ಕೋಮಲ್ ಮದುವೆಯಾದ 20 ದಿನದಲ್ಲಿ ಈ ಘಟನೆ ನಡೆದಿತ್ತು: ಜಗ್ಗೇಶ್ ಹಂಚಿಕೊಂಡ ನೋವಿನ ಕಥೆ

ಅಮ್ಮನ ಕೊನೆಯ ಆಸೆ

ಕೋಮಲ್ ಮದುವೆ ಬಹಳ ತರಾತುರಿಯಲ್ಲಿ ನಡೆದಿತ್ತು. ಅದು ಅಮ್ಮನ ಕೊನೆಯ ಆಸೆಯಾಗಿತ್ತು ಎಂಬುದನ್ನು ಜಗ್ಗೇಶ್ ತಿಳಿಸಿದ್ದಾರೆ. ಹಾಗೆಯೇ ಕೊನೆಯ ಆಸೆ ಈಡೇರಿದ ಬಳಿಕ ಅಮ್ಮ ನಮ್ಮನ್ನು ಅಗಲಿದರು ಎಂಬ ನೋವಿನ ಸಂಗತಿಯನ್ನು ಅಮ್ಮಂದಿರ ದಿನದ ಸಂದರ್ಭದಲ್ಲಿ ಹಂಚಿಕೊಂಡಿದ್ದಾರೆ.

ಒಂದೇ ವಾರದಲ್ಲಿ ಮದುವೆ

'ಬೇಗ ಕೋಮಲ್ ಮದುವೆ ಮಾಡು ಈಶ (ಜಗ್ಗೇಶ್ ಮೊದಲ ಹೆಸರು ಈಶ್ವರ್). ಯಾಕೋ ಶಿವ ಕರೆದಂತೆ ಆಗುತ್ತಿದೆ' ಎಂಬುದಾಗಿ ತಾಯಿ ನಂಜಮ್ಮ ಪದೇ ಪದೇ ಹೇಳತೊಡಗಿದ್ದರು. ಕೊನೆಗೆ ಒಂದೇ ವಾರದಲ್ಲಿ ಸ್ನೇಹಿತನ ತಂಗಿಯನ್ನು ಒಪ್ಪಿಸಿ 20 ವರ್ಷದ ಕೋಮಲ್‌ಗೆ ಮದುವೆ ಮಾಡಿಸಿಬಿಟ್ಟೆ ಎಂದು ಜಗ್ಗೇಶ್ ಸ್ಮರಿಸಿಕೊಂಡಿದ್ದಾರೆ.

ಚಪ್ಪಾಳೆ ತಟ್ಟಿ ಆನಂದಿಸಿದ್ದರು

ಮಗ ಕೋಮಲ್ ಮದುವೆಯನ್ನು ತಾಯಿ ಚಪ್ಪಾಳೆ ತಟ್ಟಿ ಆನಂದಿಸಿದ್ದರು. ಅವನ ಮದುವೆಯಾದ 20 ದಿನಕ್ಕೆ ದೇಹತ್ಯಾಗ ಮಾಡಿಬಿಟ್ಟರು. ಇಂದು ಆಕಸ್ಮಿಕವಾಗಿ ಸಿಕ್ಕ ಅಮ್ಮನ ಫೋಟೊ ನನ್ನನ್ನು ಭಾವುಕನನ್ನಾಗಿಸಿತು ಎಂದು ಕೋಮಲ್ ಮದುವೆಯ ವೇಳೆ ಅಮ್ಮ ಚಪ್ಪಾಳೆ ತಟ್ಟುವ ಫೋಟೊ ಹಂಚಿಕೊಂಡಿದ್ದಾರೆ.

ಬಂಡಿ ಬಿಟ್ಟು ಹೋದರು...

