Ashwini Puneeth Rajkumar: 'ಜೇಮ್ಸ್' ಸಿನಿಮಾ ನೋಡುತ್ತಾರಾ ಅಪ್ಪು ಪತ್ನಿ ಅಶ್ವಿನಿ?

'ಜೇಮ್ಸ್' ಸಿನಿಮಾ ನೋಡುತ್ತಾರಾ ಅಪ್ಪು ಪತ್ನಿ ಅಶ್ವಿನಿ?

ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ ಅಭಿನಯದ ಕೊನೆಯ ಸಿನಿಮಾ 'ಜೇಮ್ಸ್'. ಇದು ಕನ್ನಡಿಗರಿಗೆ ಭಾವನಾತ್ಮಕ ಸಿನಿಮಾ. ಈ ಕಾರಣಕ್ಕೆ ಅಭಿಮಾನಿಗಳು ಒಂದು ತಿಂಗಳಿನಿಂದಲೇ ಸಿನಿಮಾ ನೋಡಲು ತಯಾರಿ ನಡೆಸಿದ್ದರು. ಆದರೆ, ಅಪ್ಪು ಸಿನಿಮಾವನ್ನು ಅಶ್ವಿನಿ ಪುನೀತ್ ರಾಜ್‌ಕುಮಾರ್ ನೋಡುತ್ತಾರಾ? ಅನ್ನುವ ಪ್ರಶ್ನೆಗೆ ಅವರನ್ನು ಹತ್ತಿರದಿಂದ ಬಲ್ಲರು ಇಲ್ಲಾ ಅಂತಾರೆ. ನಮಗೆ ಈ ಸಿನಿಮಾ ನೋಡಲು ಸಾಧ್ಯವಾಗಿಲ್ಲ. ಅಂದ್ಮೇಲೆ ಅಶ್ವಿನಿಯವರು ಈ ಸಿನಿಮಾ ನೋಡುತ್ತಾರೆ ಅನ್ನೋದು ಅನುಮಾನ ಎನ್ನುತ್ತಾರೆ 'ಜೇಮ್ಸ್' ಚಿತ್ರದ ನಿರ್ಮಾಪಕ.

ಮೊದಲೇ ಸಿನಿಮಾ ನೋಡಿದ್ದ ಅಶ್ವಿನಿ

ಅಶ್ವಿನಿ ಪುನೀತ್ ರಾಜ್‌ಕುಮಾರ್ 'ಜೇಮ್ಸ್' ಸಿನಿಮಾ ನೋಡಿದ್ದಾರಾ? ಇಲ್ಲವಾ? ಅನ್ನುವುದನ್ನು ನಿರ್ಮಾಪಕ ಕಿಶೋರ್ ತಿಳಿಸಿದ್ದಾರೆ. ಈ ಮೊದಲೇ ಅಪ್ಪು ಪತ್ನಿ ಅಶ್ವಿನಿ ಸಿನಿಮಾದ ತುಣುಕುಗಳನ್ನು ನೋಡಿದ್ದಾರಂತೆ. " ಅಣ್ಣಂಗೆ ಈ ಸಿನಿಮಾ ತುಂಬಾನೇ ಇಷ್ಟ ಆಗಿತ್ತು. 'ಜೇಮ್ಸ್' ಸಿನಿಮಾದ ಎಲ್ಲಾ ಫೈಟ್, ಎಲ್ಲಾ ಸಾಂಗ್, ಎಲ್ಲಾ ಸೀನ್ಸ್ ಅಪ್ಪು ಸರ್ ಮೊಬೈಲ್‌ನಲ್ಲಿದೆ. ಅದೆಲ್ಲವನ್ನೂ ಮೇಡಂ ಆವಾಗಲೇ ನೋಡಿದ್ದಾರೆ. ಮೊದಲ ದಿನದಿಂದಲೇ ಮೇಡಂಗೆ ಅಪ್‌ಡೇಟ್ ಇದೆ. ಆವಾಗಲೇ ನೋಡಿದ್ದಾರೆ. ಆರ್‌ ಆರ್ ಆದ್ಮೇಲೆ ಮೇಡಂ ಸಿನಿಮಾ ನೋಡಿಲ್ಲ. ಈ ಸಿನಿಮಾವನ್ನು ಯಾವಾಗ ನೋಡುತ್ತಾರೋ ಗೊತ್ತಿಲ್ಲ." ಎನ್ನುತ್ತಾರೆ ನಿರ್ಮಾಪಕ ಕಿಶೋರ್.

