4 ದಿನಗಳಲ್ಲೇ ವಿಜಯ್, ಅಜಿತ್, ಬಾಲಯ್ಯ, ಚಿರುಗೆ ಟಕ್ಕರ್ ಕೊಡ್ತಾ 'ಕ್ರಾಂತಿ'? ಏನಿದು ಬಾಕ್ಸಾಫೀಸ್ ಲೆಕ್ಕ?

4 ದಿನಗಳ 'ಕ್ರಾಂತಿ' ಬಾಕ್ಸಾಫೀಸ್ ಎಷ್ಟು?

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಸಿನಿಮಾಗಳು ಬಾಕ್ಸಾಫೀಸ್‌ನಲ್ಲಿ ದೊಡ್ಡ ಮಟ್ಟಕ್ಕೆ ಸದ್ದು ಮಾಡುತ್ತೆ. ನಿರೀಕ್ಷಿಸಿದಂತೆ ಮೊದಲ ವಾರದಲ್ಲಿ ಸಿನಿಮಾ ಕಲೆಕ್ಷನ್ ಜೋರಾಗಿಯೇ ಇದೆ. ಮೊದಲ ನಾಲ್ಕು ದಿನಗಳಲ್ಲಿ 'ಕ್ರಾಂತಿ' ಸಿನಿಮಾ 100 ಕೋಟಿ ರೂ. ಅಧಿಕ ಗಳಿಕೆ ಮಾಡಿದೆ ಅನ್ನೋ ಪೋಸ್ಟ್‌ ಒಂದು ಹರಿದಾಡುತ್ತಿದೆ. ಆದರೆ, ಚಿತ್ರತಂಡ ಈ ಬಾಕ್ಸಾಫೀಸ್ ನಂಬರ್ ಅನ್ನು ಖಚಿತ ಪಡಿಸಬೇಕಿದೆ. ಸದ್ಯಕ್ಕೆ ಹರಿದಾಡುತ್ತಿರುವ ಮಾಹಿತಿ ಪ್ರಕಾರ, 'ಕ್ರಾಂತಿ' 109 ಕೋಟಿ ರೂ. ಕಲೆ ಹಾಕಿದೆ ಎನ್ನಲಾಗಿದೆ.

ಸೂಪರ್‌ಸ್ಟಾರ್ ಸಿನಿಮಾಗಳಿಗೆ ಟಕ್ಕರ್ ಕೊಡ್ತಾ?

'ಕ್ರಾಂತಿ' 109 ಕೋಟಿ ರೂ. ಕಲೆಕ್ಷನ್ ಮಾಡಿರೋ ಸುದ್ದಿ ಹರಿದಾಡಿದ್ಮೇಲೆ ಸೂಪರ್‌ಸ್ಟಾರ್ ಸಿನಿಮಾಗಳ ಜೊತೆ ಹೋಲಿಕೆ ಶುರುವಾಗಿದೆ. 'ಕ್ರಾಂತಿ' ರಿಲೀಸ್‌ಗೆ ಒಂದು ವಾರ ಮುನ್ನ ಬಾಲಕೃಷ್ಣ ಅಭಿನಯದ 'ವೀರ ಸಿಂಹ ರೆಡ್ಡಿ', ಚಿರಂಜೀವಿ ಅಭಿನಯದ 'ಥುನಿವು', ದಳಪತಿ ವಿಜಯ್ ಸಿನಿಮಾ 'ವಾರಿಸು' ಹಾಗೂ ಅಜಿತ್ ಸಿನಿಮಾ 'ಥುನಿವು' ರಿಲೀಸ್ ಆಗಿತ್ತು. ಈ ಎಲ್ಲಾ ಸಿನಿಮಾಗಳ ಪ್ರಾದೇಶಿಕ ದಾಖಲೆಯನ್ನು ದರ್ಶನ್ 'ಕ್ರಾಂತಿ' ಸಿನಿಮಾ ಮುರಿದಿದೆ ಅನ್ನೋ ಸುದ್ದಿ ಒಡಾಡುತ್ತಿದೆ.

