ಈ ವಾರ ಬರೋಬ್ಬರಿ 5 ಸಿನಿಮಾ ರಿಲೀಸ್; ಯಾವುದು ನೋಡ್ತೀರಾ? ಯಾವುದು ಬಿಡ್ತೀರಾ?

ಕನ್ನಡದಲ್ಲಿ ನಿಧಾನವಾಗಿ ಒಳ್ಳೊಳ್ಳೆ ಸಿನಿಮಾ ರಿಲೀಸ್ ಆಗುತ್ತಿವೆ. 'ಸು ಫ್ರಮ್ ಸೋ' ಬಾಕ್ಸಾಫೀಸ್‌ನಲ್ಲಿ ದಾಖಲೆ ಬರೆದ ಬಳಿಕ 'ಏಳುಮಲೆ' ಕೂಡ ಪ್ರೇಕ್ಷಕರಿಗೆ ಕಿಕ್ ಕೊಟ್ಟಿತ್ತು. ಈ ಎರಡು ಸಿನಿಮಾಗಳ ಯಶಸ್ಸಿನ ಬೆನ್ನಲ್ಲೇ 'ಕಾಂತಾರ ಚಾಪ್ಟರ್ 1' ರಿಲೀಸ್‌ಗೆ ರೆಡಿಯಾಗಿದೆ. ಈ ಗ್ಯಾಪ್‌ನಲ್ಲಿ ಕನ್ನಡದಲ್ಲಿ ಯುವ ಪ್ರತಿಭೆಗಳ ಸಿನಿಮಾಗಳು, ಸ್ಮಾಲ್ ಬಜೆಟ್ ಸಿನಿಮಾಗಳು ಥಿಯೇಟರ್‌ಗೆ ಲಗ್ಗೆ ಇಡುತ್ತಿವೆ.

ಈ ವಾರ (ಸೆಪ್ಟೆಂಬರ್ 19) ಕನ್ನಡದಲ್ಲಿ ಬರೋಬ್ಬರಿ 5 ಸಿನಿಮಾಗಳು ರಿಲೀಸ್ ಆಗುತ್ತಿವೆ. ಸ್ಯಾಂಡಲ್‌ವುಡ್‌ನಲ್ಲಿ 'ಕಾಂತಾರ ಚಾಪ್ಟರ್ 1' ಬಿಟ್ಟರೆ ಸ್ಟಾರ್‌ ಸಿನಿಮಾಗಳು ಸದ್ಯಕ್ಕೆ ರಿಲೀಸ್ ಆಗುತ್ತಿಲ್ಲ. ಹೀಗಾಗಿ ಹೊಸಬರು ಅಖಾಡಕ್ಕೆ ಇಳಿಯುತ್ತಿದ್ದಾರೆ. ಇತ್ತೀಚೆಗೆ ಹೊಸಬರ ಸಿನಿಮಾಗಳು, ಸ್ಮಾಲ್ ಬಜೆಟ್ ಸಿನಿಮಾಗಳು ರಿಲೀಸ್ ಆಗುತ್ತಿವೆ. ಹಾಗಿದ್ದರೆ, ಸೆಪ್ಟೆಂಬರ್ 19ರಂದು ರಿಲೀಸ್ ಆಗುತ್ತಿರುವ ಆ 5 ಸಿನಿಮಾಗಳು ಯಾವುವು ಅನ್ನೋದನ್ನು ನೋಡೋಣ.

ಈ ವಾರ ರಿಲೀಸ್ ಆಗುತ್ತಿರುವ ಸಿನಿಮಾಗಳಲ್ಲಿ 'ಕಮಲ್ ಶ್ರೀದೇವಿ' ಟೈಟಲ್‌ನಿಂದಲೇ ಗಮನ ಸೆಳೆದಿದೆ. ವಿಭಿನ್ನ ಕಂಟೆಂಟ್ ಅನ್ನು ಇಟ್ಟುಕೊಂಡು ಈ ತಂಡ ಥಿಯೇಟರ್‌ಗೆ ಲಗ್ಗೆ ಇಡುತ್ತಿದೆ. ಟೀಸರ್, ಟ್ರೈಲರ್ ಅಂತೂ ಪ್ರಾಮಿಸಿಂಗ್ ಆಗಿದೆ. ಇದು ಪ್ರೇಕ್ಷಕರನ್ನು ಥಿಯೇಟರ್‌ಗೆ ಕರೆದುಕೊಂಡು ಬರುತ್ತಾ? ಅನ್ನೋದು ನೋಡಬೇಕಿದೆ. ಈ ಸಿನಿಮಾದಲ್ಲಿ ಚೆಲುವರಾಯಸ್ವಾಮಿ ಪುತ್ರ ಸಚಿನ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಸಂಗೀತ ಭಟ್ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಕಿಶೋರ್ ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ವಿ.ಎ.ಸುನಿಲ್ ಕುಮಾರ್ ಆಕ್ಷನ್ ಕಟ್ ಹೇಳಿದ್ದಾರೆ.

