Puneeth Rajkumar Birthday: ಪುನೀತ್ ಹುಟ್ಟುಹಬ್ಬದ ಬ್ಯಾನರ್ ಹಿಡಿದು ಬಾನಂಗಳದಲ್ಲಿ ಹಾರಾಡುತ್ತಿದೆ ಪುಷ್ಪಕ ವಿಮಾನ

ವಿಮಾನದಲ್ಲಿ ಅಪ್ಪು ಬರ್ತ್‌ಡೇ ವಿಶ್

ಪುನೀತ್ ರಾಜ್‌ಕುಮಾರ್ ಬರ್ತ್‌ಡೇ ಸಂಭ್ರಮ ಮುಗಿಲು ಮುಟ್ಟಿದೆ. ಅಭಿಮಾನಿಗಳು ಥಿಯೇಟರ್‌ ಮುಂದೆ, ರಾಜ್ಯದ ನಾನಾ ಭಾಗಗಳಲ್ಲಿ ಆಚರಣೆ ಮಾಡುತ್ತಿದ್ದಾರೆ. ಇನ್ನೊಂದು ಕಡೆ ಬಾನಂಗಳದಲ್ಲಿ ಸದ್ದಿಲ್ಲದೆ, ಹ್ಯಾಪಿ ಬರ್ತ್‌ಡೇ ಪವರ್‌ಸ್ಟಾರ್ ಬ್ಯಾನರ್ ಹಿಡಿದು ಹಾರಾಡುತ್ತಿದೆ. ಭೂಮಿ ಮೇಲಷ್ಟೆ ಅಲ್ಲ. ಆಕಾಶದಲ್ಲೂ ಬಾನಿಗೊಂದು ಎಲ್ಲೆ ಎಲ್ಲಿದೆ ಅಂತ ಅಪ್ಪು ಹುಟ್ಟುಹಬ್ಬದ ಬ್ಯಾನರ್ ಹಿಡಿದು ಅಭಿಮಾನಿಗಳಿಗೆ ಶುಭಾಶಯಗಳನ್ನು ಕೋರುತ್ತಿದೆ.

ಎಲ್ಲೆಲ್ಲಿ ಕಾಣಿಸುತ್ತೆ ಈ ಬ್ಯಾನರ್?

ಹ್ಯಾಪಿ ಬರ್ತ್‌ಡೇ ಪವರ್‌ಸ್ಟಾರ್ ಬ್ಯಾನರ್ ಹೊತ್ತ ಸಣ್ಣ ವಿಮಾನ ಬಾನಂಗಳದಲ್ಲಿ ಒಂದು ಸುತ್ತಿನ ಹಾರಾಟ ಮುಗಿಸಿದೆ. ಬೆಳಗ್ಗೆ 9.30ರಿಂದ 11.30ರವರೆಗೆ ಹಾರಾಟ ಮಾಡಿದೆ. ಮೊದಲು ಜಕ್ಕೂರು ವಿಮಾನ ನಿಲ್ದಾಣದಿಂದ ಹೊರಟು ಡಾ.ರಾಜ್‌ಕುಮಾರ್ ಪುಣ್ಯಭೂಮಿ ಮೇಲೆ ಹಾರಾಟ ನಡೆಸಿದೆ. ಇಲ್ಲಿ ಸುಮಾರು 20 ನಿಮಿಷಗಳ ಕಾಲ ಹಾರಾಟ ನಡೆಸಿದೆ. ಇಲ್ಲಿಂದ ಒರಾಯನ್ ಮಾಲ್, ಸದಾಶಿವನಗರ, ಮಲ್ಲೇಶ್ವರಂ, ರಾಜಾಜಿನಗರ, ಮೆಜೆಸ್ಟಿಕ್ ಹಾಗೂ ಗಾಂಧಿನಗರದ ಸುತ್ತಮುತ್ತ ಸುಮಾರು 40 ನಿಮಿಷಗಳ ಕಾಲ ಫ್ಲೈ ಮಾಡಿದೆ.

ಸಂಜೆ 4 ರಿಂದ 6 ಗಂಟೆವರೆಗೆ ಹಾರಾಟ

ಬೆಳಗ್ಗೆ ಎರಡು ಗಂಟೆ ಹಾಗೂ ಸಂಜೆ ಎರಡು ಗಂಟೆ ಹ್ಯಾಪಿ ಬರ್ತ್‌ಡೇ ಪವರ್‌ಸ್ಟಾರ್ ಬ್ಯಾನರ್ ಹಾರಾಟ ನಡೆಸಲಿದೆ. ಈಗಾಗಲೇ ಒಂದು ಸುತ್ತು ಹಾರಾಟ ಮುಗಿಸಿರುವ ಮಿನಿ ವಿಮಾನ, ಸಂಜೆ 4 ಗಂಟೆ ಹೊತ್ತಿಗೆ ಮತ್ತೆ ಹಾರಾಟ ನಡೆಸಲಿದೆ. ಈ ಬಾರಿ ಕೆ ಆರ್ ಮಾರುಕಟ್ಟೆ, ವಿವಿ ಪುರಂ, ಬನಶಂಕರಿ, ಮೈಸೂರು ರಸ್ತೆ, ಗೋಪಾಲನ್ ಮಾಲ್, ಜೆಪಿ ನಗರ, ಸಿಲ್ಕ್ ಬೋರ್ಡ್, ಬೆಲ್ಲಂದೂರು, ದೊಮ್ಮಲೂರು, ಕೆಆರ್ ಪುರಂ, ಬನಶಂಕರಿ, ಬಾಣಸವಾಡಿ, ಮಾನ್ಯತಾ ಟೆಕ್ ಪಾರ್ಕ್ ಬಳಿಕ ಜಕ್ಕೂರು ವಿಮಾನ ನಿಲ್ದಾಣ ಸೇರಲಿದೆ.

ಚಿತ್ರಮಂದಿರಗಳ ಮೇಲೆ ಹಾರಾಟ

ಈ ಮಿನಿ ವಿಮಾನ 'ಹ್ಯಾಪಿ ಬರ್ತ್‌ಡೇ ಪವರ್‌ಸ್ಟಾರ್' ಬ್ಯಾನರ್ ಹಿಡಿದು ಎಲ್ಲಾ ಚಿತ್ರಮಂದಿರಗಳ ಮೇಲೂ ಹಾರಾಟ ನಡೆಸಲಿದೆ. ಜೇಮ್ಸ್ ಚಿತ್ರ ಬಿಡುಗಡೆಯಾದ ಪ್ರತಿಯೊಂದು ಚಿತ್ರಮಂದಿರ ಮೇಲೆ ಹಾರಾಡಲಿದ್ದು, ಅಪ್ಪು ಅಭಿಮಾನಿಗಳಿಗೆ ಶುಭಕೋರಿದೆ. ಇನ್ನು 'ಜೇಮ್ಸ್' ಸಿನಿಮಾ ರಾಜ್ಯಾದ್ಯಂತ ಬಿಡುಗಡೆಯಾಗಿದ್ದು, ಫಸ್ಟ್ ಡೇ ಫಸ್ಟ್ ಶೋನೇ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿದೆ.