Kranti first look: ತಾಯಿ ನುಡಿ ಕಲಿಸಿದ ಕನ್ನಡ ತಾಯಿಗೆ ಚಿರಋಣಿ ಎಂದ ದರ್ಶನ್: ಫಸ್ಟ್ ಲುಕ್ ಟೀಸರ್‌ನಲ್ಲಿ ಅಕ್ಷರ 'ಕ್ರಾಂತಿ'

ಕನ್ನಡ ತಾಯಿಗೆ ಚಿರಋಣಿ ಎಂದ ದರ್ಶನ್

"ನನ್ನ ಶಾಲೆ. ಅಕ್ಷರ ಎದೆಗೆ ಬಿತ್ತಿದ ಶಾಲೆ. ಪ್ರಜ್ಞೆಯ ತಲೆಗೆ ನೂಕಿದ ಶಾಲೆ. ಬದುಕುವ ದಾರಿ ತೋರಿದ ಶಾಲೆ. ಎಲ್ಲರನ್ನೂ ಪ್ರೀತಿಸುವುದ ಕಲಿಸಿದ ಶಾಲೆ. ತಾಯಿ ನುಡಿ ದೇವ ನುಡಿ ಎಂದ ಶಾಲೆ. ಈ ತಾಯಿಗೆ ನನ್ನ ಕನ್ನಡ ತಾಯಿಗೆ, ನಾನು ಚಿರಋಣಿ." ಎಂದು ಫಸ್ಟ್ ಲುಕ್ ಟೀಸರ್‌ನಲ್ಲಿ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಡೈಲಾಗ್ ಹೊಡೆದಿದ್ದಾರೆ. ಫಸ್ಟ್ ಲುಕ್‌ ಪೋಸ್ಟರ್‌ ರಿವೀಲ್ ಮಾಡಿದಾಗ ಹುಟ್ಟಿದ್ದ ಅನುಮಾನಗಳೆಲ್ಲವೂ ಚಿಕ್ಕ ಟೀಸರ್‌ನಿಂದ ರಿವೀಲ್ ಆಗಿದೆ.

'ಕ್ರಾಂತಿ' ಯಲ್ಲಿ ದರ್ಶನ್ ಮಾಸ್ ಲುಕ್

ದರ್ಶನ್ ಸಿನಿಮಾಗಳನ್ನು ಆಯ್ಕೆ ಮಾಡಿಕೊಳ್ಳುವ ರೀತಿ ಬದಲಾಗಿದೆ. ದರ್ಶನ್ ಇಮೇಜಿಗೆ ತಕ್ಕಂತ ಕಥೆ ಇರಬೇಕು. ಸಮಾಜಕ್ಕೆ ಒಂದು ಸಂದೇಶ ಇರಬೇಕು. ಹಾಗಂತ ಮಾಸ್ ಪ್ರಿಯರನ್ನು ನಿರಾಸೆನೂ ಮಾಡಬಾರದು. 'ಕ್ರಾಂತಿ' ಚಿತ್ರದ ಫಸ್ಟ್ ಲುಕ್ ಟೀಸರ್ ನೋಡಿದರೆ ದರ್ಶನ್ ಆಲೋಚನೆ ಏನು ಅನ್ನುವುದು ಗೊತ್ತಾಗುತ್ತೆ. 'ಕ್ರಾಂತಿ' ಟೀಸರ್‌ ಕೊನೆಯಲ್ಲಿ ಬರುವ ಒಂದು ಮಾಸ್ ಆಕ್ಷನ್ ಝಲಕ್ ದರ್ಶನ್ ಫ್ಯಾನ್ಸ್‌ಗೆ ಕಿಕ್ ಕೊಡುವುದರಲ್ಲಿ ಅನುಮಾನವೇ ಇಲ್ಲ. ಬೈಕ್ ಹಿಡಿದು ನಡೆದು ಬರುವ ದೃಶ್ಯ ಮಾಸ್ ಪ್ರಿಯರಿಗಾಗಿಯೇ ಇಟ್ಟಂತಿದೆ.

