25ನೇ ದಿನದ ಬಳಿಕ ಮತ್ತೆ ಚಿಗುರಿದ 'ಕೆಜಿಎಫ್ 2' ಕಲೆಕ್ಷನ್ : 26ನೇ ದಿನವೂ ಭರ್ಜರಿ ಗಳಿಕೆ!

'ಕೆಜಿಎಫ್ 2' 26ನೇ ದಿನದ ಗಳಿಕೆ ಎಷ್ಟು?

ಮೇ 8 ಭಾನುವಾರದಂದು 'ಕೆಜಿಎಫ್ 2' ಸಿನಿಮಾ ಯಶಸ್ವಿಯಾಗಿ 25 ದಿನಗಳನ್ನು ಪೂರೈಸಿತ್ತು. 25 ದಿನನೇ ದಿನ 'ಕೆಜಿಎಫ್ 2' ಗಳಿಕೆ ದಿಢೀರನೇ ಗಗನಕ್ಕೇರಿತ್ತು. 25ನೇ ದಿನವೂ ಕೂಡ 24.65 ಕೋಟಿ ಲೂಟಿ ಮಾಡಿತ್ತು. ಆದರೆ, ಸೋಮವಾರ ಕೂಡ 'ಕೆಜಿಎಫ್ 2' ಕಲೆಕ್ಷನ್ ಕಮ್ಮಿಯಾಗಲಿಲ್ಲ. 5ನೇ ವಾರದ ಮೊದಲ ದಿನವೂ ವಿಶ್ವದಾದ್ಯಂತ 'ಕೆಜಿಎಫ್ 2' ಗಳಿಕೆ ಭರ್ಜರಿಯಾಗಿಯೇ ಇದೆ. ಟ್ರೇಡ್ ಅನಲಿಸ್ಟ್ ಮನೊಬಾಲ ವಿಜಯಬಾಲನ್ ಪ್ರಕಾರ, 26ನೇ ದಿನದ 'ಕೆಜಿಎಫ್ 2' ಕಲೆಕ್ಷನ್ ಭಾನುವಾರಕ್ಕಿಂತ ಹೆಚ್ಚಿದ್ದು, 25.42 ಕೋಟಿ ಮಾಡಿದೆ. 26ನೇ ದಿನ ಇಷ್ಟೊಂದು ಏರಿಕೆ ಕಂಡಿದ್ದು ಸಿನಿಮಾ ಮಂದಿಗೆ ಶಾಕ್ ಕೊಟ್ಟಂತಾಗಿದೆ.

26 ದಿನಗಳಲ್ಲಿ 'ಕೆಜಿಎಫ್ 2' ಒಟ್ಟು ಗಳಿಕೆ ಎಷ್ಟು?

'ಕೆಜಿಎಫ್ 2' ಸಿನಿಮಾ 26 ದಿನಗಳಲ್ಲಿ ವಿಶ್ವದಾದ್ಯಂತ 1200 ಕೋಟಿ ಕ್ಲಬ್ ಸೇರುವ ಗುರಿ ಹೊಂದಿದೆ. ಕಳೆದ ಎರಡು ದಿನಗಳ ಕಲೆಕ್ಷನ್ ನೋಡಿದರೆ, ಇನ್ನು ಎರಡು ಮೂರು ದಿನಗಳಲ್ಲಿ 1200 ಕೋಟಿಯನ್ನು ಸುಲಭವಾಗಿ ಲೂಟಿ ಮಾಡಲಿದೆ. 26ನೇ ದಿನದ 25 ಕೋಟಿ ಗಳಿಕೆಯನ್ನೂ ಸೇರಿ, ವಿಶ್ವದಾದ್ಯಂತ ಸುಮಾರು 1154.20 ಕೋಟಿ ಲೂಟಿ ಮಾಡಿದೆ. ಟ್ರೇಡ್ ಅನಲಿಸ್ಟ್ ಮನೊಬಾಲ ವಿಜಯಬಾಲನ್ ಕೊಟ್ಟ ಲೆಕ್ಕಾಚಾರ ಹೀಗಿದೆ.