ಅಶ್ವಿನಿ ಸಿನಿಮಾ ನೋಡ್ತಾರಾ ಗೊತ್ತಿಲ್ಲ

'ಜೇಮ್ಸ್' ಸಿನಿಮಾ ಎಡಿಟಿಂಗ್ ಆದ ಬಳಿಕ ಅಶ್ವಿನಿ ಪುನೀತ್ ರಾಜ್‌ಕುಮಾರ್ ನೋಡಿಲ್ಲ. ಆದರೆ, ನಾಳೆ ಬಿಡುಗಡೆಯಾಗುತ್ತಿರುವ ಸಿನಿಮಾವನ್ನು ಅಪ್ಪು ಪತ್ನಿ ನೋಡಿ ಅರಗಿಸಿಕೊಳ್ಳುತ್ತಾರೆ ಎನ್ನುವ ನಂಬಿಕೆ ಇಲ್ಲ ಎನ್ನುತ್ತಾರೆ ನಿರ್ಮಾಪಕ ಕಿಶೋರ್. "ನನಗೆ ಎಡಿಟಿಂಗ್ ಆದ್ಮೇಲೆ ಸಿನಿಮಾ ನೋಡಲು ಆಗಿಲ್ಲ. ನನಗೆ ಗೊತ್ತಿದ್ದ ಹಾಗೇ ಮೇಡಂಗೆ ಈ ಸಿನಿಮಾ ಡೈಜೆಸ್ಟ್ ಆಗಲ್ಲ. ನನಗೆ ಆಗುತ್ತಿಲ್ಲ. ಅವರಿಗೆ ಬಹಳ ಕಷ್ಟ ಆಗುತ್ತೆ." ಎನ್ನುತ್ತಾರೆ ಕಿಶೋರ್.

10 ಬಾರಿ ಬ್ರೇಕ್ ತೆಗೆದುಕೊಂಡಿದ್ದೇನೆ

" ನಾನು ಫಸ್ಟ್ ಹಾಫ್‌ ನೋಡುವುದಕ್ಕೆ ಸುಮಾರು 10 ಬಾರಿ ಬ್ರೇಕ್ ತೆಗೆದುಕೊಂಡಿದ್ದೇನೆ. ನನಗೆ ಸಿನಿಮಾ ನೋಡಲು ಸಾಧ್ಯವಾಗುತ್ತಿರಲಿಲ್ಲ. 10 ನಿಮಿಷ ನೋಡುತ್ತಿದ್ದೆ. ಅಳು ತಡೆದುಕೊಳ್ಳಲು ಆಗುತ್ತಿರಲಿಲ್ಲ. ಅದಕ್ಕೆ ಎದ್ದು ಬರುತ್ತಿದ್ದೆ. ಮತ್ತೆ ಮೂರು ದಿನ ಆದ್ಮೇಲೆ 'ಜೇಮ್ಸ್' ಸಿನಿಮಾ ನೋಡಿದೆ." ಅಂತ 'ಜೇಮ್ಸ್' ಚಿತ್ರದ ಬಗ್ಗೆ ನಿರ್ಮಾಪಕ ಕಿಶೋರ್ ಮನಬಿಚ್ಚಿ ಮಾತಾಡಿದ್ದಾರೆ.