ಅಡುಗೆ ಎಣ್ಣೆ ಕ್ರಾಂತಿ ಬಳಿಕ 'ಅಕ್ಷರ' ಕ್ರಾಂತಿ

'ಕ್ರಾಂತಿ' ಸಿನಿಮಾ ನಿರ್ಮಿಸುತ್ತಿರುವ ತಂಡವೇ 'ಯಜಮಾನ' ಚಿತ್ರವನ್ನು ನಿರ್ಮಿಸಿತ್ತು. 'ಯಜಮಾನ' ಸ್ವಾವಲಂಬಿಯ ವ್ಯಕ್ತಿಯ ಹಿನ್ನೆಲೆ ಇಟ್ಕೊಂಡು ಅಡುಗೆ ಎಣ್ಣೆ 'ಕ್ರಾಂತಿ' ಕಥೆ ಹೆಣೆಯಲಾಗಿತ್ತು. ಈ ಬಾರಿ ದರ್ಶನ್ 'ಅಕ್ಷರ' ಕ್ರಾಂತಿ ಮಾಡಲು ಹೊರಟಿದ್ದಾರೆ. ಫಸ್ಟ್ ಲುಕ್ ಟೀಸರ್ ಅನ್ನು ಸೂಕ್ಷ್ಮವಾಗಿ ಗಮನಿಸಿದರೆ ಕನ್ನಡ ಅಕ್ಷರದ 'ಕ್ರಾಂತಿ' ಆಗಲಿದೆ ಎಂದು ಊಹಿಸಬಹುದು. ಟೀಸರ್‌ನಲ್ಲಿ ದರ್ಶನ್ ತಾಯ್ನುಡಿ ಕಲಿಸಿದ ಕನ್ನಡ ತಾಯಿಗೆ ಚಿರಋಣಿ ಎಂದು ಹೇಳಿದ್ದಾರೆ. ಹೀಗಾಗಿ ಕನ್ನಡದ 'ಕ್ರಾಂತಿ' ಆಗಬಹುದೆಂದು ನಿರೀಕ್ಷೆ ಮಾಡಬಹುದು.

'ಕ್ರಾಂತಿ' ಪ್ಯಾನ್ ಇಂಡಿಯಾ ಸಿನಿಮಾ

'ಕ್ರಾಂತಿ' ಚಿತ್ರದ ಫಸ್ಟ್ ಲುಕ್ ಟೀಸರ್ ರಿಲೀಸ್ ಆಗಿದ್ದು ಡಿ ಬಾಸ್ ಅಭಿಮಾನಿಗೆ ಖುಷಿಕೊಟ್ಟಿದೆ. ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಹುಟ್ಟುಹಬ್ಬಕ್ಕೆ 'ಕ್ರಾಂತಿ' ಫಸ್ಟ್ ಲುಕ್ ಟೀಶರ್ ಸ್ಪೆಷಲ್ ಗಿಫ್ಟ್ ಇದ್ದಂತೆ. ವಿ. ಹರಿಕೃಷ್ಣ ಇದೇ ಮೊದಲ ಬಾರಿಗೆ ಪ್ಯಾನ್ ಇಂಡಿಯಾ ಸಿನಿಮಾ ನಿರ್ದೇಶಿಸುತ್ತಿದ್ದಾರೆ. ದರ್ಶನ್‌ಗೆ ನಾಯಕಿಯಾಗಿ ಡಿಂಪಲ್ ಕ್ವೀನ್ ರಚಿತಾ ರಾಮ್ ಬಹಳ ದಿನಗಳ ಬಳಿಕ ನಟಿಸುತ್ತಿದ್ದಾರೆ. ಶೈಲಜಾ ನಾಗ್ ಹಾಗೂ ಬಿ ಸುರೇಶ್ ಇಬ್ಬರೂ ಅದ್ಧೂರಿಯಾಗಿ ಈ ಸಿನಿಮಾವನ್ನು ನಿರ್ಮಾಣ ಮಾಡುತ್ತಿದ್ದಾರೆ.