'ಹೆಡ್ ಬುಷ್' ರಿಲೀಸ್ ಬಳಿಕ 'ಕಾಂತಾರ' ವೀಕ್ಷಿಸಿದ ಡಾಲಿ ಈಗ ರಿಷಬ್ ಶೆಟ್ಟಿಯ ಅಭಿಮಾನಿ!

ಮೂರು ವಾರಗಳ 'ಕಾಂತಾರ' ವೀಕ್ಷಿಸಿದ ಡಾಲಿ

ರಿಷಬ್ ಶೆಟ್ಟಿ ಸಿನಿಮಾದ ಅಬ್ಬರ ಇನ್ನೂ ನಿಂತಿಲ್ಲ. ದೇಶ-ವಿದೇಶದಲ್ಲಿ 'ಕಾಂತಾರ' ಸಿನಿಮಾ ನೋಡುವುದಕ್ಕೆ ಕ್ಯೂನಲ್ಲಿ ನಿಂತಿರೋ ದೃಶ್ಯಗಳು ಕಾಣುವುದಕ್ಕೆ ಸಿಗುತ್ತಿದೆ. 'ಕಾಂತಾರ' ಎಲ್ಲೆಲ್ಲಿ ರಿಲೀಸ್ ಆಗಿದೆಯೋ ಅಲ್ಲೆಲ್ಲಾ ಸಿನಿಮಾಗೆ ಪಾಸಿಟಿವ್ ರೆಸ್ಪಾನ್ಸ್ ಸಿಗುತ್ತಿದೆ. ಬಾಕ್ಸಾಫೀಸ್‌ನಲ್ಲೂ ಹೊಸ ಹೊಸ ದಾಖಲೆಗಳನ್ನು ಸೃಷ್ಟಿಸುತ್ತಾ ಮುನ್ನುಗ್ಗುತ್ತಿದೆ. ಈ ಮಧ್ಯೆ ಡಾಲಿ ಧನಂಜಯ್ 'ಕಾಂತಾರ' ಸಿನಿಮಾವನ್ನು ವೀಕ್ಷಿಸಿದ್ದಾರೆ. ಜೊತೆಗೆ ಸಿನಿಮಾವನ್ನು ತಡವಾಗಿ ವೀಕ್ಷಿಸಲು ಕಾರಣವೇನು? ಅನ್ನೋದನ್ನೂ ತಿಳಿಸಿದ್ದಾರೆ.

'ಕಾಂತಾರ' ಓಟಿಟಿ ಬಿಡುಗಡೆ ಬಗ್ಗೆ ಹೀಗೊಂದು ಸುದ್ದಿ: ಈ ದಿನವೇ ರಿಲೀಸ್?

'ಕಾಂತಾರ' ಸಿನಿಮಾ ಬಗ್ಗೆ ಡಾಲಿ ಹೇಳಿದ್ದೇನು?

ಡಾಲಿ ಧನಂಜಯ್ 'ಕಾಂತಾರ' ಸಿನಿಮಾ ನೋಡಿದ ಬಳಿಕ ಟ್ವೀಟ್ ಮಾಡಿದ್ದಾರೆ. "ಕಾಂತಾರ ನನ್ನ ಹೆಡ್ ಬುಷ್ ಸಿನಿಮಾದ ನಡುವೆ ನೋಡುವುದು ತಡವಾಯಿತು. ಪ್ರೀತಿಯ ಗೆಳೆಯ ರಿಷಬ್ ಒಳಗಿನ ಬರಹಗಾರ, ನಟ ಹಾಗೂ ನಿರ್ದೇಶಕನ ಅಭಿಮಾನಿಯಾದೆ. ಇದು ಎಂತಹ ಅದ್ಭುತ ಅನುಭವ. ಗೆಳತಿ ಸಪ್ತಮಿಯ ಮುಗ್ಧತೆ ಇಷ್ಟವಾಯಿತು. 'ಕಾಂತಾರ' ಖಂಡಿತವಾಗಿಯೂ ನಮ್ಮ ಹೆಮ್ಮೆ. ಕನ್ನಡ ಚಿತ್ರರಂಗದ ಹೆಮ್ಮೆ." ಎಂದು ಡಾಲಿ ಧನಂಜಯ್ ಟ್ವಿಟರ್‌ನಲ್ಲಿ ಬರೆದುಕೊಂಡಿದ್ದಾರೆ.

ಹೊಂಬಾಳೆಗೆ ಪ್ರೀತಿಯ ಅಪ್ಪುಗೆ

'ಕೆಜಿಎಫ್' ಹಾಗೂ 'ಕಾಂತಾರ'ದಂತಹ ಅದ್ಭುತ ಸಿನಿಮಾಗಳನ್ನು ನಿರ್ಮಾಣ ಮಾಡಿರುವ ಹೊಂಬಾಳೆ ಫಿಲ್ಮ್ಸ್ ಸಿನಿಮಾವನ್ನೂ ಹಾಡಿ ಹೊಗಳಿಸಿದ್ದಾರೆ. " ಇಂತಹ ಕಥೆಗಳನ್ನು ಒಪ್ಪಿ, ಅಪ್ಪಿ ಜಗತ್ತಿಗೆ ತಲುಪಿಸುವಂತಹ ನಮ್ಮ ಹೊಂಬಾಳೆ ಫಿಲ್ಮ್ಸ್‌ಗೆ ನನ್ನ ಪ್ರೀತಿಯ ಅಪ್ಪುಗೆ" ಎಂದು ಡಾಲಿ ಧನಂಜಯ್ ಪ್ರತ್ಯೇಕವಾಗಿ ಟ್ವೀಟ್ ಮಾಡಿದ್ದಾರೆ.

'ಕಾಂತಾರ' ನಿಲ್ಲದ ಓಟ

'ಕಾಂತಾರ' ಸಿನಿಮಾ ಕ್ರೇಜ್ ಈಗ ವಿಶ್ವದ ನಾನಾ ದೇಶಗಳಲ್ಲಿ ಹಬ್ಬಿದೆ. ಕನ್ನಡ ಸಿನಿಮಾದ ಮತ್ತೊಂದು ಸಿನಿಮಾ ವಿಶ್ವದ ಸಿನಿಮಾ ದಿಗ್ಗಜರ ಗಮನ ಸೆಳೆಯುವ ಎಲ್ಲಾ ಲಕ್ಷಣಗಳೂ ಇವೆ. ಈಗಾಗಲೇ ಯುಎಸ್‌ಎ ಸೇರಿದಂತೆ ಹಲವು ದೇಶಗಳಲ್ಲಿ 'ಕಾಂತಾರ' ನೋಡುವುದಕ್ಕೆ ಮುಗಿಬೀಳುತ್ತಿದ್ದಾರೆ. ಹೀಗೆ ಕ್ರೇಜ್ ಮುಂದುವರೆದರೆ, 'ಕಾಂತಾರ' ಚಿತ್ರರಂಗದಲ್ಲಿ ಹೊಸ ದಾಖಲೆಗಳನ್ನು ಬರೆಯಬಹುದು.