ಅರಸಯ್ಯನ ಪ್ರೇಮ ಪ್ರಸಂಗ

ಈ ವಾರ ರಿಲೀಸ್ ಆಗುತ್ತಿರುವ ಮತ್ತೊಂದು ಸ್ಮಾಲ್ ಬಜೆಟ್ ಸಿನಿಮಾ 'ಅರಸಯ್ಯನ ಪ್ರೇಮ ಪ್ರಸಂಗ'. ಹಾಸ್ಯ ಸಿನಿಮಾಗಳನ್ನು ಇಷ್ಟಪಡುವವರಿಗೆ ಇದು ಇಷ್ಟ ಆಗಬಹುದು. ಹಾಸ್ಯ ನಟ ಮಹಾಂತೇಶ್ ಹಿರೇಮಠ್ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಸಿನಿಮಾ ಪ್ರೇಕ್ಷಕರಿಗೆ ಇಷ್ಟ ಆಗುಬಹುದು. ಇವರೊಂದಿಗೆ ಈ ಸಿನಿಮಾದಲ್ಲಿ ಮೇಘಶ್ರೀ ರಾಜೇಶ್, ರಶ್ಮಿಕಾ ಕೂಡ ನಟಿಸಿದ್ದಾರೆ. ಜೆ.ವಿ.ಆರ್. ದೀಪು ಈ ಸಿನಿಮಾಗೆ ಆಕ್ಷನ್ ಕಟ್ ಹೇಳಿದ್ದಾರೆ.

ಖಾಲಿ ಡಬ್ಬ

'ಕಮಲ್ ಶ್ರೀದೇವಿ', 'ಅರಸಯ್ಯನ ಪ್ರೇಮ ಪ್ರಸಂಗ' ಜೊತೆಗೆ ಮತ್ತೊಂದು ಸ್ಮಾಲ್ ಬಜೆಟ್ ಸಿನಿಮಾ ರಿಲೀಸ್ ಆಗುತ್ತಿದೆ. ಅದುವೇ 'ಖಾಲಿ ಡಬ್ಬ'. ಇದು ಕೂಡ ಹೊಸಬರ ಸಿನಿಮಾ. ರಾಮ್ ಗುಡಿ, ಆದ್ಯಾ ಪ್ರಿಯಾ, ಹರಿತ , ಕುರಿ ಪ್ರತಾಪ್, ವಿ. ನಾಗೇಂದ್ರ ಪ್ರಸಾದ್ ಅಭಿನಯಿಸಿರುವ ಈ ಸಿನಿಮಾವನ್ನು ಕೆ. ಪ್ರಕಾಶ್ ನಿರ್ದೇಶನ ಮಾಡಿದ್ದಾರೆ. ವಿ. ನಾಗೇಂದ್ರ ಪ್ರಸಾದ್ ಅವರೇ ಸಾಹಿತ್ಯ ಬರೆದು, ಸಂಗೀತ ನೀಡಿರುವುದು ವಿಶೇಷ.

ಜೊತೆಯಾಗಿ ಹಿತವಾಗಿ

ಎ.ಆರ್.ಕೃಷ್ಣ ನಿರ್ದೇಶಿಸಿರು ಮತ್ತೊಂದು ಯುವ ಪ್ರತಿಭೆಗಳ ಸಿನಿಮಾ 'ಜೊತೆಯಾಗಿ ಹಿತವಾಗಿ'. ಅಗಸ್ತ್ಯ ಹಾಗೂ ಸುವರ್ತ ಈ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ವಾರ ಬಿಡುಗಡೆಯಾಗುತ್ತಿರುವ ಹೊಸಬರ ಸಿನಿಮಾದಲ್ಲಿ ಇದು ಕೂಡ ಒಂದು.

ಸೋಲ್‌ಮೇಟ್ಸ್‌

ಸೆಪ್ಟೆಂಬರ 19ರಂದು ರಿಲೀಸ್ ಆಗುತ್ತಿರುವ ಸ್ಮಾಲ್ ಬಜೆಟ್ ಸಿನಿಮಾಗಳಲ್ಲಿ 'ಸೋಲ್‌ಮೇಟ್ಸ್' ಕೂಡ ಒಂದು. ಶ್ರೀಜಿತ್ ಸೂರ್ಯ, ಪ್ರಸನ್ನ ಶೆಟ್ಟಿ, ಯಶ್ ಶೆಟ್ಟಿ ಈ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಶಂಕರ್ ಪಿ.ವಿ. ಈ ಸಿನಿಮಾಗೆ ಆಕ್ಷನ್ ಕಟ್ ಹೇಳಿದ್ದಾರೆ. ಐದು ಸಿನಿಮಾಗಳು ಈ ವಾರ ಬಿಡುಗಡೆಯಾಗುತ್ತಿದ್ದು, ಪ್ರೇಕ್ಷಕರು ಯಾವ ಸಿನಿಮಾ ನೋಡುತ್ತಾರೆ? ಯಾವುದನ್ನು ಗೆಲ್ಲಿಸುತ್ತಾರೆ? ಅನ್ನೋದು ಮುಂದಿನ ದಿನಗಳಲ್ಲಿ ಗೊತ್ತಾಗಲಿದೆ. ಸದ್ಯ 'ಕಮಲ್ ಶ್ರೀದೇವಿ' ಹಾಗೂ 'ಅರಸಯ್ಯನ ಪ್ರೇಮ ಪ್ರಸಂಗ' ಸಿನಿಮಾಗಳು ತಕ್ಕ ಮಟ್ಟಿಗೆ ಪ್ರಚಾರವನ್ನು ಮಾಡಿವೆ.