ತಾವೇ ನಟಿಸಿದ ಈ ಹಿಟ್ ಚಿತ್ರವನ್ನು ಜಗ್ಗೇಶ್ ನೋಡುವುದಿಲ್ಲವಂತೆ: ಯಾಕೆ ಗೊತ್ತೇ?

ತಮಿಳಿನ ರೀಮೇಕ್

ಸರ್ವರ್ ಸೋಮಣ್ಣ ಚಿತ್ರವನ್ನು ಕನ್ನಡದಲ್ಲಿ ಕೆ. ವಾಸು ನಿರ್ದೇಶಿಸಿದ್ದರು. ಆದರೆ ಇದು 1964ರಲ್ಲಿ ತೆರೆಕಂಡಿದ್ದ 'ಸರ್ವರ್ ಸುಂದರಂ' ಚಿತ್ರದ ರೀಮೇಕ್. ತಮಿಳಿನಲ್ಲಿ ಖ್ಯಾತ ನಿರ್ದೇಶಕ ಕೆ. ಬಾಲಚಂದರ್ ನಿರ್ದೇಶಿಸಿದ್ದರು. 'ಸರ್ವರ್ ಸೋಮಣ್ಣ' ನಟಿ ರಂಭಾ ಅವರ ಮೊದಲ ಚಿತ್ರ ಕೂಡ.

ಪಂಡರೀಬಾಯಿ ತಾಯಿಯ ಪಾತ್ರ

ಈ ಚಿತ್ರದಲ್ಲಿ ಜಗ್ಗೇಶ್ ಅವರ ತಾಯಿಯ ಪಾತ್ರದಲ್ಲಿ ಹಿರಿಯ ನಟಿ ಪಂಡರೀಬಾಯಿ ನಟಿಸಿದ್ದರು. ಚಿತ್ರರಂಗದ ಅನೇಕ ಹೀರೋಗಳಿಗೆ ನಾಯಕಿಯಾಗಿ ನಟಿಸಿದ್ದ ಪಂಡರೀಬಾಯಿ, ನಂತರ ಅಮ್ಮನ ಪಾತ್ರಗಳಲ್ಲಿ ನಟಿಸಿದ್ದರು. ಹಾಗೆಯೇ ಈ ಚಿತ್ರದಲ್ಲಿ ಪಂಡರೀಬಾಯಿ ತಮಗೆ ಅಮ್ಮನಾಗಿ ಅಭಿನಯಿಸಿದ್ದು ತಮ್ಮ ಸೌಭಾಗ್ಯ ಎಂದು ಜಗ್ಗೇಶ್ ತಿಳಿಸಿದ್ದಾರೆ.

ತಾಯಿ ಸಾಯುವ ದೃಶ್ಯ

ಸರ್ವರ್ ಆಗಿದ್ದ ಸೋಮಣ್ಣ ನಟನಾಗಿ ಹೆಸರು ಮಾಡುವ ಕಥೆಯಿತು. ಮಗ ನಟನಾದ ಖುಷಿಯನ್ನು ನೋಡಿ ಸಂಭ್ರಮಿಸುವ ತಾಯಿ ಬಳಿಕ ಅನಾರೋಗ್ಯದಿಂದ ಸಾಯುವ ದೃಶ್ಯವಿದೆ. ಇದು ತಮ್ಮ ಬದುಕಿನಲ್ಲಿ ಕಾಕತಾಳೀಯ ಘಟನೆ ಎಂದು ಜಗ್ಗೇಶ್ ತಿಳಿಸಿದ್ದಾರೆ.

ಅರ್ಜುನ್ ಅಭಿಮನ್ಯು ಸಿನಿಮಾ ವೇಳೆ

ಏಕೆಂದರೆ ಜಗ್ಗೇಶ್ ನಟನಾಗಿ ಬೆಳೆಯುವುದನ್ನು ನೋಡಿ ಖುಷಿ ಪಟ್ಟ ತಾಯಿ ಕೂಡ ಅವರಿಂದ ದೂರವಾದರು. ಟೈಗರ್ ಪ್ರಭಾಕರ್ ಜತೆ 'ಅರ್ಜುನ್ ಅಭಿಮನ್ಯು' ಚಿತ್ರದಲ್ಲಿ ನಟಿಸುವ ಸಂದರ್ಭದಲ್ಲಿಯೇ ತಾಯಿಯನ್ನು ಕಳೆದುಕೊಳ್ಳುವ ನೋವನ್ನು ಅನುಭವಿಸಿದ್ದರು.

ಸರ್ವರ್ ಸೋಮಣ್ಣ ನೋಡೊಲ್ಲ

ಪಂಡರೀಬಾಯಿ ಅವರು ನಿಜ ಜೀವನದಲ್ಲಿಯೂ ನನಗೆ ಅಮ್ಮನಂತೆಯೇ ಕಾಣುತ್ತಿದ್ದರು ಎಂದು ಜಗ್ಗೇಶ್ ಹೇಳಿದ್ದಾರೆ. 'ಸರ್ವರ್ ಸೋಮಣ್ಣ' ಚಿತ್ರದ ದೃಶ್ಯಕ್ಕೂ, ತಮ್ಮ ಬದುಕಿನ ನಿಜ ಘಟನೆಗೂ ಸಂಬಂಧವಿದೆ. ಈ ನೋವಿನ ಕಾರಣಕ್ಕಾಗಿಯೇ ಎಲ್ಲರನ್ನೂ ನಗಿಸಿದ 'ಸರ್ವರ್ ಸೋಮಣ್ಣ' ಚಿತ್ರವನ್ನು ತಾವು ನೋಡುವುದಿಲ್ಲ ಎಂದು ಜಗ್ಗೇಶ್ ಹೇಳಿದ್ದಾರೆ.

ಮದುವೆಯಾಗಿ 20 ದಿನದಲ್ಲಿ...

ತಾಯಂದಿರ ದಿನದ ಸಂದರ್ಭದಲ್ಲಿ ಭಾನುವಾರ ಜಗ್ಗೇಶ್ ಅಮ್ಮನನ್ನು ನೆನಪಿಸಿಕೊಂಡಿದ್ದರು. ಅಮ್ಮನ ಆಸೆಯಂತೆ ತಮ್ಮ ಕೋಮಲ್‌ಗೆ ತರಾತುರಿಯಲ್ಲಿ ಮದುವೆ ಮಾಡಿಸಿದ್ದು, ಮದುವೆ ಮಾಡಿದ 20 ದಿನದಲ್ಲಿಯೇ ತಾಯಿ ತಮ್ಮನ್ನು ಅಗಲಿದ್ದರು ಎಂಬ ಕಹಿ ನೆನಪನ್ನು ಅವರು ಹಂಚಿಕೊಂಡಿದ್ದರು.