ಈ ಚಿತ್ರ ನನ್ನ ಜೀವನದ ಮೈಲುಗಲ್ಲಾಗುತ್ತದೆ ಎಂದಿದ್ದರು ಚಿರು, ಆದರೆ ಅದಕ್ಕೆ ಅವಕಾಶವೇ ಸಿಗಲಿಲ್ಲ

ಹಲವು ವರ್ಷಗಳ ಒಡನಾಟ

ಚಿರಂಜೀವಿ ಸರ್ಜಾ ಅವರನ್ನು ಕಳೆದುಕೊಂಡ ನೋವು ಎಲ್ಲರಿಗೂ ಇದೆ. ಅದರಲ್ಲಿ ನಾವೂ ಒಬ್ಬರು. ನಮ್ಮ ಅವರ ಒಡನಾಟ ತುಂಬಾ ವರ್ಷಗಳಿಂದ ಇತ್ತು. ಅವರಂತಹ ಸಿಹಿಯಾದ ಮತ್ತು ಪ್ರಾಮಾಣಿಕ ವ್ಯಕ್ತಿಯನ್ನು ನಾನು ನೋಡಿಯೇ ಇಲ್ಲ. ನನ್ನನ್ನು ಸಹೋದರನಂತೆ ತುಂಬಾ ಪ್ರೋತ್ಸಾಹ ನೀಡುತ್ತಿದ್ದರು ಎಂದಿದ್ದಾರೆ ಸಂತೋಷ್.

ಮೈಲುಗಲ್ಲಿನ ಸಿನಿಮಾ

ಅವರಿಗೆ ಆಗಾಗ ಕಥೆಗಳನ್ನು ಹೇಳುತ್ತಾ ಚರ್ಚಿಸುತ್ತಿದ್ದೆವು. ಸಿನಿಮಾ ಮಾಡದೇ ಇದ್ದರೂ ಅವರೊಂದಿಗೆ ಬಾಂಧವ್ಯ ಚೆನ್ನಾಗಿತ್ತು. ಈ ಒಡನಾಟಕ್ಕೆ ಅವರ ಫ್ಯಾಮಿಲಿ ಒಳ್ಳೆಯ ಅವಕಾಶ ನೀಡಿತ್ತು. ಐದು ವರ್ಷದ ಹಿಂದೆ 'ದೊಡ್ಡೋರು' ಎಂಬ ಸಿನಿಮಾ ಮಾಡಲು ಹೋಗಿದ್ದೆವು. ಗೆಳೆಯ ಚೇತನ್ ಸಂಭಾಷಣೆ ಬರೆದಿದ್ದರು. ಅವರಿಗೆ ರೀಡಿಂಗ್‌ಗೆ ನೀಡಿದಾಗ 'ನನ್ನ ಜೀವನದಲ್ಲಿ ಇದು ಮೈಲುಗಲ್ಲಿನ ಸಿನಿಮಾವಾಗುತ್ತದೆ' ಎಂದಿದ್ದರು ಎಂದು ಸಂತು ನೆನಪಿಸಿಕೊಂಡರು.

ಪೊಲಿಟಿಕಲ್ ರೌಡಿಸಂ ಚಿತ್ರ

ಅವರು ನನ್ನನ್ನು ಮಗನೇ ಎಂದು ಕರೆಯುತ್ತಿದ್ದರು. ಪೊಲಿಟಿಕಲ್ ರೌಡಿಸಂ ಕಥೆಯ ಸಿನಿಮಾ ಅದು. ಆ ಸಿನಿಮಾ ಮಾಡಲೇಬೇಕು ಎಂದುಕೊಂಡಿದ್ದೆವು. ದೊಡ್ಡ ಬಜೆಟ್ ಸಿನಿಮಾ. ಅದಕ್ಕೆ ನಿರ್ಮಾಪಕರು ಸಿಗುವುದು ಕಷ್ಟವಾಯಿತು. ತುಂಬಾ ಅದರ ಪ್ರಕ್ರಿಯೆ ತುಂಬಾ ವರ್ಷ ನಡೆಯಿತು. ಅನೇಕ ನಿರ್ಮಾಪಕರಿಗೆ ಕಥೆ ವಿವರಿಸಿದ್ದೆವು. ಗಟ್ಟಿಯಾದ ಕಥೆಯಾದರೂ ದೊಡ್ಡ ಬಜೆಟ್ ಬೇಡುವುದರಿಂದ ಹಾಗೆಯೇ ಉಳಿದಿತ್ತು ಎಂದು ತಿಳಿಸಿದ್ದಾರೆ.

ಚಿರಂಜೀವಿಗೆ ಇಷ್ಟವಾಗಿತ್ತು

ನಿರ್ಮಾಪಕರಿಗೆ ತೋರಿಸಲೆಂದೇ ಈ ಚಿತ್ರಕ್ಕಾಗಿ ಹಾಡೊಂದನ್ನು ಸಿದ್ಧಪಡಿಸಿದ್ದೆವು. ವಿಜು ಎಂಬುವವರು ಕಂಪೋಸ್ ಮಾಡಿದ್ದರು. ಚಂದನ್ ಶೆಟ್ಟಿ ಹಾಡಿದ್ದರು. ನಾನು ಸಾಹಿತ್ಯ ಬರೆದಿದ್ದೆ. ಚಿರಂಜೀವಿ ಸರ್ಜಾ ಅವರ ಚಿತ್ರಗಳದ್ದೇ ದೃಶ್ಯಗಳನ್ನು ಬಳಸಿ ಟ್ರೇಲರ್ ಸಾಂಗ್ ಮಾಡಿದ್ದೆವು. ಅದು ಚಿರಂಜೀವಿ ಅವರಿಗೆ ಬಹಳ ಇಷ್ಟವಾಗಿತ್ತು. ಎಲ್ಲರಿಗೂ ಅದನ್ನು ತೋರಿಸುತ್ತಿದ್ದರು ಎಂದು ಸಂತು ವಿವರಿಸಿದ್ದಾರೆ.