ಬಿಡುಗಡೆಗೆ ಮುನ್ನವೇ 'ರಾಬರ್ಟ್' ಅಬ್ಬರ: ಹೊಸ ಇತಿಹಾಸ ಸೃಷ್ಟಿ?

ಎಲ್ಲ ದಾಖಲೆಗಳು ಉಡೀಸ್

ದೊಡ್ಡ ನಟರ ಸಿನಿಮಾಗಳು ಬಿಡುಗಡೆಗೂ ಮುನ್ನವೇ ಭರ್ಜರಿ ವ್ಯಾಪಾರ ನಡೆಸುವುದು ಹೊಸದಲ್ಲ. ಆದರೆ ರಾಬರ್ಟ್ ಈ ಹಿಂದಿನ ಎಲ್ಲ ದಾಖಲೆಗಳನ್ನೂ ಮುರಿದು, ಕನ್ನಡದಲ್ಲಿಯೇ ಹೊಸ ದಾಖಲೆ ನಿರ್ಮಿಸಿದೆ ಎನ್ನಲಾಗಿದೆ.

67 ಕೋಟಿ ರೂ ಗಳಿಕೆ?

ಚಿತ್ರಮಂದಿರದ ಹಕ್ಕು 35 ಕೋಟಿ, ಡಿಜಿಟಲ್, ಆಡಿಯೋ ಹಕ್ಕು ಸೇರಿದಂತೆ ಇನ್ನಿತರೆ ಹಕ್ಕುಗಳ ಮಾರಾಟದಿಂದ 32 ಕೋಟಿ ರೂ. ಮೊತ್ತವನ್ನು ರಾಬರ್ಟ್ ಈಗಾಗಲೇ ಬಾಚಿಕೊಂಡಿದೆ. ಒಟ್ಟು 67 ಕೋಟಿ ರೂ.ಗೆ. ರಾಬರ್ಟ್ ಮಾರಾಟವಾಗಿದೆ ಎಂದು ಹೇಳಲಾಗಿದೆ.

ದಾಖಲೆ ನಿರ್ಮಾಣ

ಆಡಿಯೋ ಕಂಪೆನಿಯೊಂದು ಐದು ಕೋಟಿ ರೂ.ಗೆ ಹಾಡುಗಳ ಹಕ್ಕು ಖರೀದಿಸಲು ಮುಂದಾಗಿದೆ ಎನ್ನಲಾಗಿದೆ. ಈ ಮೂಲಕ ಕನ್ನಡ ಚಿತ್ರರಂಗದ ಇತಿಹಾಸದಲ್ಲಿ ಬಿಡುಗಡೆಗೂ ಮುನ್ನ 50 ಕೋಟಿ ರೂ. ವ್ಯವಹಾರ ನಡೆಸಿದ ಮೊದಲ ಚಿತ್ರ ಎಂಬ ಖ್ಯಾತಿಗೆ 'ರಾಬರ್ಟ್' ಪಾತ್ರವಾಗಿದೆ.

ತೆಲುಗಿನಲ್ಲಿಯೂ ರಾಬರ್ಟ್ ಹವಾ

'ರಾಬರ್ಟ್' ಚಿತ್ರವನ್ನು ಕನ್ನಡದ ಜತೆಗೆ ತೆಲುಗಿನಲ್ಲಿಯೂ ಏಕಕಾಲದಲ್ಲಿ ಬಿಡುಗಡೆ ಮಾಡಲು ಚಿತ್ರತಂಡ ಸಿದ್ಧತೆ ನಡೆಸಿದೆ. ಇದರ ಡಬ್ಬಿಂಗ್ ರೈಟ್ಸ್ ಕೂಡ ಭರ್ಜರಿ ವ್ಯವಹಾರ ಕುದುರಿಸುತ್ತಿದ್ದು, ಬಿಡುಗಡೆಯಾದ ಬಳಿಕ ಬಾಕ್ಸಾಫೀಸ್‌ನಲ್ಲಿ ಹೊಸ ದಾಖಲೆ ಮಾಡುವ ನಿರೀಕ್ಷೆ ಹುಟ್ಟುಹಾಕಿದೆ.