ಅಂದು ಮಾಲಾಶ್ರೀ.. ಇಂದು ಧನ್ಯಾ: 30 ವರ್ಷಗಳ ಬಳಿಕ ಮತ್ತೊಮ್ಮೆ 'ಬೆಳ್ಳಿಕಾಲುಂಗುರ'!

ಮಾಲಾಶ್ರೀ ಬೆಳ್ಳಿ ಕಾಲುಂಗುರಕ್ಕೆ 30 ವರ್ಷ!

ದಿವಂಗತ ಕೆವಿ ರಾಜು ನಿರ್ದೇಶಿಸಿದ್ದ 'ಬೆಳ್ಳಿ ಕಾಲುಂಗುರ' ಸಿನಿಮಾ 1992ರಲ್ಲಿ ರಿಲೀಸ್ ಆಗಿತ್ತು. ಆಗ ತಾನೇ ಚಿತ್ರರಂಗಕ್ಕೆ ಕಾಲಿಟ್ಟಿದ್ದ ಮಾಲಾಶ್ರೀಗೆ ಕನಸಿನ ರಾಣಿ ಅನ್ನೋ ಪಟ್ಟ ಸಿಗುವುದಕ್ಕೆ ಈ ಸಿನಿಮಾ ಅಡಿಪಾಯ ಹಾಕಿಕೊಟ್ಟಿತ್ತು. ಇದೇ ಸಿನಿಮಾ ಈಗ 30 ವರ್ಷಗಳ ಸಂಭ್ರಮದಲ್ಲಿದೆ. ಕನ್ನಡ ಎವರ್‌ ಗ್ರೀನ್ ಸಿನಿಮಾ 30 ವರ್ಷಗಳ ಬಳಿಕ ಮತ್ತೆ ಸುದ್ದಿಯಲ್ಲಿದೆ. ಸಾರಾ ಗೋವಿಂದು ಅಂದು ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದರು. ಈಗ ಮತ್ತೆ ಇದೇ ಹೆಸರಿಟ್ಟು ಸಿನಿಮಾ ನಿರ್ಮಾಣ ಮಾಡಲು ಮುಂದಾಗಿದ್ದಾರೆ.

ಅಂದು ಮಾಲಾಶ್ರೀ.. ಇಂದು ಧನ್ಯಾ!

1992ರಲ್ಲಿ ತೆರೆಕಂಡಿದ್ದ 'ಬೆಳ್ಳಿ ಕಾಲುಂಗುರ' ಸಿನಿಮಾದಲ್ಲಿ ಮಾಲಾಶ್ರೀ ಹೀರೊಯಿನ್ ಆಗಿ ನಟಿಸಿದ್ದರು. ಟ್ರೆಡಿಷನಲ್ ಲುಕ್‌ನಲ್ಲಿ ಮಾಲಾಶ್ರೀ ಜನರ ಮನಗೆದ್ದಿದ್ದರು. ಥಿಯೇಟರ್‌ನಲ್ಲಿ ಹೆಂಗಳೆಯರು ಕಣ್ಣೀರು ಸುರಿಸುವಂತೆ ನಟಿಸಿದ್ದರು. ನಾಳೆ (ಆಗಸ್ಟ್ 11) ಸೆಟ್ಟೇರಲಿರೋ 'ಬೆಳ್ಳಿಕಾಲುಂಗುರ' ಸಿನಿಮಾದಲ್ಲಿ ಧನ್ಯಾ ರಾಮ್‌ಕುಮಾರ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇವರೊಂದಿಗೆ ಲೀಡ್ ರೋಲ್‌ನಲ್ಲಿ ಹೊಸ ಹೀರೊ ಎಂಟ್ರಿ ಕೊಡುತ್ತಿದ್ದಾರೆ.

ತ್ರಿಕೋನ ಪ್ರೇಮಕಥೆ!

ಸಾರಾ ಗೋವಿಂದು ನಿರ್ಮಿಸುತ್ತಿರುವ ಹೊಸ 'ಬೆಳ್ಳಿ ಕಾಲುಂಗುರ' ಸಿನಿಮಾವನ್ನು ಹೆಚ್. ವಾಸು ನಿರ್ದೇಶನ ಮಾಡುತ್ತಿದ್ದಾರೆ. " ನಾಳೆ 'ಬೆಳ್ಳಿ ಕಾಲುಂಗುರ' ಸಿನಿಮಾಗೆ 30 ವರ್ಷ ಈ ಕಾರಣಕ್ಕೆ ಹೊಸ ಸಿನಿಮಾಗೆ ಮುಹೂರ್ತ ಮಾಡುತ್ತಿದ್ದೇವೆ. ಇದು ತ್ರಿಕೋನ ಪ್ರೇಮಕಥೆ. ಒಬ್ಬ ಹೀರೊ, ಇಬ್ಬರು ಹೀರೋಯಿನ್ ಇದ್ದು, ಧನ್ಯ ರಾಮ್‌ ಕುಮಾರ್ ಪ್ರಮುಖ ಪಾತ್ರದಲ್ಲಿ ನಟಿಸಲಿದ್ದಾರೆ. ಅಂದ್ಹಾಗೆ ಹೀರೊಗೆ ಇದು ಮೊದಲ ಸಿನಿಮಾ. ನಾಯಕಿ ವಿದೇಶದಲ್ಲಿ ಇದ್ದರೂ, ನಾಡು, ನುಡಿ ಸಂಸ್ಕೃತಿಯನ್ನು ಬಿಡುವುದಿಲ್ಲ. ತಾಯ್ನಾಡಿಗೆ ಮರಳಿದ ಬಳಿಕ ಧನ್ಯಾಗೆ ಹೀರೊ ಮೇಲೆ ಪ್ರೀತಿ ಹುಟ್ಟುತ್ತೆ. ಆದರೆ ಅಷ್ಟರಲ್ಲಷೇ ಹೀರೊ ಮತ್ತೊಬ್ಬ ನಾಯಕಿಯೊಂದಿಗೆ ಪ್ರೀತಿಯಲ್ಲಿರುತ್ತಾನೆ. ಈ ಕತೆ ಮುಂದೆ ಹೇಗೆ ಸಾಗುತ್ತೆ? ಅನ್ನುವುದೇ ಕಥೆ." ಎನ್ನುತ್ತಾರೆ ಹೆಚ್ ವಾಸು.

ಸಿನಿಪ್ರಿಯರಿಗೆ ಸರ್ಪ್ರೈಸ್

ನಾಳೆ ( ಆಗಸ್ಟ್ 12) ಹೊಸ 'ಬೆಳ್ಳಿ ಕಾಲುಂಗರ' ಸಿನಿಮಾ ಸೆಟ್ಟೇರಲಿದೆ. ಇದೇ ವೇಳೆ ಹೊಸ ಸಿನಿಮಾದ ಲುಕ್ ರಿಲೀಸ್ ಆಗಲಿದೆ. ನಿರ್ದೇಶಕರು ಪಾತ್ರಗಳನ್ನು ರಿವೀಲ್ ಮಾಡಲಿದ್ದಾರೆ. ಅಲ್ಲದೆ 'ಬೆಳ್ಳಿಕಾಲುಂಗುರ' ಚಿತ್ರಕ್ಕೆ 30 ವರ್ಷ ಆಗಿದ್ದ ಹಿನ್ನೆಲೆಯಲ್ಲಿ ಪ್ರೋಮೊ ರಿಲೀಸ್ ಮಾಡಲು ಚಿತ್ರತಂಡ ಮುಂದಾಗಿದೆ. ಸ್ಯಾಂಡಲ್‌ವುಡ್‌ನ ಎವರ್‌ಗ್ರೀನ್ ಸಿನಿಮಾವನ್ನು ನೆನೆಪಿಸಲು ಮತ್ತೊಮ್ಮೆ 'ಬೆಳ್ಳಿ ಕಾಲುಂಗುರ' ಸೆಟ್ಟೇರುತ್ತಿದ್ದು, ಪ್ರೇಕ್ಷಕರು ಏನಂತಾರೆ ಅನ್ನೋ ಕುತೂಹಲವಂತೂ ಇದೆ.