ಹೀಗಿರದಿರಲಿ ಅಮ್ಮನ ದಿನ. ಅಮ್ಮ ಕೂರಿಸಿ ಎಳೆದ ಬಂಡಿ ಬಹುದೂರ ಸಾಗಿ, ಬಂಡಿಯ ಪಯಣಿಗ ಬೆಳೆದು ಹಿರಿಯನಾಗಿ, ಅಮ್ಮ ಎಳೆದ ಬಂಡಿ ಹಳತಾಯಿತೆಂದು, ಹೊಸಬಂಡಿ ಏರಿ ಅಮ್ಮನ ನಡುರಸ್ತೆಯಲ್ಲೆ ಬಿಟ್ಟರು. ಅವರವರಿಗೆ ಅವರ ಹೊಸಬಂಡಿ ಮುಖ್ಯವಾಗಿ ಮುಖ್ಯರಸ್ತೆಯಲ್ಲೆ ಉಳಿದಳು ಅಮ್ಮ ರಸ್ತೆಯಲ್ಲೆ ಬಿಟ್ಟುಹೋದರು. ಬಿಟ್ಟವರ ಶಪಿಸದ ತ್ಯಾಗಮಯಿ ಎಂದು ಭಾವುಕ ಸಾಲುಗಳನ್ನು ಜಗ್ಗೇಶ್ ಬರೆದಿದ್ದಾರೆ.

ಏಳು ಲೋಕ ಬೇಧಿಸುವ ಶಕ್ತಿ

ಯಾವ ದೇವರು ದೇವಸ್ಥಾನ ಮಠ ಸಿಕ್ಕರೆ ಅವಳು ಬೇಡುತ್ತಿದ್ದದ್ದು ಒಂದೇ, ದೇವರೆ ನನ್ನ ಮಗನಿಗೆ ಯಶಸ್ಸುಕೊಡು ಎಂದು. ಅವಳು ಕಷ್ಟಪಟ್ಟು ಬೇಡಿದಳು, ನಾನು ನಿರಾಯಾಸವಾಗಿ ದಡಮುಟ್ಟಿದೆ. ಇದರ ಅರ್ಥ ಒಬ್ಬ ತಾಯಿ ಆಶೀರ್ವಾದ 7 ಲೋಕ ಬೇಧಿಸುವ ಶಕ್ತಿ ನೀಡುತ್ತದೆ. ನಾನು ಸ್ವಯಂ ಅರಿತದ್ದು ಒಂದೇ, ತಾಯಿಗಿಂತ ಮತ್ತೊಬ್ಬ ದೇವರು ಇರಲು ಸಾಧ್ಯವಿಲ್ಲ. ತಾಯಿದೇವರು ಎಂದು ತಾಯಿಯನ್ನು ನೆನಪಿಸಿಕೊಂಡಿದ್ದಾರೆ.

ಅವಳ ಹೆಸರಲ್ಲಿ ವಡೆ ಪಾಯಸ ಪ್ರೀತಿ ಬೇಡ

ಅಮ್ಮ ಇರುವ ಅದೃಷ್ಟವಂತರೆ, ಅಮ್ಮನೆ ಈಜಗಕ್ಕೆ ಪರಿಚಯಿಸಿದ ದೇವರು. ಕ್ಷಣಿಕ ಸುಖದ ಮಾಯೆ, ಹಣ-ಕೀರ್ತಿ ಏನೇ ಗಳಿಸಿದರು ಅಮ್ಮ ಜೀವಕೊಟ್ಟ ಮೇಲೆ ಜಗತ್ತು ಸಿಕ್ಕಿದ್ದು. ಇದ್ದಾಗಲೆ ಅವಳಿಗಾಗಿ ಬಾಳಿ. ಸತ್ತಮೇಲೆ ಪೋಟೋ ಮುಂದೆ ಅವಳ ಹೆಸರಲ್ಲಿ ವಡೆ ಪಾಯಸ ಪ್ರೀತಿಬೇಡ! ಹೋದ ಮೇಲೆ ಮತ್ತೆ ಸಿಗಳು ಆ ದೇವತೆ! ಅಮ್ಮನ ವಸ್ತು ನನ್ನ ಬಳಿ ಜೋಪಾನವಾಗಿವೆ ಎಂದು ಜಗ್ಗೇಶ್ ತಿಳಿಸಿದ್ದಾರೆ.