ಚಿರಂಜೀವಿ ಸರ್ಜಾ ಖಾತೆಗೆ 'ಚಿರಸ್ಮರಣೀಯ' ಗೌರವ ನೀಡಿದ ಇನ್‌ಸ್ಟಾಗ್ರಾಂ

ರಿಮೆಂಬರಿಂಗ್ ಫೀಚರ್

ಚಿರಂಜೀವಿ ಸರ್ಜಾ ಅಗಲಿ ಸರಿಯಾಗಿ ಒಂದು ತಿಂಗಳ ಬಳಿಕ ಇನ್‌ಸ್ಟಾಗ್ರಾಂ, ಅವರ ಖಾತೆಗೆ 'ರಿಮೆಂಬರಿಂಗ್' ಫೀಚರ್ ಅಳವಡಿಸಿದೆ. ಮೃತಪಟ್ಟ ತಾರೆಯ ಖಾತೆಯನ್ನು ಚಿರಸ್ಮರಣೀಯವಾಗಿಸುವುದು ಈ ಫೀಚರ್‌ನ ಉದ್ದೇಶ. ಇತ್ತೀಚೆಗೆ ಆತ್ಮಹತ್ಯೆ ಮಾಡಿಕೊಂಡ ಬಾಲಿವುಡ್ ನಟ ಸುಶಾಂತ್ ಸಿಂಗ್ ರಜಪೂತ್ ಅವರ ಇನ್‌ಸ್ಟಾಗ್ರಾಂ ಖಾತೆಯನ್ನು ಕೂಡ ಸ್ಮರಣೀಯಗೊಳಿಸಲಾಗಿದೆ.

ಇನ್‌ಸ್ಟಾಗ್ರಾಂ ಗೌರವ

ಚಿರಂಜೀವಿ ಸರ್ಜಾ ಅವರ ಹೆಸರಿನ ಕೆಳಗೆ 'ರಿಮೆಂಬರಿಂಗ್' ಎಂಬ ಪದವನ್ನು ಅಳವಡಿಸಲಾಗಿದೆ. ಅವರ ಖಾತೆ ಇನ್ನು ಮುಂದೆ ಚಿರಸ್ಮರಣೆಯಾಗಿ ಉಳಿಯಲಿದೆ ಎನ್ನುವುದು ಇದರ ಅರ್ಥ. ಇದು ನಿಧನರಾದ ವ್ಯಕ್ತಿಗೆ ಇನ್‌ಸ್ಟಾಗ್ರಾಂ ಸಂಸ್ಥೆ ಸಲ್ಲಿಸುವ ಗೌರವವಾಗಿದೆ.

ಲಾಗಿನ್ ಆಗಲು ಸಾಧ್ಯವಿಲ್ಲ

ವಾಸ್ತವವಾಗಿ 'ರಿಮೆಂಬರಿಂಗ್' ಫೀಚರ್ಅನ್ನು ಅಳವಡಿಸಿದ ಬಳಿಕ ಬೇರೆ ಯಾರೂ ಆ ಖಾತೆಗೆ ಲಾಗಿನ್ ಆಗಲು ಸಾಧ್ಯವಿಲ್ಲ. ಹಾಗೆಯೇ ಅದರಲ್ಲಿ ಪೋಸ್ಟ್‌ಗಳನ್ನು ಅಳಿಸಲು ಅಥವಾ ಹೊಸ ಪೋಸ್ಟ್ ಹಾಕಲು ಅವಕಾಶವಿಲ್ಲ. ಆದರೆ ಆ ಖಾತೆ ಶಾಶ್ವತವಾಗಿ ಉಳಿಯಲಿದೆ. ಹಳೆಯ ಪೋಸ್ಟ್‌ಗಳು ಫಾಲೋವರ್‌ಗಳಿಗೆ ವೀಕ್ಷಣೆಗೆ ಲಭ್ಯ. ಹೊಸ ಬಳಕೆದಾರರೂ ಖಾತೆಯನ್ನು ಫಾಲೋ ಮಾಡಬಹುದು.

ನಗುವಿನೊಂದಿಗೆ ಚಿರು ಸ್ಮರಣೆ

ಚಿರಂಜೀವಿ ಅಗಲಿ ಒಂದು ತಿಂಗಳು ಕಳೆದ ಸಂದರ್ಭದಲ್ಲಿ ಅವರ ಆತ್ಮೀಯ ಸ್ನೇಹಿತ, ನಿರ್ದೇಶಕ ಪನ್ನಗಾಭರಣ ಮನೆಯಲ್ಲಿ ಆಪ್ತರು ಸೇರಿದ್ದರು. ತಮ್ಮ ಮನೆಯ ಒಂದು ಭಾಗವನ್ನು ಪನ್ನಗಾಭರಣ, ಚಿರಂಜೀವಿ ಸರ್ಜಾ ಅವರಿಗಾಗಿ ಮೀಸಲಿಟ್ಟಿದ್ದಾರೆ. ಅಲ್ಲಿ ಅವರ ಫೋಟೊ ಪ್ರತಿಷ್ಠಾಪಿಸಿದ್ದಾರೆ. ನಗುತ್ತಿರುವ ಚಿರು ಫೋಟೊ ಮುಂದೆ ಎಲ್ಲರೂ ಜತೆಯಾಗಿ ಕುಳಿತು ನಗುತ್ತಾ ಫೋಟೊಗಳನ್ನು ತೆಗೆಸಿಕೊಳ್ಳುವ ಮೂಲಕ ಚಿರುಗೆ ವಿಶೇಷ ರೀತಿಯಲ್ಲಿ ಗೌರವ ಸಲ್ಲಿಸಿದ್ದಾರೆ. ಚಿರು ಬದುಕಿನ ನೀತಿಯಂತೆ ಅವರನ್ನು ನೆನಪಿಸಿಕೊಂಡು ನಗುತ್ತಲಿರುತ್ತೇವೆ ಎಂಬ ಸಂದೇಶ ನೀಡಿದ್ದಾರೆ.