ಸೂಪರ್‌ಸ್ಟಾರ್‌ಗಳು Vs 'ಕ್ರಾಂತಿ' ಕಲೆಕ್ಷನ್

ಸಂಕ್ರಾಂತಿಗೆ ರಿಲೀಸ್ ಆಗಿದ್ದ ನಾಲ್ವರು ಸೂಪರ್‌ಸ್ಟಾರ್ ಸಿನಿಮಾಗಳ ಕಲೆಕ್ಷನ್ 100 ಕೋಟಿ ರೂ. ದಾಟಿತ್ತು. ಬಾಲಕೃಷ್ಣ ಅಭಿನಯದ 'ವೀರ ಸಿಂಹ ರೆಡ್ಡಿ' 4 ದಿನಗಳಿಗೆ 104 ಕೋಟಿ ರೂ., ಅಜಿತ್ ಸಿನಿಮಾ 'ಥುನಿವು' 100 ಕೋಟಿ ರೂ., ದಳಪತಿ ವಿಜಯ್ ಸಿನಿಮಾ ವಾರಿಸು 102 ಕೋಟಿ ರೂ., ಚಿರಂಜೀವಿ ಸಿನಿಮಾ 'ವಾಲ್ತೇರು ವೀರಯ್ಯ' ಸಿನಿಮಾ 108 ಕೋಟಿ ರೂ. ಗಳಿಸಿದೆ ಎಂದು ವರದಿಯಾಗಿದೆ. ಈಗ 'ಕ್ರಾಂತಿ' ಇದೇ ನಾಲ್ಕು ದಿನಗಳಲ್ಲಿ 109 ಕೋಟಿ ರೂ. ಗಳಿಸಿದ್ದು, ಸೂಪರ್ ಸಿನಿಮಾಗಳ ದಾಖಲೆಯನ್ನು ಮುರಿದಿದೆ ಅನ್ನೋ ವಿಷಯ ಎಲ್ಲೆಡೆ ಹರಿದಾಡುತ್ತಿದೆ. ಆದರೆ, ಈ ಅಂಕಿಗಳನ್ನು ಯಾರೂ ಇದೂವರೆಗೂ ಧೃಡಸಿಲ್ಲ.

'ಕ್ರಾಂತಿ' ಭವಿಷ್ಯವೇನು?

ಕೆಲವರು ದರ್ಶನ್ ಸಿನಿಮಾ 'ಕ್ರಾಂತಿ' 100 ಕೋಟಿ ರೂ. ಗಳಿಕೆ ಮಾಡಿದ್ದನ್ನು ಒಪ್ಪಿಕೊಂಡಿಲ್ಲ. ಅಷ್ಟೆಲ್ಲ ದಾಖಲೆ ಗಳಿಕೆ ಕಂಡಿಲ್ಲ ಎಂದೇ ವಾದ ಮಾಡುತ್ತಿದ್ದಾರೆ. ಈ ಬೆನ್ನಲ್ಲೇ ದರ್ಶನ್ ಹಾಗೂ ಅವರ ತಂಡ 'ಕ್ರಾಂತಿ' ಸಕ್ಸಸ್ ಅನ್ನು ಸೆಲೆಬ್ರೆಟ್ ಮಾಡಿದ್ದಾರೆ. ಸದ್ಯ 'ಕ್ರಾಂತಿ' ಬಾಕ್ಸಾಫೀಸ್‌ನಲ್ಲಿ ಎಷ್ಟು ಕಲೆಕ್ಷನ್ ಆಗಿದೆ ಅನ್ನೋದು ಅಧಿಕೃತ ಮಾಹಿತಿ ಇಲ್ಲ. ಅಲ್ಲದೆ, ಈ ವಾರ ಈ ಸಿನಿಮಾ ಕಲೆಕ್ಷನ್ ಸ್ಟಡಿಯಾಗಿದ್ದರೆ, ಲಾಭದಲ್ಲಿದೆ ಅನ್ನೋದನ್ನು ಗೆಸ್ ಮಾಡಬಹುದು.