'ಕೆಜಿಎಫ್ 2', 'ಬಾಹುಬಲಿ 2'ಗಿರುವ ಸಾಮ್ಯತೆಯೇನು?

'ಕೆಜಿಎಫ್ 2' 26 ದಿನಗಳಿಗೆ 1154 ಕೋಟಿ ಲೂಟಿ ಮಾಡಿದೆ. ಅದೇ 'ಬಾಹುಬಲಿ 2' 26ನೇ ದಿನ 1600 ಕೋಟಿ ಲೂಟಿ ಮಾಡಿತ್ತು. ಹೀಗಾಗಿ 26 ದಿನಗಳಲ್ಲಿ ಎರಡು ಸಿನಿಮಾಗಳ ಗಳಿಕೆಯಲ್ಲಿ ದೊಡ್ಡ ಅಂತರವೇ ಇದೆ. ಆದರೆ, 'ಕೆಜಿಎಫ್ 2' ಪ್ಲಾಸ್ ಪಾಯಿಂಟ್ ಏನೆಂದರೆ, ಇದರ ಬಾಕ್ಸಾಫೀಸ್‌ ದರ್ಬಾರ್ ಇನ್ನೂ ಕಮ್ಮಿಯಾಗಿಲ್ಲ. ಇಷ್ಟೊತ್ತಿಗಾಗಲೇ 'ಬಾಹುಬಲಿ 2' ಬಾಕ್ಸಾಫೀಸ್ ಓಟ ಗಣನೀಯವಾಗಿ ಇಳಿಮುಖವಾಗಿತ್ತು. ಆದರೆ, 'ಕೆಜಿಎಫ್ 2' ಗಳಿಕೆ ಮೇಲ್ಮುಖವಾಗಿದೆ.

'ಕೆಜಿಎಫ್ 2' ಚೀನಾದಲ್ಲಿ ರಿಲೀಸ್ ಆಗಿಲ್ಲ

ವಿಶ್ವದಾದ್ಯಂತ ಅತಿ ಹೆಚ್ಚು ಗಳಿಕೆ ಕಂಡ ಭಾರತೀಯ ಸಿನಿಮಾಗಳ ಪಟ್ಟಿಯಲ್ಲಿ 'ದಂಗಲ್' ಹಾಗೂ 'ಬಾಹುಬಲಿ 2 ಇದೆ. ಚೀನಾ ಬಾಕ್ಸಾಫೀಸ್‌ನಲ್ಲಿ 'ದಂಗಲ್' 1450 ಕೋಟಿಗೂ ಅಧಿಕ ಗಳಿಕೆ ಕಂಡಿದ್ದರೆ, ಇನ್ನೊಂದು ಕಡೆ 'ಬಾಹುಬಲಿ 2' ಚೀನಾದಲ್ಲೂ ಮಕಾಡೆ ಮಲಗಿತ್ತು. ಅತೀ ಹೆಚ್ಚು ಗಳಿಕೆ ಕಂಡ ಎರಡು ಸಿನಿಮಾಗಳ ಚೀನಾ ಬಾಕ್ಸಾಫೀಸ್‌ ರಿಸಲ್ಟ್ ಕೂಡ ವಿಭಿನ್ನವಾಗಿದೆ. ಈ ಮಧ್ಯೆ 'ಕೆಜಿಎಫ್ 2' ಚೀನಾದಲ್ಲಿ ರಿಲೀಸ್ ಆಗುತ್ತಾ? ಒಂದು ವೇಳೆ ಆದರೆ, ಎಷ್ಟು ಕಲೆಕ್ಷನ್ ಮಾಡಬಹುದು ಎಂಬ ಕುತೂಹಲ ಗರಿಗೆದರಿದೆ.