22 ವರ್ಷದ ಹಿಂದೆ ವಿಷ್ಣು ಜೊತೆ ಕಮಲ್ ಮಾಡಬೇಕಿದ್ದ ಚಿತ್ರಕ್ಕೆ ಮತ್ತೆ ಮರುಜೀವ.!

ಐತಿಹಾಸಿಕ ಚಿತ್ರ 'ಮರುಧನಾಯಗಂ'

18ನೇ ಶತಮಾನದಲ್ಲಿ ವಾರಿಯರ್ ಮೊಹಮ್ಮದ್ ಯೂಸೂಫ್ ಖಾನ್ ಅವರ ಜೀವನ ಆಧಾರಿತ ಕಥೆ ಹೊಂದಿದ್ದ 'ಮರುಧನಾಯಗಂ' ಚಿತ್ರ 1997ರಲ್ಲಿ ಸೆಟ್ಟೇರಿತ್ತು. 20ಕ್ಕೂ ಹೆಚ್ಚು ದಿನಗಳ ಕಾಲ ಶೂಟಿಂಗ್ ಕೂಡ ನಡೆದಿತ್ತು. ಆದರೆ, ಕಾರಣಾಂತರಗಳಿಂದ ಈ ಸಿನಿಮಾ ಅರ್ಧದಲ್ಲೆ ನಿಂತು ಹೋಯಿತು.

ವಿಷ್ಣುವರ್ಧನ್ ನಟಿಸಬೇಕಿತ್ತು

'ಮರುಧನಾಯಗಂ' ಚಿತ್ರಕ್ಕೆ ಸಂಬಂಧಿಸಿದಂತೆ ಸಿಕ್ಕ ದಾಖಲೆಗಳ ಪ್ರಕಾರ, ಈ ಚಿತ್ರದಲ್ಲಿ ಕನ್ನಡದ ಸಾಹಸ ಸಿಂಹ ವಿಷ್ಣುವರ್ಧನ್ ಅವರು ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸಬೇಕಿತ್ತು. ವಾಜೀದ್ ಖಾನ್ ಎಂಬ ಪಾತ್ರದಲ್ಲಿ ವಿಷ್ಣುದಾದಾ ಬಣ್ಣ ಹಚ್ಚಬೇಕಿತ್ತು. ಈ ಪ್ರಾಜೆಕ್ಟ್ ನಿಂತು ಹೋದ ಕಾರಣ, ಕಮಲ್ ಮತ್ತು ವಿಷ್ಣು ಕಾಂಬಿನೇಷನ್ ನೋಡುವಲ್ಲಿ ಪ್ರೇಕ್ಷಕರಿಗೆ ನಿರಾಸೆಯಾಯಿತು.

ಮತ್ತೆ ಜೀವ ನೀಡಲು ಚಿಂತನೆ

ಈ ಸಿನಿಮಾ ನಿಂತು ಹೋಗಿ ಸುಮಾರು 22 ವರ್ಷ ಕಳೆದಿದೆ. ಆದರೂ ಈ ಪ್ರಾಜೆಕ್ಟ್ ಬಗೆಗಿನ ಕಾತುರ ಮಾತ್ರ ಕಮ್ಮಿಯಾಗಿಲ್ಲ. ಈಗಲೂ ಕಮಲ್ ಹಾಸನ್ ಈ ಸಿನಿಮಾ ಮಾಡಿದ್ರೆ, ಭಾರತೀಯ ಚಿತ್ರರಂಗದಲ್ಲಿ ಇತಿಹಾಸ ನಿರ್ಮಾಣವಾಗಬಹುದು ಎಂಬ ಲೆಕ್ಕಾಚಾರ ಇದೆ. ಬಹುಶಃ ಅದಕ್ಕಾಗಿಯೇ ಈ ಚಿತ್ರಕ್ಕೆ ಮತ್ತೆ ಜೀವ ನೀಡಲು ಚಿಂತಿಸಿದ್ದಾರೆ ಎನ್ನಲಾಗಿದೆ.

ಕಮಲ್ ಬದಲು ವಿಕ್ರಮ್.!

ಕಮಲ್ ಹಾಸನ್ ನಿರ್ಮಾಣ ಮತ್ತು ನಿರ್ದೇಶನದಲ್ಲಿ ಈ ಸಿನಿಮಾ ಬರಬೇಕಿತ್ತು. ಜೊತೆಗೆ ಅವರೇ ನಟಿಸುತ್ತಿದ್ದರು. ಆದ್ರೀಗ, ಕಮಲ್ ಹಾಸನ್ ಬದಲಾಗಿ ತಮಿಳಿನ ಖ್ಯಾತ ನಟ ಚಿಯಾನ್ ವಿಕ್ರಮ್ ಅವರನ್ನ ನಾಯಕರನ್ನಾಗಿಸಿ ಈ ಸಿನಿಮಾ ಮಾಡಲು ಮುಂದಾಗಿದ್ದಾರೆ ಎಂಬ ಮಾಹಿತಿ ಹೊರಬಿದ್ದಿದೆ. ಈ ಸಂಬಂದ ರಾಜ್ ಕಮಲ್ ಪ್ರೊಡಕ್ಷನ್ ವಿಕ್ರಂ ಜೊತೆ ಚರ್ಚಿಸಿದೆಯಂತೆ.

ಸೂಪರ್ ಸ್ಟಾರ್ ಕಲಾವಿದರು ಬೇಕು

22 ವರ್ಷದ ಹಿಂದಿನ ತಾರಾಬಳಗ ನೋಡಿದ್ರೆ ದೊಡ್ಡ ದೊಡ್ಡ ನಟರೇ ಇದ್ದರು. ವಿಷ್ಣುವರ್ಧನ್, ಅಂಬರೀಶ್ ಪುರಿ, ನಾಸೀರ್, ಸತ್ಯರಾಜ್, ಜೆಮಿನಿ ಗಣೇಶನ್, ಎಂಎನ್ ನಂಬಿಯಾರ್, ನಾಗೇಶ್ ಅಂತವರು ನಟಿಸುತ್ತಿದ್ದರು. ಇವರೆಲ್ಲ ಬಹುತೇಕರು ಈಗ ಬದುಕಿಲ್ಲ. ಹಾಗಾಗಿ, ಇಂದಿನ ಜನರೇಷನ್ ಗೆ ತಕ್ಕಂತೆ ಸ್ಟಾರ್ ಕಲಾವಿದರು ಈ ಚಿತ್ರಕ್ಕೆ ಬೇಕಾಗಿದ್ದಾರೆ. ವಿಕ್ರಂ ಮಾಡುವುದು ಪಕ್ಕಾ ಆದರೆ ಉಳಿದ ಪಾತ್ರಗಳಿಗೆ ಯಾರು ಆಯ್ಕೆಯಾಗಬಹುದು?