೆ ಉತ್ತರ ಸಿಗಲೇಬೇಕಿದೆ.