Bangarada Manushya : ಬೋರ್ ವೆಲ್, ಕ್ರೇನ್ ಬಳಸಿದ ಮೊದಲ ಚಿತ್ರ ಅಣ್ಣಾವ್ರ 'ಬಂಗಾರದ ಮನುಷ್ಯ'

ಬೋರ್‌ವೆಲ್ ತೋರಿಸಿದ ಮೊದಲ ಚಿತ್ರ

1970ರ ಕಾಲ. ಆಗತಾನೇ ಸರ್ಕಾರ ಗ್ರಾಮಗಳಲ್ಲಿ ಬೋರ್‌ವೆಲ್‌ಗಳನ್ನು ಅಳವಡಿಸಿತ್ತು. ಆ ಬೋರ್‌ವೆಲ್‌ಗಳನ್ನು ಈ ಸಿನಿಮಾದಲ್ಲಿ ಮೊದಲ ಬಾರಿಗೆ ಪರಿಚಯಿಸಲಾಗಿತ್ತು. "ಈ ಸಿನಿಮಾದಲ್ಲಿ ಮತ್ತೊಂದು ವಿಶೇಷವಿದೆ. ಆಗ ತಾನೇ ಬೋರ್‌ವೆಲ್‌ಗಳನ್ನು ಪರಿಚಯ ಮಾಡಲಾಗಿತ್ತು. ಬೋರ್‌ವೆಲ್‌ಗಳ ಬಗ್ಗೆನೇ ಎಲ್ಲರೂ ಮಾತಾಡುತ್ತಿದ್ದರು. ಬಂಗಾರದ ಮನುಷ್ಯ ಸಿನಿಮಾದಲ್ಲಿ ಮೊದಲ ಬಾರಿಗೆ ಬೋರ್‌ವೆಲ್ ಅನ್ನು ಇದೇ ಸಿನಿಮಾದಲ್ಲಿ ಇಂಟ್ರುಡ್ಯೂಸ್ ಮಾಡಲಾಗಿತ್ತು. ಈ ಸಿನಿಮಾದ ಕೆಲವು ದೃಶ್ಯಗಳಲ್ಲಿ ಬೋರ್‌ವೆಲ್‌ಗಳನ್ನು ಕಾಣಬಹುದು." ಎನ್ನುತ್ತಾರೆ ನಾಗಣ್ಣ.

ಕ್ರೇನ್ ಬಳಸಿದ ಮೊದಲ ಚಿತ್ರ

'ಬಂಗಾರದ ಮನುಷ್ಯ' ಸಿನಿಮಾದಲ್ಲಿ ಹಲವು ಸಾಹಸವನ್ನು ಮಾಡಲಾಗಿತ್ತು. ಹಾಡುಗಳ ಚಿತ್ರೀಕರಣಕ್ಕೆ ಕ್ರೇನ್ ಬಳಸಬೇಕು ಎಂದು ನಿರ್ಮಾಪಕರು ತೀರ್ಮಾನ ಮಾಡಿದ್ದರು. " ಕನ್ನಡದಲ್ಲಿ ಮೊದಲ ಬಾರಿಗೆ ಕ್ರೇನ್ ಬಳಿಸಿದ ಸಿನಿಮಾ 'ಬಂಗಾರದ ಮನುಷ್ಯ'. ತಮಿಳು ಹಾಗೂ ತೆಲುಗು ಸಿನಿಮಾಗಳಲ್ಲಿ ಕ್ರೇನ್ ಅನ್ನು ಹೆಚ್ಚಾಗಿ ಬಳಸುತ್ತಿದ್ದರು. ಆದರೆ, ಕನ್ನಡದಲ್ಲಿ ಈ ಕ್ರೇನ್ ಬಳಸಲು ಸಾಧ್ಯವಾಗುತ್ತಿರಲಿಲ್ಲ. ಹೀಗಾಗಿ ನಮ್ಮ ತಂದೆ ಈ ಸಿನಿಮಾಗಾಗಿ ಕ್ರೇನ್ ತಂದಿದ್ದರು. ಹಾಡನ್ನು ಅದರಲ್ಲೇ ಶೂಟ್ ಮಾಡಿದ್ದರು." ಎಂದು ಆ ದಿನಗಳನ್ನು ನೆನಪಿಸಿಕೊಳ್ಳುತ್ತಾರೆ ನಾಗಣ್ಣ.

ಕ್ರೇನ್ ಆಪರೇಟ್ ಮಾಡಲು 15 ಮಂದಿ ಬೇಕಿತ್ತು

"ಬಂಗಾರದ ಮನುಷ್ಯ ಸಿನಿಮಾವನ್ನು ಚಿಕ್ಕಮಗಳೂರಿನಲ್ಲಿ ಶೂಟಿಂಗ್ ಮಾಡಲಾಗುತ್ತಿತ್ತು. ಈ ವೇಳೆ ಒಂದು ಲಾರಿಯಲ್ಲಿ ಕ್ರೇನ್ ಅನ್ನು ತರುತ್ತಿದ್ದರು. ಬಳಿಕ ಎತ್ತರದ ಪ್ರದೇಶಕ್ಕೆ ಆ ಲಾರಿ ತೆಗೆದುಕೊಂಡು ಹೋಗಿ ಅಲ್ಲಿ ಕ್ರೇನ್ ಅನ್ನು ಇಳಿಸಲಾಗುತ್ತಿತ್ತು. ಈಗಿನ ಹಾಗೆ ಕ್ರೇನ್ ಅನ್ನು ಡಿಸ್‌ಮ್ಯಾಂಟಲ್ ಮಾಡಲು ಸಾಧ್ಯವಿರಲಿಲ್ಲ. ಹೀಗಾಗಿ ಕ್ರೇನ್ ಆಪರೇಟ್ ಮಾಡುವುದಕ್ಕಂತಲೇ ಸುಮಾರು 15 ರಿಂದ 20 ಮಂದಿ ಕೆಲಸ ಮಾಡುತ್ತಿದ್ದರು." ಅಂತಾರೆ ನಾಗಣ್ಣ.

6 ನಿಮಿಷದ 6 ಹಾಡುಗಳಿವೆ

ಜಿ ಕೆ ವೆಂಕಟೇಶ್ ಕಂಪೋಸ್ ಮಾಡಿದ ಹಾಡುಗಳು ಸಿನಿಮಾದ ಹೈಲೈಟ್ ಆಗಿದ್ದವು. ಚಿತ್ರದ ಎಲ್ಲಾ ಹಾಡುಗಳೂ ಸೂಪರ್‌ ಹಿಟ್ ಆಗಿದ್ದವು. ಈ ಸಿನಿಮಾ ಎಲ್ಲಾ ಹಾಡುಗಳಲ್ಲೂ ಒಂದು ವಿಶೇಷವಿದೆ. "ಬಂಗಾರದ ಮನುಷ್ಯ ಸಿನಿಮಾಗೆ ಸಂಗೀತ ನಿರ್ದೇಶಕ ಜಿ ಕೆ ವೆಂಕಟೇಶ್ ಆರು ಹಾಡುಗಳನ್ನು ಕಂಪೋಸ್ ಮಾಡಿದ್ದರು. ವಿಶೇಷ ಅಂದರೆ, ಈ ಆರೂ ಹಾಡುಗಳೂ ಆರು ನಿಮಿಷ ಇತ್ತು. ಅಂದಿನ ಕಾಲಕ್ಕೆ ಈ ಹಾಡು ನಿಜಕ್ಕೂ ವಿಶೇಷ." ಎನ್ನುತ್ತಾರೆ ನಾಗಣ್ಣ.